Dëshmia e Dunamit, reagon ish-ministri Nasip Naço: Distancohem nga akuzat

Bashkëpunëtori i drejtësisë, Nuredin Dumani, ka vijuar të japë informacione të rëndësishme gjatë dëshmisë së tij në megaprocesin e njohur si “Plumbi i Artë”.

Gjatë seancës, Dumani ka zbuluar një detaj që ka tërhequr vëmendjen e publikut, duke pohuar se ka paguar një shumë prej 40 mijë eurosh për të siguruar lirimin nga qelia.

Dumani ka theksuar se këto para janë paguar në dorë dhëndrit të vëllait të ish-deputetit Nasip Naço, i cili në atë periudhë mbante postin e shefit të spitalit duke i siguruar kështu një dokument që vërtetonte probleme shëndetësore dhe për pasojë arriti të lirohej.

Kjo deklaratë ka nxitur një reagim të menjëhershëm nga ish-ministri Nasip Naço, i cili ka hedhur poshtë akuzat dhe ka kërkuar që organet e drejtësisë të hetojnë seriozisht rastin.

Në një postim në rrjete sociale Naço ka shprehur distancimin e tij nga çdo akuzë dhe ka ftuar autoritetet përkatëse të marrin masat ligjore ndaj çdo personi të përfshirë, nëse akuzat vërtetohen.

“Jam njohur sot nga mediat ku përmendet emri im. Dua të theksoj se distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje”, shkruan Naço.

Ai ka shtuar gjithashtu se si Ministër i Drejtësisë, ai nuk ka pasur asnjë kompetencë për të ndërhyrë në hetime apo për të dhënë vendime mbi lirimin e të dënuarve, përveçse për dhënien e lejeve të veçanta në përputhje me ligjin. Naço ka bërë të ditur se gjatë periudhës që ka ushtruar këtë detyrë, nuk ka miratuar asnjë leje për Nuredin Dumanin.

Në fund të reagimit të tij, Naço ka theksuar se distancohet nga çdo mashtrim që ka për qëllim dëmtimin e integritetit të tij dhe ka kërkuar që të verifikohen akuzat që janë bërë publike.

i.b./dita