Çiklisti danez Mads Pedersen siguroi fitoren në etapën e tretë të “Giro d’Italia”, duke konfirmuar formën e tij të lartë në këtë fillim të kompeticionit.
Etapa e tretë, që shënonte edhe përfundimin e segmentit shqiptar të turit, u zhvillua në qytetin e Vlorës dhe u karakterizua nga një konkurrencë e ngjeshur deri në metrat e fundit.
Pedersen përfundoi i pari në sprintin final, duke lënë pas rivalët e tij dhe duke rimarrë fanellën rozë, simbol i liderit në renditjen e përgjithshme.
Kujtojmë se ai ishte gjithashtu fitues i etapës së parë, që nisi nga Durrësi dhe përfundoi në Tiranë.
Pas tij, në vendin e dytë u rendit Strong, të ndjekur nga Aular dhe Brandon Rivera, të cilët zhvilluan një performancë të qëndrueshme përgjatë gjithë itinerarit.
Në renditjen e përgjithshme, Pedersen mban vendin e parë, duke lënë pas Primozh Roglicc dhe Karel Vacek.
Pas përfundimit të tre etapave të para në territorin shqiptar, gara do të zhvendoset në Itali, ku çiklistët do të përballen me sfida të reja në pjesën tjetër të turit.
“Giro d’Italia” vazhdon me etapën e katërt, ku pritet një tjetër betejë mes emrave më të mëdhenj të çiklizmit botëror.
j.l./ dita
