Ish-Kryetari i Komisionit të Posaçëm për Reformën në Sistemin e Drejtësisë, Fatmir Xhafaj, ka thyer heshtjen e gjatë duke dhënë një intervistë të zgjeruar lidhur me çështjen “Babale”, ngjarje kjo e cila lakoi vëllain e tij Agron Xhafaj.
Pas një kohe të gjatë sulmesh, provokimesh dhe përbaltje nga rivalët politik, Xhafaj zgjodhi të mbajë premtimin për të folur rreth kësaj çështje vetëm pasi drejtësia të kishte thënë fjalën e saj. Teksa Gjykata Penale e Tiranës tashmë ka dhënë vendimin duke dënuar aktorët që u morën me inskenimin e dosjes “Babale”, Xhafaj rrëfen për herë të parë të gjithë detajet e panjohura rreth këtij sulmi ndaj tij dhe familjarëve.
Gazeta “Dita” i ka adresuar një serë pyetjesh ish ministrit të Brendshëm, për të hedhur më shumë dritë rreth gjithë të vërtetës së tij.
Në fokus të pyetjeve është edhe formula që ndoqi Partia Demokratike për të plotësuar skenarin e menduar ku për ta bërë më të besueshëm do t’i nevojitej edhe përdorimi i ish-kreut të Prokurorisë së Krimeve të Rënda Besim Hajdarmataj si dhe segmente politike në Shërbimin Informativ Shtetëror.
I pyetur lidhur me qasjen publike të ndjekur nga “selia blu” për ta marketuar këtë sulm, Xhafaj përcjell disa komente edhe për funksionarët e saj, dhe konkretisht ish ligjvënësin Ervin Salianji, roli i të cilit u ndëshkua nga organet e drejtësisë.
Deputeti socialist ndalet edhe te përgjigjet e ekspertizës shkencore britanike, por dhe ekspertizën e bërë nga Kryeministri dhe ekspertizën e bere publike nga avokati Visha.
Deputeti socialist rrëfen në mënyrë shterruese se këto akuza në adresë të vëllait të tij riprodhohen vazhdimisht prej vitesh duke ju referuar një ngjarje të hershme me autoritetet italiane. Më tej, Xhafaj pasqyron në formë të plotë të gjithë profilin e të vëllait si dhe aktivitetin e tij familjar në qytetin bregdetar të Vlorës. Ish ministri i Brendshëm tregon edhe për ikjen e vëllait të tij drejt Italisë.
Në pjesën e fundit, z.Xhafaj rrëfen edhe motivet e dorëheqjes së tij nga posti, duke argumentuar se nuk kanë patur asnjë lidhje me skenarin e Partisë Demokratike. Ai shpjegon edhe cila ka qënë mbështetja e ndërkombëtarëve në vite dhe si është kjo marrëdhënie aktualisht. Cili është qëndrimi brenda maxhorancës në çështjen Babale dhe roli i Ramës, Metës, Bashës dhe Berishës.
Më poshtë po pasqyrojmë intervistën e plotë me z.Xhafaj, e cila u publikua në katër numra të gazetës DITA nga 4 deri në 7 mars.
Z.Xhafaj, së fundmi gjykata ka dhënë vendimin për çështjen “Babale” e cila shkaktoi një furtunë jo të vogël sulmesh ndaj jush. Tashmë që gjithçka duket e sqaruar për opinionin publik, si ndjeheni ju personalisht?
Gjithçka nisi mbi të dhëna false, vijoi të shfrytëzohet politikisht nga njerëz fals dhe u besua po nga ata individë fals që e krijuan atë. Të jem i sinqertë edhe pas vendimit sërish nuk jam krejtësisht i qetë, pasi fatkeqësisht kuptoj se kur një grusht gënjeshtrash politike depërtojnë në jetën e një ligjvënësi dhe për më tepër në funksionin e ministrit të Brendshëm, imagjino se çfarë ka ndodhur me qytetarët e zakonshëm të cilët shpeshherë ndeshen me pasojat që prodhon politika e baltës, shpifjeve e fyerjeve.
Që në datën 14 maj 2018 ne kemi këmbëngulur në pavërtetësinë e atij audio-regjistrimi montazh dhe kemi kërkuar që kjo të çertifikohet ligjërisht dhe të ndëshkohet. Ndëshkimi apo edhe burgimi i personave fajtorë nuk është ajo që çliron shpirtin tonë në këtë rast, por çdo ndëshkim ka vlerën e vet edukuese dhe shpresoj që edhe me kaq procesi ta ketë bërë punën e tij, të ketë dhënë mesazhet e duhura njerëzore dhe politike.
Kemi vërejtur që ju prej një kohe shumë të gjatë, nuk jeni përfshirë në asnjë formë dhe në asnjë moment në diskutimet dhe debatet publike, në lidhje me hetimin dhe gjykimin e kësaj çështjeje. Pse përcjellja e kësaj historie është bërë me kaq qetësi nga ana juaj?
Kjo nuk ka qenë beteja ime ligjore, por e vëllait tim që akuzohej nga disa persona që kishin prodhuar një kallëzim të rremë ndaj tij, natyrisht me objektiv mua. Në respekt të ligjit, përmes avokatit, ai kërkoi me iniciativë hetimin e plotë të kësaj çështjeje për të shkuar te e vërteta. Natyrisht që ka qenë e njohur dhe çdo ditë u bë edhe më e qartë se në këtë proces, e jo vetëm, tabela e qitjes ishte im vëlla, por objektivi real isha dhe mbetem unë.
Vëllai im dhe historia e tij, u përdor për qëllimin e vërtetë të këtij sulmi, goditjen ndaj meje si drejtuesi i reformës në drejtësi dhe si ministër i Brendshëm. E bën të dhimbshëm, të pamoralshëm dhe të pisët këtë proces, fakti që për të shkatërruar imazhin e kundërshtarit tënd politik, për ta shantazhuar atë në funksionin e tij shtetëror, angazhohen përmes fabrikimit të provave të rreme strukturat e një partie politike që synon të qeverisë vendin.
Përse kjo zgjedhje?
Më duhet të theksoj se edhe interesi im dhe i familjes sonë, ishte që revoltën dhe pakënaqësinë për këtë goditje të rëndë, ta kanalizonim përmes institucioneve dhe ligjit. Shpresojmë t’ia kemi arritur. Sjell në vëmendje fjalën time të parë në Kuvend pas akuzave ku kam theksuar se: “Jam njeri i ligjit dhe do të pres me qetësi institucionet e ligjit të bëjnë detyrën konform ligjit. Jam zyrtar i shtetit dhe më duhet të respektoj dhe të pres me durim veprimin dhe përfundimet e institucioneve të shtetit”.
I kam qëndruar deri në fund besnik këtij qëndrimi publik dhe në respekt të institucioneve të vendit tim, nuk kam reaguar edhe kur jam provokuar, sulmuar apo goditur deri te njerëzit më të shtrenjtë, ku njerëz pa asnjë kufizim dhe princip moral, helmatisnin opinionin publik me lloj-lloj shpifjesh në përpjekje për të sfumuar të vërtetën.
Sa i papritur ka qenë për ju lajmi mbi audio-përgjimin? A menduat për një moment që ai mundet të ishte i vërtetë, apo që në dëgjimin e parë të materialit nëpërmjet medias ju konstatuat se zëri nuk ishte ai i vëllait tuaj?
Sipas disa të dhënave që kam pasur, më rezultonte se prej disa kohësh disa individë dhe segmente të caktuara, po përpiqeshin të inskenonin ngjarje e situata që të më kompromentonin mua më së pari. Mbasi kërkuan rreth meje dhe nuk gjetën gjë, si “urithi” tentuan të përndjekin familjarët e mi, tek të cilët gjithashtu nuk arritën të gjenin ndonjë provë kompromentuese. Madje mund t’ju them se ka pasur edhe individë që kanë dashur t’i komprometojnë të afërmit e mi, të cilët falë zotit ju kanë rezistuar tundimeve. E kur nuk arritën gjë, e sajuan një të tillë.
