Dy vjet pas ngjarjes, Prokuroria e Shkodrës ka dërguar për gjykim në Shkallën e Parë, dosjen penale kundër Ibrahim Licit, duke e akuzuar këtë të fundit si i dyshuar për vrasjen e Endri Mustafës, me motiv hakmarrjen si ndihmës i grupit rival. Dosja nga grupi hetimor i prokurorisë është dërguar në Gjykatën e Shkodrës, por për shkak të mosarrestimit të Licit (ndodhet në Turqi), gjykata ka urdhëruar pezullimin e gjykimin për 1 vit.
Ibrahim Lici, është një person i njohur për policinë. Emri i tij lidhet me ngjarje të bujshme të ndodhura në qytetin e Shkodrës. Ndërsa Endri Mustafa njihej si pjesëtar i grupit të Bilalajve në Shkodër. Në familjet Lici dhe Bilali janë kryer një sërë vrasjesh. Lici cilësohet si kundërshtar i organizatës Bajri dhe në veçanti ish-kampionit të boksit, Astmer Bilali, që ndodhet nën akuzë për krime të tjera dhe që dy vite më parë i vranë po në hakmarrje, babanë dhe xhaxhanë.
