Një vrasje ka tronditur mbrëmjen e sotme qytetin e Shkodrës.
15-vjeçari, Emiljano Gjoni, është qëlluar me thikë nga një bashkëmoshatar i tij gjatë një konflikti për motive të dobëta.
Gjoni u dërgua në spitalin rajonal të Shkodrës nga një kalimtar i rastit, por fatkeqësisht ndërroi jetë si pasojë e plagëve të marra.
Autori dyshohet se është ndihmuar nga një tjetër person për t’u larguar nga vendngjarja.
Ndërkohë pas sekuestrimit të pamjeve nga kamerat e sigurisë pranë zonës ku ndodhi vrasja, policia ka identifikuar dhe bërë të mundur arrestimin e 15-vjeçarit që vrau bashkëmoshatarin e tij.
Edhe i arrestuari ishte dëmtuar lehtë me thikë në sup pa probleme për jetën.
Po ashtu është sekuestruar edhe thika me të cilën u vra i mituri.
Grupi hetimor po vijon veprimet, në prani të psikologut dhe familjarëve, për të zbardhur dinamikën dhe motivin e plotë të ngjarjes.
“Rreth orës 19:30, në zonën e Fermentimit, në lagjen “Skenderbeg”, dyshohet se gjatë një konflikti për motive të dobëta, një shtetas ende i paidentifikuar ka dëmtuar me mjet prerës (thikë), një të mitur 15-vjeç, i cili si pasojë e plagëve të marra ka ndërruar jetë në Spitalin Rajonal Shkodër.
Shërbimet e Policisë kanë shkuar menjëherë në vendngjarje ku po punojnë për identifikimin dhe kapjen e autorit.
Ndërkohë, vijon puna e grupit hetimor, për sqarimin e plotë të rrethanave të ngjarjes”, njofton Policia.
i.b./dita
