Kryeministri Edi Rama prezantoi të hënën kandidatët e Partisë Socialiste për Gjirokastrën.
Kreu i qeverisë theksoi se zgjedhjet e 11 majit janë një moment historik për integrimin në BE.
“Për herë të parë janë bashkuar ylli i fatit tonë, me yllin e fatit të tyre, jo vetëm ne duam që të bëhemi anëtarë të BE, por edhe ata duan që të na kenë në BE sa më parë. Ky është një moment që nuk do të thotë që do jetë i tillë në pafundësi.
Është derë që është hapur tani për arsye që lidhen me ne sepse kemi bërë detyrat, kemi fituar respekt, na besojnë, por edhe për arsye që nuk lidhen me ne, sepse BE është në një moment kur përballet me një botë të trazuar”, tha Rama.
“Edhe ata që janë demokratë duhet të bashkohen tek ajo kutia jonë në fletën e votimit. Sepse duhet që negociatat të mos ndërpriten asnjë sekondë, të mos luhatet procesi asnjë sekond, kemi negociuar një kalendar 3 vjet. Janë 250 mijë faqe me ligje, me vendime, me rregulla që duhen marrë dhe adaptuar.
Një votë më e fortë se sa thjesht shumica e PS, është mesazh për atë në Bruksel, se shqiptarët përtej të majtës e të djathtës, përtej partive, po na thonë me votën e tyre që ne e kuptojmë mesazhin tuaj, e pranojmë sfidën që na keni bërë. Ne të gjithë si popull mbështesim këtë proces dhe duam të bëhemi anëtarë të BE. Nuk ka rëndësi se çfarë ngjyre ka macja, të gjithë ata që votojnë nuk duhet të shohin se çfarë ngjyre kemi ne.
Duhet të ndjekin atë porosinë e Ten Ciao Pinit, që thonte: Nuk më intereson çfarë ngjyre ka macja, më intereson që të kapë minjtë. Dhe minjtë në këtë vend i kapim vetëm ne. Madje, jemi aq të zotë sa kapim edhe minjtë tanë, jo vetëm të komshinjve. Dhe këtë gjë, kundërshtarët na e “këndojnë” si diçka për të cilën duhet të ulim kokën. Por, pikërisht për këtë ne duhet ta mbajmë kokën edhe më lart”, shtoi Rama.
i.b./dita