Nuk pata asnjë dyshim për falsitetin e atij audio-regjistrimi të bërë publik nga PD-ja, që në momentin e parë që e dëgjova. Ishte e qartë që zëri nuk ishte i tim vëllai. Ai ka një specifikë të lindur në tingullin e zërit e duke qenë se ajo është shumë e dallueshme, nuk shfaqej kurrkund në zërin e transformuar në audio-regjistrim.
Familjarë të mi por edhe të tjerë miq që e njohin Agronin, më telefonuan menjëherë pasi dëgjuan materialin dhe më konfirmuan se ai zë vetëm me tim vëlla nuk kishte lidhje. Pavarësisht se më indinjoi shpifja, dua të them se kam qenë i revoltuar me autorët, por nga ana tjetër i qetë që në fillim në raport me të vërtetën.
Para se të hyjmë në disa detaje më të hollësishme, a mund të përmblidhni këtë që ka ndodhur se si e shihni në këndvështrimin tuaj?
Nuk besoj se ka nevojë për përshkrime të gjata. Është thjesht një film politik i ideuar, zhvilluar dhe montazhuar në çdo element të tij, në zyrat e SHQUP-it ku nën drejtimin e Lulzim Bashës dhe zbatimin e një aventurieri politik, u bë e mundur të kënaqet përkohësisht, veç një rreth i ngushtë që sot është edhe më i vogël. Edhe sikur ai audio-regjistrim të konsiderohej real qoftë edhe për një moment të vetëm, nuk ka asnjë provë apo fakt që implikon në asnjë aferë kriminale vëllanë tim, e jo më pastaj mua.
Kaq do të mjaftonte që këtu të mos kishte një çështje, e jo më hapësirë për të ngritur akuza ordinere dhe të investohej opinioni publik dhe organet e drejtësisë në një proces prej gati dy vjet hetimi e gjykimi, me shumë aktorë e faktorë dhe me interesa që bashkonin palë shumë larg njëra-tjetrës.
Cila është e vërteta e gjithë kësaj akuze të rëndë sipas jush?
Gjithë akuza, ashtu siç e dini mbështetet vetëm tek auto-regjistrimi i një individi, te thëniet e Albert Veliut apo të ashtuquajturit nga “regjisor” Basha, me emrin e artit “Babale”. Siç është provuar edhe në hetime, Albert Veliu ishte i njohur publikisht si mashtrues, me disa dënime penale mbi kurriz dhe që e këmbeu këtë aventurë me shpërblim financiar, me ndihmë për kalimin e paligjshëm të kufirit dhe mbështetjen për marrjen e azilit për të dhe familjen e tij nga Partia Demokratike.
Ata thonë “kemi një audio-përgjim të cilit i mungon pajisja origjinale e incizimit”. Pretendohet që është përgjuar me një pajisje në formë stilolapsi dhe prokurorisë i thuhet se ky stilolaps ka humbur. Po si mund të mos ruhet pajisja themelore në një përgjim, që është siguria e provës që ti pretendon se është shkatërruese për kundërshtarin?! Përgjigja është e thjeshtë: Nëse dorëzohej ajo kuptohej lehtë që s’ka asnjë bisedë, s’ka asnjë audio-përgjim sikundër u shit në publik, por thjesht një auto-regjistrim të inskenuar siç është në fakt.
Çfarë reflektohet nga kjo analizë?
Nëse analizojmë me kujdes rrethanat e bërjes publike të kësaj akuze, kohën e prezantimit të saj, personat e përfshirë në të, mungesën e fakteve më minimale dhe vetë kontradiktat e tyre në pohimet në kohë të ndryshme dhe nga njëri te tjetri etj, kuptohet qartë ky mashtrim i sajuar.
Këtë material audio-regjistrimi tërësisht fals, “e pasuruan” edhe me elementë “artistik” dhe e shfaqën si film për publikun, përmes disa individëve që të zhytur në mëkate e ligësi pafund personale apo familjare dhe përmes vetëpërdorimit të radhës, bënë shërbimin ndaj atyre që i keqpërdorën.
Këta të fundit, shpresuan se përmes helmit të tyre do të mund të ushqenin zemërimin qytetar, me besimin se shantazhi do të funksiononte për të shkatërruar imazhin tim si ministër, për të rënduar imazhin negativ të qeverisë, si dhe të Shqipërisë në ato momente përcaktuese për hapjen e negociatave me BE-në.
A ka një të vërtetë në sulmet e opozitës ndaj jush dhe përse u gjet pikërisht vëllai juaj, për ta ngritur gjithë këtë sulm ndaj jush?
Që në fillim po ju them se në gjithë këtë “tallava” politike, mediatike dhe ligjore, ka vetëm një fakt të vërtetë dhe vetëm një. Një histori të ndodhur para 18 vjetësh, një histori mjaftueshëm e njohur. Një ngjarje e vitit 2002 ku im vëlla në moshë të hershme, është përfshirë në një aktivitet në shkelje të ligjit. Vendimi i dënimit ka qenë një fakt i njohur publikisht prej vitesh.
Pikërisht këtë e rinxori sërish për ta shfrytëzuar PD-ja, si armë të vjetër për ta hedhur sërish në luftë. Përdori atë dënim të vjetër për të krijuar alibinë e re, me bindjen se kjo do të ngjiste më lehtë te publiku për sulmet ndaj meje. U përzgjodh im vëlla, e djeshmja e hidhur e tij, për t’u bërë “kurban” pa faj, por duke kërkuar “kokën” time si ministër i Brendshëm.
Çfarë doni të thoni me këtë?
Kjo është një histori e njohur dhe e stërnjohur, e shkruar dhe e stërshkruar, e akuzuar dhe e stërakuzuar, për shkak të angazhimit tim politik. Është vetë kjo forcë politike e cila e ka risjellë në diskutime publike sa herë që ka pasur interesa politike ndaj meje. Kështu ka ndodhur në vitet 2002, 2010, 2017 dhe 2018, kur për të njëjtën gjë janë zhvilluar akuza dhe debate publike. Ju rikujtoj se në vitin 2002, ende pa e ditur askush në Shqipëri këtë ngjarje, unë personalisht kam kërkuar dorëheqjen si ministër.
Është e njëjta akuzë që është adresuar ndaj meje edhe kur isha në opozitë dhe këta në pushtet, edhe kur isha në krye të reformës në drejtësi, edhe kur isha ministër i Brendshëm. Në çdo rast prej 18 vjetësh publikisht kam pohuar vërtetësinë e këtij fakti dhe kam kërkuar të trajtohet si një dhimbje familjare, duke synuar rehabilitimin e tij shpirtëror si për çdo shtetas tjetër, e për më tepër të asaj moshe dhe me atë lloj implikimi. Pavarësisht kësaj, ka ndodhur krejt e kundërta. Gjuetia e shtrigave ka bërë punën e saj, ku sa herë që është dashur të sulmohem unë, është rinxjerrë nga arkivi kjo histori.
Po atëherë z.Xhafaj, pse u risoll sërish nga opozita kjo tezë dhe përse u zgjodh pikërisht ai moment kohor? Cili ishte qëllimi sipas jush?
Megjithëse ishte një akuzë e dalë boje, në pamundësi që të ngrinin një akuzë bindëse ndaj meje që të lidhej me punën time si politikan aktiv dhe si zyrtar në disa funksione të larta, ata nxorën përsëri të njëjtën histori. Kësaj radhe për ta bërë më të prekshme dhe më të besueshme për sulmet, fabrikuan një audio-regjistrim të turpshëm, i cili u hetua për rreth një vit e gjysmë nga prokuroria, gjykata, media dhe padyshim edhe nga vetë opinioni publik e sidomos ai i Vlorës ku përfshihet kjo ngjarje.
