Deputetja, thirrje banorëve: Kujdes, Paketa e Maleve, dredhi e re për tjetërsimin e tokave

Deputetja e pavarur Marjana Koçeku ka reaguar kundër përfshirjes së zonave të Shalës, Shoshit dhe Pultit në Paketën e Maleve, duke ngritur shqetësime për ndikimin që kjo nismë mund të ketë mbi pronësinë dhe identitetin e këtyre trevave.

Në një postim të saj, Koçeku u është drejtuar banorëve të këtyre zonave, duke deklaruar se Paketa e Maleve nuk përbën një zgjidhje për zhvillimin e tyre, por rrezikon të sjellë tjetërsimin e tokave.

Sipas saj, përpara se të pranohen premtime për investime dhe zhvillim, banorët duhet të kërkojnë njohjen e pronësisë dhe të drejtën për të vendosur vetë mbi tokat e tyre.

Ajo ka ngritur gjithashtu shqetësime për mungesën e infrastrukturës bazë në këto zona, duke përmendur problemet me pronësinë, rrugët dhe energjinë, të cilat sipas saj duhet të adresohen përpara çdo projekti zhvillimi.

Reagimi i Marjana Koçekut:

Të dashtun banorë të Shalës, Shoshit e Pultit, Përfshimja e zonave tueja në Paketën e Maleve, siç asht ba e ditun këto ditë, nuk asht shpëtimi i atyne trojeve, por fillimi i nji tjetërsimi që pasojat ka me i pasë aq negative sa ju s’keni me mujtë ma me i kontrollue ato toka.

Nëse doni me qenë shërbyes e lypsarë n’tokat tueja, atëherë pranojeni hak Paketën e Maleve, por di me ju thanë se malet tona nuk futen në paketë, dhe se treva jonë ka ditë me e ruejtë identitetin e vet për shekuj me radhë.

As nuk asht pushtu e as nuk asht shitë. Dhe ju duhet me e pasë parasysh, secili prej jush, se pushtimet gjithmonë kanë ardhë me maska të reja, që ju të mos i njihni.

Unë e di se, çfarëdo çmimi që ata munden me ju ofru, ju nuk i lëshoni tokat e t’parëve, qoftë edhe veç për faktin pse janë t’parëve… se malsori ka qenë dhe asht zot n’tokë t’vet.

Por tash e vetmja mënyrë me jua marrë, asht tu spekulu përmes ligjit me pretekstin se ju do mundeni ma n’fund me i zhvillue ato toka, a ndërkohë nuk keni as tituj pronësie, as rrugë, as energji e as kushtet e nji infrastrukture që jua siguron nji gram jetë të mirë.

S’keni ditë kurrë me i kërkue ato kushte! Kështu që para se me pranue çfarëdolloj premtimi për “zhvillim”, kërkojeni njiherë atë çka ju asht mohue deri tash: pronën tuej, dhe të drejtën me vendosë vetë se çka bahet me pronën tuej.

Zhvillimi që ju nxjerr prej tokës e ju kthen në vasalë e shërbëtorë të dikujt tjetër, nuk ka si me u quejtë zhvillim, përndryshe ju do ishit “zhvillue” me kohë.