Presidenti i Turqisë Rexhep Tajip Erdogan, ka mbërritur në Ukrainë për të realizuar një vizitë zyrtare. Erdogan në nisjen e tij nga aeroporti i Ankara-së u përcoll nga zv.presidenti Fuat Oktay, zv.prefekti i Ankarasë, Abdullah Dolek dhe zyrtarë të tjerë.
Përpara takimit me presidentin ukrainas Volodymyr Zelenskyy, Erdogan do të vendosë një kurorë lulesh në varrezat historike të Lychakiv. Ai do të zhvillojë një takim dypalësh me Zelensky në Pallatin Potocki dhe do të diskutojë të gjitha aspektet e marrëdhënieve Turqi-Ukrainë në nivelin e partneritetit strategjik.
Bisedimet dypalëshe do të pasohen nga një samit trepalësh me Sekretarin e Përgjithshëm të OKB-së Antonio Guterres.
Sipas presidencës turke, Erdogan, Zelensky dhe Guterres do të diskutojnë hapat që mund të ndërmerren për t’i dhënë fund luftës Ukrainë-Rusi përmes diplomacisë dhe ruajtjen e mekanizmit të krijuar për eksportin e grurit ukrainas në tregjet botërore.
Ata pritet të mbajnë një konferencë të përbashkët për shtyp pas takimit trepalësh. Më 22 korrik, Turqia, OKB, Rusia dhe Ukraina nënshkruan një marrëveshje në Stamboll për të rihapur tre porte ukrainase të Detit të Zi për eksportimin e grurit ukrainas të bllokuar për shkak të luftës, e cila filloi në shkurt.
Për të mbikëqyrur procesin, një Qendër e Përbashkët Koordinuese (JCC) në Stamboll u hap zyrtarisht më 27 korrik, e përbërë nga përfaqësues nga të tre vendet dhe OKB-ja, për të mundësuar transportin e sigurt të produkteve ushqimore dhe plehrave.
Sipas OKB-së, Guterres është planifikuar gjithashtu të vizitojë qytetin port ukrainas të Odesës për të parë transportin e grurit.
j.l./ dita
