Qeveria i jep leje të re në Jalë biznesmenit të protestave në Rrjoll

Nga Orgen Peci

Ndërsa projektet e ndërtimit në veri të vendit vijojnë të shoqërohen me tensione dhe kundërshtime nga banorët lokalë, vendimmarrja e Këshillit Kombëtar të Territorit (KKT) dëshmon vazhdimësinë e bashkëpunimit mes pushtetit ekzekutiv dhe grupeve të biznesit afër politikës.

Sipas dokumenteve zyrtare, KKT-ja e kryesuar nga Kryeministri Edi Rama ka miratuar me kusht lejen e ndërtimit për kompleksin “Nereida” në Jalë (Bashkia Himarë). Përfituese e këtij vendimi është shoqëria “ABA Real Estate Management”, në pronësi të biznesmenit Bashkim Ulaj — i njohur publikisht si zhvilluesi i projektit të debatuar në Rrjoll të Velipojës dhe historikisht i konsideruar si sipërmarrës i afërt me ish-kryeministrin Sali Berisha.

Ecuria e këtij investimi të ri tregon se rezistenca komunitare në Rrjoll apo protestat në Tiranë nuk kanë frenuar procesin e licencimit të projekteve të tjera në bregdetin e Jugut ku përzihet betoni dhe problemet e pronësisë, që vazhdojnë të degjenerojnë në konflikte të rënda.

Ky zhvillim konfirmon edhe qasjen tashmë të njohur nga opinioni publik ku pragmatizmi ekonomik dhe kapitali i madh mbizotërojnë mbi ndasitë politike formale.

Sipas të dhënave të Qendrës Kombëtare të Biznesit (QKB), kompania zhvilluese është regjistruar në vitin 2023. Projekti parashikon: Sipërfaqen e ndërtimit: 5,000 m² në Zonën Kadastrale Nr. 3844, Jalë. Vendndodhjen: Përafërsisht 300 metra larg vijës bregdetar. ​Strukturën: 1 deri në 5 kate mbi tokë dhe 1 kat nëntokë, ku kati përdhe do të shërbejë si bar-restorant me pishinë, ndërsa katet e sipërme do të ndahen mes ambienteve hoteliere dhe njësive të banimit.

Ndërsa në nivel diskursi publik mbetet përplasja politike, praktika e dhënies së lejeve të ndërtimit në zonat më të lakmuara të bregdetit shfaq një dinamikë tjetër: lejet e ndërtimit dhe zhvillimi i territorit vijojnë pa pengesa administrative, duke konfirmuar se pushteti ekonomik i fuqizuar nga lidhjet politike dhe miksimi i parasë publike me paranë jashtë sistemit funksionon pavarësisht përkatësive apo “llogoreve” partiake.

DITA