U bënë me qindra orë përgjimi me urdhër të gjykatës, rreth 30 dëshmitarë dëshmuan në hetim e gjykim për maskaradën e organizuar nga PD-ja, duke përfshirë dy kriminelë me precedentë penal. Sërish, pavarësisht këtij hetimi të thelluar, nuk u gjend asnjë provë e vetme, që mund të implikonte vëllanë tim në një veprimtari kriminale në këto vite sikundër pretendohej.
Po pse në atë moment?
Ky ishte momenti kur reforma në drejtësi sapo kishte nisur zbatimin e saj dhe kundërshtarët politikë të saj dhe sidomos ata në lidershipin e opozitës aktuale, nuk mund ta linin pasdore hakmarrjen ndaj meje. Gjithashtu në atë hark kohor, në funksionin tim si ministër po shfaqeshin disa veprime të forta në luftën kundër krimit dhe mentorëve të tij me disa suksese të prekshme për publikun dhe të mbështetur fort nga ndërkombëtarët.
Këtu kujtoj veçanërisht çrrënjosjen e fenomenit të kanabisit dhe goditjen e disa grupeve/organizata të strukturuara kriminale. Kam qenë i vetëdijshëm për kundër-reagimin e tyre ndaj meje.
Të jem i sinqertë, kurrë nuk do ta kisha menduar se vullneti shkatërrues, denigrues dhe pervers i një grupi politik, do të shkonte deri në këto nivele sa të kthente fabrikimin e provave dhe shantazhin në sjellje zyrtare duke bashkëpunuar me elementë kriminal, keqpërdorur institucionet e shtetit dhe duke mashtruar kaq hapur e kaq paturpësisht publikun.
Siç është provuar qartë tashmë, ligësia politike dhe njerëzore e një grupi të opozitës dhe interesat meskine të tyre, u bënë bashkë me interesa të grupeve kriminale dhe subjekteve të caktuara, brenda e jashtë sistemit të drejtësisë së kalbur.
Kur flisni për përfshirje të elementëve kriminalë, çfarë keni parasysh?
Ajo çfarë më solli më shumë keqardhje në këtë histori, ishte unisoni në qëllim, në sulmin kundër meje, midis këtij grupi të opozitës dhe disa individëve me procedentë të njohur kriminal. Kështu përshembull, disa prej atyre që kanë pasur detyrën e shoqërimit dhe strehimit për Alizotin, Babalen dhe familjen e tij, në Tiranë dhe më pas në Bruksel, janë persona të skeduar nga policia si individë me precedentë penalë.
Ndonjëri prej tyre edhe i përfshirë në një nga ngjarjet e bujshme kriminale të asaj periudhe për trafikim narkotikësh. Pa vazhduar më tej me përfshirjen e disa elementëve të tillë, në mbajtjen gjallë të sulmeve ndaj meje dhe familjes sime në disa media, sidomos pas largimit tim nga detyra e ministrit.
Ish-deputeti Salianji dhe avokatët e tij kanë pretenduar se midis vëllait tuaj dhe “Babales”, kishte një lidhje të afërt miqësore dhe bashkëpunim për aktivitete kriminale. Çfarë dini ju për këtë gjë?
Miqësia dhe njohja nuk janë e njëjta gjë. Për fat të keq janë të dy banorë të të njëjtit qytet, pavarësisht se ju përkasin origjinave të ndryshme dhe historive e karaktereve krejt të kundërta. Ky është një fakt i njohur mirë në atë qytet, megjithëse “ustallarët” që e mësuan, i qepën një alibi të keqe: Babalja gjoja e bëri këtë gjë për “Hakmarrje” dhe i sajuan disa “fakte” që nuk ekzistojnë.
Skeda kriminale e Albert Veliut është shumë e pasur në disa vepra penale dhe e shtrirë ndër vite, ku asnjë prej tyre nuk ka sesi të lidhet, qoftë edhe indirekt me tim vëlla. Edhe sepse nga viti 2002 e këtej im vëlla ka jetuar në Shqipëri.
Ndërkohë, siç ka rezultuar nga tabulatet telefonike të administruara në dosjen hetimore gjatë gjithë vitit 2017, midis tyre ka vetëm 4 thirrje telefonike të matura me sekonda (përkatësisht 69, 121, 20, dhe 29 sekonda). Të gjitha janë thirrje të bëra nga Albert Veliu dhe që të katërta të bëra në muajin tetor dhe jo rastësisht.
Ishin në përgatitje të këtij skenari, për inskenimin e audio-regjistrimit. Ndërsa gjatë vitit 2018, asnjë komunikim midis tyre. Si mund të kesh lidhje, komunikim, bashkëpunim dhe për më tepër veprimtari kriminale të këtij niveli, me dikë që nuk ke pothuajse asnjë lloj kontakti?!
A ka pasur një takim midis “Babales” dhe vëllait tuaj, siç pretendohet nga Salianji dhe mbrojtja e tij? Cilat janë argumentet që sipas jush, e rrëzojnë këtë fakt?
Ndryshe nga sa pretendon Salianji dhe avokatët e tij, prokuroria ka administruar në dosje të gjitha komunikimet telefonike të tim vëllai dhe Albert Veliut (Babales) përgjatë viteve 2017 dhe 2018, si dhe specifikisht për datën e pretenduar që është bërë takimi.
Një gënjeshtër e madhe është pretendimi i ngritur se më datën 24 tetor 2017, ka ndodhur një takim midis Albert Veliut dhe Agronit në lokalin e këtij të fundit dhe aty qenka bërë dhe regjistrimi. Provat dhe faktet e administruara në dosjen hetimore të prezantuara në gjykim, provojnë të kundërtën dhe për mua ato vlejnë më shumë se deklaratat politike të kuzhinës së SHQUP-it.
Në dosjen gjyqësore, nga analiza e qelizave telefonike të asaj dite (24 tetor 2017), kur është pretenduar për takimin dhe regjistrimin e bisedës, rezulton qartazi se në asnjë moment të asaj dite, telefonat e këtyre dy personave nuk kanë loguar njëkohësisht në të njëjtin orar dhe në të njëjtin vend.
Katërcipërisht është e provuar me fakte konkrete se ky takim, nuk është zhvilluar. Mjaft të shohësh skemën e lëvizjes së këtyre personave sipas antenave telefonike të botuara edhe nga ju si media, dhe e kuptoni lehtësisht këtë gjë.
Po pretendimet e gazetarit Jetmir Olldashi?
Gazetari Jetmir Olldashi i cili pretendon se ka bërë një “investigim të madh” së bashku me “Babalen”, si në hetim dhe në gjykim, në asnjë rast nuk ka provuar dot një takim të ndodhur dhe të verifikuar prej tij. Të dyshuarin kryesor sipas tij, pra tim vëlla, as e ka parë dhe as nuk e provon dot nëse është takuar me “agjentin” e tij “Babale”.
Vetë “Babalja”, personi që na paska bërë regjistrimin, në deklarimin e tij në prokurori, në një ndër versionet e paraqitura ka pohuar se takimi na qenka bërë në orën 17:30, te lokali i tim vëllai në Vlorë. Ndërkohë që sipas qelizave telefonike në këtë orë, “Babale” me “Olldashin” janë rrugës duke u kthyer nga Vlora për në Tiranë dhe pikërisht në atë orë kanë qenë në unazën e madhe të Tiranës, ndërsa im vëlla gjendej në Lushnjë!!
Nga ana tjetër, vetë Salianji dhe Olldashi por edhe avokatët e tyre, kanë deklaruar në gjyq krejt të kundërtën duke pretenduar se takimi na qenka zhvilluar në orarin 12:30 – 13.45, te lokali i vëllait tim në qytetin e Vlorës. Kësaj i thonë “I zoti se jep, tellalli e shet”. Gjithësesi edhe nëse do duam të pranojmë versionin e tyre dhe jo të mikut të tyre Babale, tabulatet dhe qelizat telefonike provojnë krejt të kundërtën.
