Mbështetja me bursa për studentët ekselentë dhe ata që ndjekin programet e shpallura si prioritet kombëtar do të vijojë edhe përgjatë vitit të ardhshëm akademik 2023-2024.
Konfirmimin e ka bërë vetë ministrja e Arsimit dhe Sportit, Evis Kushi, gjatë takimit të zhvilluar me stafin e Agjencisë Kombëtare të Financimit të Arsimit të Lartë (AKFAL), ku dhe u vlerësua mbarëvajtja e procesit të shpërndarjes së bursave për studentët e kategorive përfituese, përfshirë ekselentët dhe ata që preferuan të ndjekin studimet në një nga programet e shpallura prioritet kombëtar.
Ministrja Kushi ka kërkuar nga strukturat e arsimit të lartë që të promovojnë më shumë ndjekjen e këtyre programeve, si dhe përfitimeve dhe lehtësirave që jepen për studentët.
“Theksuam nevojën e angazhimit të vetë institucioneve të arsimit të lartë publik në promovimin e këtyre programeve tek studentët, evitimin e vonesave për shpërndarjen e fondit në llogaritë e studentëve, studimin e nevojave të tregut, si dhe punësimin e sigurt të tyre pas diplomimit”, bën me dije ministrja Kushi.
Sipas saj, diskutimet janë ndalur edhe në çështje të tjera me rëndësi që do të jenë dhe sfida për AKFAL në muajt në vijim, të tilla si: kredia studentore, financimi i universiteteve sipas performancës, unifikimi i formatit të raportimit vjetor të tyre, etj.
p.k\dita
