Zbardhen detaje nga vrasja e Ardian Nikulajt si dhe dinamikës së ngjarjes.
Për zbardhjen e ngjarjes ka ndihmuar shumë dëshmia e një vajze, e cila ka treguar detaje nga lëvizja e autorëve të përfshirë në ekzekutimin e biznesmenit Nikulaj.
Fillimisht portugezi është dërguar në një hotel në zonën e Shëngjinit, shumë pranë “Coralit”. Të nesërmen e kanë çuar në Shkodër.
“Motorin e kam blerë unë, e kam parë më vonë te magazina e shtëpisë së Edmondit në Kakarriq të Lezhës. Dy numrat me të cilët ka komunikuar Edmond Haxhia, janë regjistruar në emër të një vajze nga fshati Zejmen i Lezhës, e cila punon si menaxhere e një lokali në Tiranë. Portugezi përshëndeste gjithmonë banorët e Kakarriqit në gjuhën shqipe, por me Edmondin komunikonte në anglisht.”, mësohet të jetë shprehur vajza.
Janë ekspertuar objektet e sekuestruara në dhomën 302 të një hoteli, ku ka qëndruar shtetasi Harry Simpson, si dhe automjeti me targa AA837 ZM, i përdorur nga Edmond Haxhia.
Policia ka gjetur një veshje hixhab grash, ndërsa nga filtrat e cigareve të gjetura në dhomën e hotelit është përftuar profil biologjik, i njëjtë me atë të gjetur në dorezat e sekuestruara në bagazhin e mjetit që kishte marrë me qira Edmond Haxhia.
Sipas dëshmisë së vajzës, motori është blerë në Tiranë, tek 21 dhjetori, me kontratë të rregullt noteriale.
o.j/dita