Në të njëjtin orar që vetë pretendojnë se është kryer takimi dhe regjistrimi, rezulton se sipas qelizave telefonike, antenave ku telefonat e tyre kanë loguar, vendndodhja e Babales dhe Olldashit është shumë larg nga ky vend. Konkretisht ata të dy në orën 12:46 gjenden në Orikum, në orën 13:47 kanë mbërritur te Marina në Lungomare dhe në orën 14:22 gjenden rrugës në Mifol, në dalje të Vlorës.
Ndërkohë që sipas skemës së publikuar edhe nga ju si media, qelizat telefonike për tim vëlla, vërtetojnë krejt të kundërtën. Ai në orën 12:45 gjendet në Vlorë (konkretisht te ish-fabrika e Orizit), në orën 13:45 në dalje të qytetit dhe në orën 14:27, antenat e telefonit e tregojnë në qytetin e Fierit, d.m.th rreth 40 km larg nga vendtakimi i pretenduar.
Në dijeninë tuaj, a ka pasur komunikim mes tyre para këtij orari?
Kjo është edhe më interesantja. Që të fiksohet një takim, normalisht duhet komunikuar paraprakisht me personin. Gazetari “i madh investigativ” në deklarimet e tij publike, por edhe në prokurori e gjykatë, ka pohuar se pasi Babalia ka komunikuar me Agronin, kanë caktuar një takim i cili sipas Olladshit, na qenka zhvilluar në orarin 12:30 – 13:45, te lokali i tij në qendër të Vlorës.
Mirëpo siç rezultojnë nga tabulatet e administruara në dosjen hetimore dhe bërë publike në gjykatë, nuk ka asnjë komunikim midis Babale/Olldashit dhe Agronit para këtij orari. Kjo telefonatë ka ndodhur, por kur Babale ka telefonuar Agronin, ka qenë ora 14:27, pra shumë mbas orarit të pretenduar për një takim/regjistrim të mundshëm dhe qelizat telefonike tregojnë se këta dy njerëz ishin në pika lëvizjeje të ndryshme.
Njëri (Babale) sapo ishte larguar nga Vlora në Mifol, dhe tjetri (Agroni) në Mbrostar Ura në Fier duke shkuar në drejtim të Lushnjës. Pra asnjë fakt i pretenduar nuk lidhet fare me tjetrin. Mjaftojnë këto detaje për të kuptuar se është një gënjeshtër e madhe nga çdo anë.
Siç shihet rezulton e provuar qartë, me fakte konkrete nga analizimi i të gjithë të dhënave, se më datën 24 tetor 2017, nuk ka pasur asnjë lloj takimi midis “agjentit” Babale dhe tim vëllai, siç është pretenduar në skenarin e SHQUP-it dhe është thënë e stërthënë nga papagallët e tyre publikisht, çka do të thotë se bie edhe vetë thelbi i “akuzës” së pretenduar përmes filmit montazh të tyre.
Sipas jush, përse u përfshi Albert Veliu në këtë histori sa të sajojë një ngjarje të tillë me natyrë kriminale dhe aspak njerëzore? Cili ka qenë përfitimi i tij nga ky shërbim i kryer?
Ideuesit e këtij fabrikimi duhet thënë se e kanë një meritë. Kanë gjetur “agjentin” e përshtatshëm për ta, që përputhej me skenarin, aktorët, skenaristin dhe me regjisorin e filmit. Ishte pikërisht ky mashtrues ordiner i keqpërdorur nga një grup mashtruesish parapolitik, që plotësonte të gjitha karakteristikat për të luajtur në këtë produksion të SHQUP-it. Siç ka rezultuar nga provat e mbledhura në dosjen hetimore dhe në shqyrtimin gjyqësor, në këmbim të audio-regjistrimit, Babales i janë premtuar para dhe azil politik për të dhe familjen.
Këtë e provuan qartazi tabulatet e interceptimeve telefonike, ku në disa të tilla ai e pohon haptas këtë gjë. Lexoni me kujdes pohimet e tij të zbardhura nga komunikimet telefonike të datave 19, 21, 22, 23, 24 dhe 27 maj me familjarët dhe vetë bashkëpunëtorin e tij Fredi Alizoti, për ta konstatuar lehtë këtë gjë.
Tani si mendoni ju, mund ta refuzonte një shans të tillë për disa mijëra euro dhe përfitim të azilit për familjen në Bruksel një njeri me këtë profil, me disa precedentë penal, dënuar disa herë për mashtrim, i papunë që e shtynte ditën duke kërkuar rrugëve “hua” 500 apo 1 mijë lekë të reja dhe që nuk udhëtonte dot jashtë, se kishte urdhër ndalimi për hyrje në vendet e BE-së?!
Si provohen sipas jush lidhjet e Babales me eksponentë të PD-së dhe posaçërisht me ish- deputetin Salianji?
Pohimet e vetë Salianjit në prokurori dhe në gjykatë, dëshmitarët e shumtë të pyetur dhe veçanërisht komunikimet telefonike të administruara, dëshmojnë për lidhje të shumta e të ngushta midis Salianjit dhe Babales. Gjithashtu, edhe të këtij të fundit me eksponentë të tjerë që ishin ngarkuar për realizimin e këtij skenari.
Ka qenë vetë “heroi i Bashës” ai që e ka orientuar “agjentin” e tij Babale, në realizimin e këtij aktiviteti kriminal, gjë që provohet edhe nga vetë komunikimet midis tyre (Salianji – Babale) e sidomos ato në muajt tetor dhe më pas në nëntor, kur është ritentuar përsëri një inskenim tjetër po tashmë përmes segmenteve politike të PD-së në prokurori dhe SHISH.
Nga të gjitha dëshmitë rezulton se Babale u strehua në selinë e PD-së, si të ishte në habitatin e tij ku rrinte, ushqehej dhe po aty është takuar me të gjithë eksponentët e PD-së, përfshi dhe kryetarin e komanduar të PD-së, me të cilin ndan edhe pasionin për gënjeshtrën. Është provuar nga përgjimet e Babales, por edhe nga deklarimet e vetë Salianjit se është PD-ja që e ka ndihmuar atë dhe familjen e tij që të kalojë kufirin dhe më pas të kërkojnë azil, fillimisht në Kosovë dhe pastaj në Belgjikë.
Nëse do të hetohej më shumë, do të rezultonte se e kanë ndihmuar të pajiset edhe me dokumente false për të udhëtuar nga Kosova në Bruksel. Pa përmendur edhe përgjimet e zbardhura ku flitet për angazhimin e drejtpërdrejtë të Bashës dhe Salianjit, për të udhëzuar dhe mbështetur familjen e Babales për përfitimin e statusit të azilantit politik. E shihni rreth çfarë boshti komik rrotullohet kjo forcë politike?!
Ndërkohë ka disa pohime të vetë Babales të bëra publike…
Ka një analizë tjetër shumë të rëndësishme dhe kuptimplotë për të kuptuar profilin e këtij “personi kyç” të skenarit të PD-së: “Kontradiktat e pohimeve të tij”. Janë një tërësi gënjeshtrash që edhe si të tilla, nuk lidhen dot me njëra-tjetrën. Tjetër gjë thuhet në filmin e shfaqur nga SHQUP-i, tjetër gjë në intervistën e Babales po në SHQUP, dhe krejt ndryshe në intervistën e dhënë po prej tij nga Kosova.
Gjithë këto orientime të regjisorit as kanë fare përputhje me të vërtetën e shprehur prej Babales në përgjimet e zbardhura nga komunikimet telefonike, e sidomos ato me familjarët e tij dhe me Alizotin. Gjithashtu ai (Babalja) në pohimet e bëra gjatë pyetjes në prokurori dhe në komunikimet telefonike, thotë krejt të kundërtën me çfarë ka deklaruar publikisht në intervistat e orientuara dhe të kontrolluara prej regjisorit e skenaristit të telenovelës “Babale”.
Xhafaj, sipas jush cili është roli i Fredi Alizotit në këtë histori, një person shumë i kontestuar, madje i konsideruar shpesh edhe si një dëshmitar i sajuar?
