Policia e Tiranës ka vënë në pranga një 48-vjeçar, i cili dyshohet se ka kanosur familjarët me një hanxhar në banesën e tij në rrugën “Haki Stërmilli”. Ngjarja ka ndodhur mbrëmjen e së mërkurës.
Sipas njoftimit zyrtar, pas marrjes së informacionit, shërbimet e Komisariatit të Policisë Nr. 6 kanë shkuar në vendin e ngjarjes, ku kanë arrestuar shtetasin E. B., si dhe kanë sekuestruar mjetin prerës që ai mbante në dorë.
Nga verifikimet e kryera, rezulton se 48-vjeçari ndodhej nën masën e sigurisë “Arrest në shtëpi”, për veprën penale “Vjedhja”.
Materialet hetimore i janë referuar Prokurorisë së Tiranës për veprime të mëtejshme procedurale.
“Shërbimet e Komisariatit të Policisë Nr. 6, sapo janë njoftuar se mbrëmë, në një banesë në rrugën “Haki Stërmilli”, një shtetas po kanoste familjarët e tij, për jetën, me mjet prerës (hanxhar), kanë shkuar në vendngjarje. Si rezultat i ndërhyrjes policore profesionale u parandalua ngjarja kriminale në këtë familje, si dhe u arrestua në flagrancë autori i dyshuar i rastit, shtetasi E. B., 48 vjeç, banues në Tiranë.
Nga verifikimet e mëtejshme në lidhje me rastin, rezultoi se 48-vjeçari ishte aktualisht me masë sigurie “Arrest në shtëpi”, për veprën penale “Vjedhja””, thuhet në njoftimin e policisë.
i.b./dita
