Detaje të reja kanë dalë nga atentati ndaj Thimjo alias Sandri Rubatit në Sarandë. 50-vjeçari u qëllua mbrëmjen e së premtes me armë zjarri në një atentat të mirëorganizuar.
Sipas të dhënave paraprake, autorët, të maskuar dhe me skafandra, kanë lëvizur me motor nga rruga “Mit’hat Hoxha”, në drejtim të portit të Sarandës. Ata kanë qëlluar në drejtim të Rubatit me nëntë plumba, duke përdorur një pistoletë të kalibrit 9 mm.
Pas sulmit, autorët janë kthyer në të njëjtën rrugë nga kishin ardhur dhe janë larguar me shpejtësi.
Dyshohet se ata kanë lëvizur drejt zonës së plazheve, pranë “Baba Rexhepit”, dhe më pas mund të jenë larguar me skaf. Motori i përdorur në atentat nuk është gjetur ende, ndërsa hetuesit dyshojnë se autorët e kanë marrë me vete për të fshehur gjurmët.
Pavarësisht plagëve të marra, 50-vjeçari ka qenë i vetëdijshëm pas sulmit. Ai u ka deklaruar hetuesve se nuk ka mundur të identifikojë autorët, pasi nuk i ka njohur personat që e qëlluan.
Forcat e Policisë kanë zhvilluar kontrolle intensive gjatë gjithë natës, ndërsa operacioni vijon për identifikimin dhe kapjen e autorëve të dyshuar.
j.l./ dita