Albert Veliu, apo “Babalja” siç i pëlqen Lulzimit ta thërrasë, fillimisht arriti të nxisë ekstazën te PD-ja se ai kishte mundësinë t’ju jepte provën për të shkatërruar ministrin e Brendshëm, përmes implikimit në aktivitet kriminal të vëllait të tij. Meqë ai nuk arriti ta sjellë këtë provë me tentativën e bërë më 24 tetor së bashku me Olldashin (mikun tjetër të Salianjit), ku prodhoi veç një parodi mashtruese, atëherë PD-ja vendosi ta ripërdorë “agjentin” e saj me ndihmën e grupit militant të saj në Prokurorinë e Krimeve të Rënda dhe në SHISH, me të cilët u tentua një tjetër tentativë për përgjim në periudhën 23 – 26 nëntor 2017 në Vlorë. Siç u provua në seancë edhe kjo rezultoi një tentativë e dështuar.
Në këto rrethana, i gjendur nën presionin e Salianjit që me këtë spekulim priste të shihte lavdinë e tij në strukturat e PD-së dhe i joshur nga premtimet financiare dhe mundësia për përfitim azili për familjen, Babale vendosi të bëjë hapin tjetër duke e sajuar një përgjim. Për këtë qëllim, në janar të vitit 2018, joshi në këtë aventurë edhe mikun e vjetër Fredi Alizoti.
Jo veç se kishte besim, por edhe se siç është provuar nga ekspertiza britanike, ai kishte një zë gati të ngjashëm me Agronin. Fredi Alizoti i revoltuar se ndryshe nga Babalja nuk po shpërblehej për shërbimin e bërë me regjistrimin e zërit në audion e fabrikuar, pasi u zbulua kjo gjë nga përgjimet e komunikimeve të Babales me të, u vetëparaqit në prokurori duke dëshmuar të vërtetën e fabrikimit të audio-regjistrimit.
Në këto rrethana, duke parë diskretitimin publik të akuzës së saj, PD-së padyshim i nevojitej një alibi publike për të rrëzuar një prej provave kyçe në këtë proces që ishte dëshmia e këtij personi që mori pjesë në fabrikimin e audio-montazhit duke imituar zërin e Agronit, duke pretenduar se: “Alizoti është dëshmitar i krijuar nga prokuroria, Xhafaj dhe Rama”.
Atëherë, cilat janë argumentet tuaja për këtë akuzë të palës tjetër?
Kjo është një alibi që nuk rri fare në këmbë për shumë arsye. Në mënyrë të pakundërshtueshme, me prova dhe fakte të administruara në proces, provohet qartazi se Alizoti është pjesë e intrigës së audio-regjistrimit dhe nuk është një dëshmitar i sajuar. Ka disa fakte të njohura dhe të pranuara gjerësisht (edhe nga PD-ja për një pjesë të tyre), që duhet të sillen në vëmendje në lidhje me Babalen e Alizotin, si dhe marrëdhëniet respektive midis tyre. Konkretisht:
(a). Ka patur një raport të ngushtë miqësor me Albert Veliun (Babalen) dhe familjarët e tij. Babale dhe Alizoti vetëm në 6-mujorin e parë të vitit 2018, kanë rreth 419 thirrje telefonike midis tyre;
(b). Vetëm 3-4 ditë pas publikimit të audio-regjistrimit dhe shumë ditë përpara se Alizoti të vetëdorëzohej në polici, ai dhe Babale flasin në telefon dhe nga përmbajtja e bisedave qartazi del që kanë pasur një marrëveshje për realizmin e audio-regjistrimit;
(c). Si Babale, ashtu edhe Alizoti në një mënyrë apo në një tjetër, kanë pasur në kohë të ndryshme kontakte/takime me përfaqësues të lartë të PD-së dhe/ose me anëtarë, apo simpatizantë të kësaj partie;
(d). Nuk rezulton që Alizoti të ketë kontakte me Agron Xhafaj apo me persona të lidhur me të dhe ca më shumë me ata që pretendohet se e paskan sajuar atë.
Ka edhe një tjetër fakt shumë domethënës që e shkërmoq pretendimin e PD-së se Alizoti është një dëshmitar i sajuar në këtë çështje. Alizoti ka dalë në përgjimet telefonike, duke komunikuar me Babalen në ditët menjëherë pas publikimit të audio-regjistrimit. Babale është vendosur nën përgjim më 17 maj 2018 dhe që në bisedat e para të regjistruara, ka dalë komunikimi me Alizotin.
Në përgjimin e një bisede të zhvilluar më 18 maj 2018, ora 21:14, ka rezultuar se Alizoti fliste me Babalen për shpërblime të pritshme për punën e bërë së bashku. Pra vetëm 4 ditë nga bërja publike e audios dhe daljes në skenë të “dëshmitarit X”. Ky lloj komunikimi ka qenë i përditshëm në vazhdim midis tyre.
A faktohet kjo në përgjimet e administruara në dosje?
Është plotësisht e provuar ndër të tjera edhe nga komunikimet që vetë Alizoti ka pasur me Babalen se Alizoti ishte pjesë e këtij audio-montazhi. Përmbajtja e shumë bisedave të bëra midis Babales dhe Alizotit nga data 18 maj e në vijim, konfirmojnë raportin e tyre të ngushtë e miqësor. Ata flasin me shqetësimin që nuk po ju mbaheshin premtimet e bëra nga PD-ja dhe posaçërisht nga Salianji, por edhe për premtimet e bëra për përfitime financiare apo për azilin në një nga vendet e BE-së. Gjithashtu, ata flasin edhe mbi kujdesin që duhet të tregonin për të mos komunikuar në telefon mbi këtë çështje.
Në të gjithë këto biseda Babale, por jo vetëm ai, jo veç që nuk ja kundërshton Alizotit pretendimet për përfitimet e premtuara, por përkundrazi e mbështet dhe e udhëzon se si duhet të veprojë, madje edhe se si të bëjë presion te PD-ja, për të marrë pjesën e vet dhe pastaj t’i bashkohet atij në azil. Kushdo që ka dyshime, mund të lexojë vetë përgjimet e zbardhura, pjesë të dosjes gjyqësore, tashmë të bëra publike.
Nëse sipas tyre Alizoti ka qenë një aktor i sajuar, atëherë i bie që me këtë lloj komunikimi midis tyre edhe “Babalen e ka sajuar qeveria”?
Po sigurisht me logjikën “babaliste” të SHQUP-it kështu duhet thënë. Por le të shkojmë edhe më tej. Rezulton se gjatë atyre ditëve, Alizoti ka qenë jo thjesht një frekuentues i rregullt i mjediseve të SHQUP-it, por edhe ka marrë pjesë në takime e kontakte të shpeshta me disa përfaqësues të PD-së. Fillimisht në shoqërinë e Babales dhe i prezantuar si “kunati” i tij.
Pas largimit të Babales, e njëjta histori me përpjekjet e bëra nga eksponentë të PD-së për ta zbutur lidhur me pretendimet e tij. Alizoti gjithashtu flet me këta në telefon dhe asnjë nga këta nuk i thotë as kush je ti dhe as pse je këtu, duke pretenduar për gjëra që s’kanë lidhje me ty!! Pastaj këta të PD-së kur nuk e njohin Alizotin dhe nuk i kanë ndonjë detyrim, përse kujdesen për strehimin e tij dhe e këshillojnë të mos flasë shumë lart e poshtë?!
Ka edhe një tjetër fakt të njohur tashmë publikisht. Alizoti në çdo seancë gjyqësore që ka pasur përballë Salianjin, ka ngritur gishtin ndaj tij duke i kujtuar shpërblimin prej 200 mijë euro të premtuara dhe duke akuzuar atë personalisht për këtë gjë.
