Detaje të reja dalin nga hetimet lidhur me sulmin me armë ndaj kompanisë farmaceutike CFO Pharma, ngjarje e ndodhur në orët e para të mëngjesit të së martës (17 Mars).
Pista ku po fokusohet grupi hetimor për sulmin ndaj CFO Pharma është aktiviteti i biznesmenit, Nadir Çausholli, i cili dyshohet të jetë i përfshirë në marrjen dhe dhënien e parave me fajde rreth viteve 2019-2022.
Gjithashtu një pistë tjetër ku po hetohet është edhe ajo e konkurrencës.
Por, vetë biznesmeni Nadir Çausholli nuk ka dhënë asnjë detaj që mund të ndihmojnë hetuesit në identifikimin e autorëve apo porositësve, shkruan Panorama.
Hetuesit dyshojnë se autorët e sulmit janë paguar nga persona të tretë për të kryer sulmin me armë që ndodhi rreth orës 02:00.
Nga këqyrja e kamerave të sigurisë ende nuk është zbuluar ndonjë provë e rëndësishme që mund të çojë në identifikimin e autorëve. Pamjet e makinës së tyre nuk janë qarta.
Ngjarja e rëndë është shënuar pas mesnatës së të hënës në autostradën Tiranë-Durrës.
Nga një automjet që lëvizte në drejtim të Durrësit është qëlluar me breshëri automatiku mbi godinën e një prej bizneseve më të njohura në kryeqytetet dhe jo vetëm.
Breshëria është adresuar në fasadën e xhamtë të depos farmaceutike “CFO Pharma” duke shkaktuar vetëm dëme materiale.
j.l./ dita
