Shfaqet në publik për herë të parë shkrimtari britanik me origjinë indiane, Salman Rushdie, pas sulmit që pësoi gushtin e kaluar.
Në një prononcim dhënë gazetës “The New Yorker”, ai është shprehur se ndodhet në gjendje të mirë.
Shkrimtari u sulmua gjatë një konference mbi lirinë në krijimtarinë artistike në Chautauqua, në qytetin e Nju Jorkut, nga një i ri libanez, simpatizant i Gardës Revolucionare Iraniane.
Ai u godit 12 herë me thikë në pjesë të ndryshme të trupit. Për pasojë, ka humbur shikimin në syrin e djathtë, ka vështirësi në shkrim dhe sheh makthe “të tmerrshme”.
Megjithatë, Rushdie ka siguruar se po ushtron duart për të rifilluar sërish të shkruajë.
“Kam qenë më mirë. Por, duke marrë parasysh atë që ndodhi, nuk jam aq keq. Që kur u sulmova, kam vuajtur nga çrregullimi i stresit post-traumatik. Ulem të shkruaj dhe asgjë nuk ndodh. Unë shkruaj, por është një kombinim i zbrazëtisë dhe gjërave pa vlerë, gjëra që i shkruaj dhe i fshij të nesërmen”, tha Rushdie.
Ai thotë se pas sulmit, ka ndryshuar rrjedha e karrierës së tij.
Ndoshta jo në mënyrën e të shkruarit, por në shitjen e librave të tij. Pas sulmit, “Vargjet Satanike” pësuan një rritje të madhe të kërkesës.
“Tani që për pak sa nuk vdiqa, të gjithë më duan”, thekson Rushdie.
Salman Rushdie është dënuar me vdekje nga regjimi iranian në vitin 1989.
m.b./dita