E kur ky Alizoti paska qenë një aktor i sajuar nga qeveria dhe i akuzon për një shpërblim prej 200 mijë eurosh të premtuara nga Salianji, përse këta nuk kërkuan një veprim të thjeshtë procedurial gjatë hetimit dhe gjykimit?! Pse nuk kërkuan të bënin provën e zërit të Alizotit të cilin e kishin aty dhe në çdo kohë mund ta bënin këtë gjë?! Sepse mjafton të bënin këtë gjë, ku të provonin që ai nuk është zëri i pretenduar prej tij dhe gjithçka kthehej në pikën zero.
Nuk besoj se janë aq të paaftë avokatët e tyre që dërdëllisin ekraneve, sa të mos dinë edhe këtë mundësi të artë proceduriale. Po sigurisht se duke ditur të vërtetën, asnjë prej tyre nuk e kërkoi një gjë të tillë, madje tërhoqën dhe kërkesën e avokatit të Olldashit që kërkoi diçka të tillë në fillim të seancave gjyqësore. Këto janë vetëm disa nga prapaskenat të cilat ngritën tymnajën e madhe të gënjeshtrës rreth rolit të sajuar të Alizotit në këtë proces.
Nga ana e Salianjit dhe mbrojtjes, janë bërë publike disa komunikime të drejtuesve të policisë me Fredi Alizotin. Keni një koment për këtë?
I kam ndjekur dhe lexuar me vëmendje këto gjysma komunikime që Salianji i tundte nga njëra studio në tjetrën, si “prova të arta” për të vërtetuar alibinë që tentonte ta zhvlerësonte dëshminë e bashkëpunëtorit të tij Fredi Alizoti dhe ta paraqiste atë si dëshmitar të sajuar nga policia. Natyrisht edhe këto përgjime janë dhënë të cunguara për aq dhe si ju ka interesuar atyre. Në disa raste edhe të deformuara. Nga pikëpamja policore veprimet e drejtuesve të policisë së Fierit, janë tërësisht të rregullta dhe pa asnjë ngarkesë.
Provohet qartazi që është Alizoti ai i cili i ka telefonuar policisë dhe ajo thjesht ka bërë shoqërimin e tij në Prokurorinë e Krimeve të Rënda në Tiranë. Me vendim gjykate është urdhëruar përgjimi dhe mbajtja në vëzhgim fizik të Fredi Alizotit. Këtë fakt policia e ka ditur, padyshim edhe drejtuesit e policisë së Fierit, pasi në territorin e tyre zhvillohej kjo gjë. Si mund t’i lejonin vetes që të flisnin për punë lekësh në telefon me Alizotin, siç pretendohet nga Salianji, në një përgjim të njohur si fakt prej tyre, por që realizohej dhe administrohej jo prej tyre, por prej prokurorëve dhe oficerëve të policisë gjyqësore pranë Prokurorisë së Krimeve të Rënda?!
Duhet të jem korrekt me të vërtetën dhe të pohoj se nga pikëpamja etike ka diçka që nuk shkon në ato komunikime. Një kujdes i tepruar komunikimi dhe një lloj tolerance prej dy drejtuesve besoj se ka ndodhur nga shqetësimi për ta pasur nën vëzhgim Alizotin, siç ishte urdhëruar nga prokuroria.
Kjo pasi ky ishte banor i Fierit, por lëvizte shumë në drejtim të Tiranës dhe siç rezulton nga dosja hetimore ishte person i vështirë për t’u mbajtur nën vëzhgim. Natyrisht ka influencuar në këtë status të tij edhe presioni e frika mos i ndodhte gjë, ç’ka për vetë natyrën e çështjes, do ta rëndonte shumë situatën dhe përgjegjësinë e drejtuesve të policisë në këtë proces.
Z.Xhafaj, po ju a keni pasur komunikime me policinë për këtë gjë?
Personalisht kurrë dhe për asnjë arsye nuk kam komunikuar me drejtuesit e policisë së qarkut Fier për këtë histori dhe asnjë prej tyre nuk ka pasur me mua një komunikim jashtë marrëdhënies zyrtare, për çfarëdolloj motivi, gjatë gjithë kohës që unë kam ushtruar detyrën e ministrit të Brendshëm. Jo se e them unë dhe duhet ta besoni, por kjo është një gjë që dihet mirë në të gjitha strukturat e policisë.
Nëse kryeministri apo ministri i Brendshëm do të dëshironin të bënin një gjë të tillë që i kompromentonte rëndë, si mendoni ju se do t’ia besonin këtë operacion delikat drejtuesve vendorë të policisë së qarkut?! Mbase vetëm një budalla mund ta mendojë këtë gjë kështu. Po ka edhe budallenj kjo botë, ja si këta miqtë e Babales.
Po pretendimet?
Këta thonë që policët nën presionin e autoritetit tim, ishin përfshirë në këtë proces dhe unë isha “shefi i madh” që përmendet prej tyre dhe se Alizoti ishte dëshmitar i sajuar nga prokurorët e çështjes. Po ka një pyetje të thjeshtë për këtë alibi foshnjarake?!
Nëse unë jam i përfshirë në këtë version të krijimit të Alizotit si aktor, a nuk mund t’i thosha fare mirë drejtorit të policisë dhe zëvendësit të tij mos flisni në telefon sepse ky është në përgjim apo me dëshirë desha të lija gjurmë dhe ta shkatërroja aktorin e përzgjedhur nga Rama e prokuroria për të mbrojtur vëllanë tim?! Po vetë prokuroria që e paska sajuar këtë dhe që kontrollonte procesin e përgjimit, si e lejoi t’ju digjej kaq lehtë aktori i sajuar prej tyre dhe pastaj t’i linte këto “prova të famshme” si dhuratë për Salianjin dhe babalet e tij në PD dhe nëpër media?!
Atëherë, përse ndodhi që Alizoti u vetëofrua të dëshmonte në këtë proces?
Në proces është trajtuar si një hakmarrje e tij ndaj faktit që nuk i është dhënë shpërblimi i kërkuar. Në fakt nuk është tamam kështu. Siç del nga dosja hetimore, shtetasi Fredi Alizoti ishte në përgjim për shkak të lidhjes me Albert Veliun i cili ishte vënë në përgjim qysh në datën 18 maj me vendim gjykate.
Gjatë gjithë kohës në komunikimet e tyre është konstante frika nga zbulimi i së vërtetës dhe kujdesi për komunikimin. Në këtë pikë, rrethi ndaj tij ishte ngushtuar së tepërmi dhe si rrjedhojë e kësaj situate, por edhe mungesa e çdo shprese për një mbështetje pas largimit të Babales, e “detyroi” Alizotin të vetëdorëzohet në polici dhe të dëshmojë në prokurori pozicionin që kishte në këtë histori.
Natyrisht në këmbim edhe të mundësisë për një gjykim të shkurtuar dhe me shpresën për një dënim të lehtë. Gjë që nuk ndodhi në fakt as njëra dhe as tjetra. Alizoti, “aktori i qeverisë” (sipas Salianj & Co) e bëri procesin normalisht dhe u dënua me 2 vjet heqje lirie, të cilat i vuajti ditë më ditë.
Z.Xhafaj, një nga protagonistët kyç në këtë ngjarje ish-deputeti Ervin Salianji, pavarësisht vendimit vijon të jetë shumë aktiv në media dhe prononcime publike. Si e vlerësoni ju?
Gënjeshtra gjithmonë dihet që flet më shumë fjalë se e vërteta, por pavarësisht kësaj nuk mund ta zhbëjë dot. Është person i kapur në krim dhe padyshim do të dojë të mbrohet qoftë edhe përmes sulmit për të gjetur një shteg ku shpreson t’i shpëtojë forcës së ligjit, apo asaj të turpit. Nuk kam ndonjë koment apo vlerësim për deklaratat e tij, pasi është thjesht dhe vetëm një llafollog bosh pa substancë.
Kryesorja me një nivel mediokër profesional. Madje jam çuditur kur kam marrë vesh që qenka diplomuar si jurist. Mesa duket ka shumë gjëra të përbashkëta me kryetarin në detyrë të partisë së tij ku ndan pasione të njëjta, por veçanërisht shkëlqen vesi i gënjeshtrës.
Ai është modeli i keq i një politikani të ri i cili për të bërë karrierë në politikë, në mungesë të vlerave konkuruese, pranon të vetëpërdoret dhe të vetësakrifikohet. Ndaj nuk kam qenë fare i çuditur kur e shihja që bridhte ekraneve me një fytyrë që as zverdhej dhe as skuqej megjithëse gënjente ditën për diell.
Që Salianji është një shpifës ordiner, tashmë dhe i çertifikuar gjyqësisht, nuk përbën kurrfarë çudie kur kemi parasysh që shpifja është normë kryesore e sjelljes së lidershipit të asaj partie dhe një nga mjetet e përdorur më dendur në gjithë veprimtarinë e saj. Mjafton të kujtojmë se janë me dhjetëra vendimet gjyqësore, që kanë gjetur fajtorë dhe dënuar për shpifje, figurat kryesore të kësaj partie dje edhe sot.
Në këndvështrimin tuaj, cilat janë provat me faktet kyçe që e bëjnë Salianjin përgjegjës për këtë histori dhe fajtor për dënimin e dhënë ndaj tij? A mund të kishte ai dijeni se audio-regjistrimi ishte i fabrikuar, apo mos vallë është edhe ai peng i një rrengu të dy mashtruesve?
Salianji u mor i pandehur dhe u dënua nga gjykata me 1 vit burg me akuzën për kallëzim të rremë sepse ka vënë në lëvizje organet e drejtësisë për një krim të fabrikuar, me prova false dhe thjesht për motive politike. Ka një tërësi faktesh, aktesh, dokumentesh, indiciesh, interpretime të karakterit logjik të cilat në mënyrë shumë bindëse provojnë fajësinë e tij.
Ajo që shkon deri në kufijtë e qesharakes, përveç provave të dokumentuara janë vetë deklaratat kontradiktore të Salianjit që vërtetojnë këtë mashtrim të madh pa pasur nevojë për të shfletuar dosjen hetimore. Llafollogjia politike pa argumente ligjore dhe prova konkrete mund të joshë një simpatizant partie, por nuk mund të merret si fakt e provë. Ndërkohë, janë edhe përgjimet e komunikimeve mes Alizotit dhe Veliut dhe disa personave të përfshirë në këtë histori.
Ka pasur një mundësi të artë ky person për të provuar pafajësinë e tij. Mjafton të dorëzonte në prokurori pajisjen origjinale me të cilën është bërë përgjimi ose qoftë edhe USB-në ku është biseda e supozuar prej tij, si “e vërteta” mbi të cilën u ndërtua ky film. Por e kundërta ka ndodhur pasi siç dihet tashmë në prokurori është dorëzuar vetëm regjistrimi i shfaqur për median në selinë e partisë. Kjo sepse një përgjim real s’ka ekzistuar kurrë.
Cila është marrëdhënia e Salianjit me Albert Veliun dhe ku mbështetet kjo gjë?
Fillimisht në deklarimet e para, por edhe në vazhdim është përpjekur ta fshehë këtë marrëdhënie dhe ta prezantojë veten si “luftëtar” kundër krimit dhe Albert Veliun si kontributor. Janë disa pohime kontradiktore të tij kur është vendosur përballë provave konkrete, i pyetur fillimisht në prokurori dhe pastaj në gjykatë, si dhe një shumicë deklarimesh krejtësisht kontradiktore gjatë llafollogjisë nga studio në studio lidhur me marrëdhënien që ka pasur me Babalen.
Në fakt, e vërteta është se ka qenë Salianji ai i cili e ka përfshirë Babalen në këtë proces dhe e ka prezantuar me gazetarin. Jetmir Olldashi ka pohuar se “rreth muajit tetor 2017 e kishte kontaktuar një i njohuri i tij, që i kishte thënë se një mik i tij kishte të dhëna për trafikun e lëndëve narkotike në qytetin e Vlorës”.
Miku siç del nga komunikimet është dora vetë Salianji. Nga hetimet ka rezultuar se ishte po Salianji që e nxiti Babalen në muajin nëntor të shkojë në prokurori, ku ai duhet të riprovonte skenarin e SHQUP-it, pas dështimit në 24 tetor. Këto që po nënvizoj nuk janë hipoteza, por fakte konkrete që dalin nga tabulatet e komunikimeve të Babales me Salianjin, të cilat gjenden të dokumentuara në dosjen hetimore.
Salianji dhe mbrojtja e tij kanë theksuar se Prokuroria e ngre akuzën të mbështetur vetëm me dëshminë e një personi me precedentë penal dhe personalitet të shumëfishtë dhe se ai nuk e ka takuar asnjëherë, pra gjithçka e bazuar vetëm në deklaratën e Fredi Alizotit. Çfarë komenti keni?
Është shumë e ulët kur keqinformohet publiku pasi nuk është e vërtetë që bëhet fjalë vetëm për një dëshmi që prokuroria ka ngritur akuzën ndaj Salianjit. Ka qenë një proces i gjatë hetimor që ka evidentuar, dokumentuar dhe analizuar jo një, por një shumicë provash dhe faktesh argumentuese për akuzën e ngritur, tashmë të provuar e çertifikuar me vendim gjyqësor.
E vërtetë që Salianji nuk ka bashkëpunuar drejtpërsëdrejti me Alizotin, pasi atij i mjaftonte Babalja si bashkëpunëtor dhe si pikë kontakti. Se në cilin moment ai e ka mësuar se Alizoti ka qenë personi që ka bërë zërin e tim vëllai, këtë nuk di ta them. Nëse arsyeton mbi këto fakte, do duhet të kemi tre përfundime logjike.
Një version të bën të mendosh që në “ethe” për karrierë politike, Salianji ka pranuar ta bëjë këtë montazh dhe ta shesë si sukses politik në kuadër të luftës së egër brenda PD-së, ku përherë për mjediset e brendshme të partisë dhe jo vetëm, ai është parë si një prurje pa vlerë dhe me karakter të dobët.
Ndërsa versioni i dytë është që ky ka qenë aq budalla, sa ka rënë pre e një mashtruesi ordiner në mënyrën më të turpshme për një njeri me inteligjencë normale, e jo më për dikë që pretendon se është jurist.
Ndërkohë, ka edhe një version tjetër që për këta nuk ka rëndësi fare e vërteta, por qëllimi që kanë dashur të realizojnë në situatën e dëshpëruar që ishin si ekip drejtues dhe si individ.
Sa i përket personalitetit të Alizotit, askush nuk ka thënë të kundërtën se po të ishte njeri normal ai nuk do të bënte atë çka bëri. Nëse do ta shihni nga një këndvështrim më objektiv, në thelb treshja Salianji-Veliu-Alizoti, pavarësisht statusit shoqëror për atë çka përfaqësojnë, kanë të përbashkët personalitetin e shumëfishtë dhe faktin që janë mashtrues ordinerë, ku kanë humbur ngjyrat e fytyrës dhe karakterin e kanë lënë peng në mëkatet e tyre.
Cili është vlerësimi juaj për ekspertizën e kryer nga pala britanike?
Vlerësimi im është se ka qenë një ekspertizë korrekte pavarësisht se personalisht prisja më shumë prej tyre. Jo thjesht analizën gramatikore apo leksikore, por edhe atë të zërit. Gjithësesi ekspertiza i ka disa përfundime të qarta edhe për një njeri me inteligjencë normale për të kuptuar disa gjëra me rëndësi:
1.Regjistrimi (audio e bërë publike nga PD-ja) nuk është origjinal;
2.Materiali i audio-përgjimit (publikuar nga PD-ja) është i një cilësie shumë të dobët, me ndërhyrje, prerje dhe pa lidhje logjike komunikimi dhe nuk është materiali origjinal.
3.Cilësia e materialit të audio-përgjimit (publikuar nga PD-ja) nuk mundëson nxjerrjen e konkluzioneve kategorike;
4.Zëri i Fredi Alizotit është i ngjashëm me zërin e Agron Xhafaj.
…që do të thotë?
Pra ekspertiza në thelb provon qartazi atë që ne kemi theksuar në vijimësi qysh nga dita e parë e bërjes publike dhe në vazhdim. E para që audio-regjistrimi i bërë publik nuk është një regjistrim origjinal, por një montazh i bërë në zyrat e PD-së dhe se mjeti me të cilën është pretenduar se është bërë një regjistrim bisede nuk është dorëzuar se s’ka një bisedë të tillë të zhvilluar gjë që çoji në një montazh filmi nga kinostudio “PD e “RE”.
E dyta që pikërisht zëri i ngjashëm i Fredi Alizotit me atë të tim vëllai konfirmon faktin se përgatitësit dhe realizuesit e audio-regjistrimit, përdorën një person me zë të ngjashëm me atë të Agronit për ta bërë audio-regjistrimin të besueshëm për publikun kur kjo gjë të bëhej publike, të paktën në momentin e parë të efektit të saj.
Salianji dhe avokati i tij kanë pretenduar se mostrat e zërit të Agron Xhafaj nuk janë marrë sipas procedurës, janë marrë jo nga prokuroria, por nga policia, si dhe më shumë akoma janë marrë qëllimisht të një cilësie të dobët. Si qëndron e vërteta sipas jush?
Gënjeshtër e madhe. Agroni e ka regjistruar zërin e tij në mjediset e prokurorisë së Tiranës, në prani të dy prokurorëve dhe oficerëve të policisë gjyqësore, ku gjithçka është filmuar edhe me video si procedurë. Avokat Visha e ka sqaruar shumë qartë këtë gjë në intervistën e tij në “Real Story” më datën 19 dhjetor, duke theksuar edhe faktin se disponon procesverbalin e mbajtur për kryerjen e kësaj procedure sipas Kodit të Procedurës Penale si dhe regjistrimin video të këtij procesi, të realizuar në mjediset e prokurorisë së Tiranës më datë 15 maj 2018, pa praninë fare të oficerëve të policisë së shtetit.
Pastaj është edhe një gjë tjetër thelbësore për njerëz me logjikë profesionale normale. Në qoftë se pranon aktin e ekspertimit, nuk diskutohet më mënyra e prodhimit të këtij akti. Meqenëse edhe vetë Salianji dhe avokati i tij e kanë pranuar ekspertizën, atëherë duhet të bien dakord edhe për konkluzionet e mësipërme edhe pse mund të mos ju pëlqejnë ashtu edhe me mënyrën e prodhimit të këtij akti.
Pra, nuk mund të thuash jam dakord më ekspertizën e bërë dhe konkluzionet e saj, por materialet e dërguara e mbi të cilat është bërë kjo ekspertizë janë të falsifikuara. “Edhe kështu edhe ashtu” mund të ketë interpretime në deklaratat e Lulit, por jo për një ekspertizë shkencore.
Duhet theksuar se akti i ekspertimit zanor është një akt i përsëritshëm. Në qoftë se ka vërejtje dhe dyshime, atëherë merren mostra prapë. Ata ishin aty pjesë aktive e procesit dhe kishin të drejtë të kërkonin riekspertizë të zërit gjë që nuk e bënë. Siç ua thashë edhe më parë, mjaft të kërkonin të ribëhej ekspertiza e zërit të Alizotit (kampionin e të cilit mund ta merrnin në çdo kohë dhe si ta donin) dhe nëse ai përjashtohej, bëhej bindëse alibia e tyre.Nuk e bënë se e dinin mirë se çfarë çorbe kishin gatuar.
Ka patur një debat të madh rreth deklaratës së kryeministrit se kishte bërë ekzaminimin e zërit në materialin e audio-regjistrimit, të transmetuar në një laborator të një vendi partner perëndimor ku rezultoi se zëri i pretenduar si i vëllait tuaj, nuk ishte i tij. Pyetja që kam është, përse ju e bëtë këtë ekspertim? Cili ishte qëllimi, kishit dyshime?
Personalisht isha i bindur që ai nuk ishte zëri i tim vëllai. Natyrisht partnerët nuk mund të mbështeteshin në fjalën time, po në bindjen e tyre. Gjithashtu edhe vetë kryeministri. Një vend partner i rëndësishëm e mori përsipër këtë gjë qysh pasditen e asaj dite dhe brenda 48 orësh ka kthyer përgjigje. Me kërkesën tonë është bërë kjo provë zëri, ashtu siç kam mësuar konfidencialisht se kjo gjë është bërë edhe nga dy agjenci të tjera të vendeve partnere për qëllimet e tyre.
Natyrisht e gjitha ishte një gjë konfidenciale dhe e mjaftueshme për kryeministrin që të sigurohej për të vërtetën e pretenduar prej meje. Vetëm pas kësaj, ai ka dalë dhe e ka deklaruar publikisht. Në këtë dalje të parë ai ka folur vetëm për analizën e zërit dhe jo për faktin e një aktori të përdorur në këtë auto-regjistrim.
Termin aktor, pra të një personi që ka bërë rolin e tim vëllai në këtë audio-regjistrim fillimisht e kanë bërë publike mediat, kurse kryeministri në këtë kontekst e ka përdorur mos gabohem diku nga fillimi i tetorit, kur edhe Alizoti ishte vetëparaqitur në polici dhe kishte dhënë dëshmitë e para në prokurori.
Të tjerat janë abuzime nga llafollogët e PD-së kur u zbulua pisllëku i fabrikuar prej tyre. Kur këta fabrikuan një provë të tërë dhe ja shitën shqiptarëve për të vërtetë, tani kryeministri nuk kishte të drejtë të merrte informacion zyrtar për të mbajtur qëndrimin e tij publik?! E kundërta nuk do të ishte përgjegjshmëri, ndaj besoj se është bërë gjëja e duhur.
A duhej të kishte hetuar prokuroria për ekspertizën që u tha se bëri kryeministri i vendit dhe deklaroi se ishte regjistrim fals?
Kryeministri nuk bëri hetim penal, por siguroi një provë të nevojshme për të pasur garanci ai vetë në deklarimin e tij publik. Kjo ishte në detyrimin e tij dhe nuk përbën asnjë shkelje për hetimin. Është një gjë që ndodh rregullisht në raste të tilla kur jemi të detyruar që krahas hetimit penal, të kryhet edhe hetimi administrativ. Kreu i qeverisë nuk krijoi provë për prokurorinë, por për bindjen e tij dhe kishte të drejtë dhe detyrimin ta bënte këtë gjë.
Si i vlerësoni ju veprimet e prokurorisë në këtë hetim?
Nuk më takon mua ta bëj një gjë të tillë dhe nuk dua të përfshihem në këtë debat ashtu siç nuk jam përfshirë që në krye të herës. Veç një gjë e them me bindje: Nëse do ishin thelluar më shumë dhe nuk do ishin në trysninë e politikës dhe lidhjeve të tyre shoqërore, sot rrethi i personave të implikuar në këtë proces do të ishte shumë më i gjerë.
Si nga brenda PD-së, ashtu edhe nga personat e implikuar të institucioneve shtetërore apo prokurorisë, të cilët me veprimet dhe mosveprimet e tyre kanë shpërdoruar detyrën dhe kanë cënuar rëndë dhënien e drejtësisë. Prokuroria gjithashtu nuk veproi në kohë me arrestin e Babales dhe PD-ja bëri çmos për largimin e tij jashtë vendit.
Avokati i vëllait tuaj në këtë proces penal demostroi publikisht në një televizion kryerjen në Itali të një akti ekspertimi nga një eksperti i njohur i fushës, ku sipas së cilit rezultoi që zëri në audio-regjistrim nuk është i vëllait tuaj. A do të thotë kjo që ju keni bërë edhe një akt tjetër ekspertimi dhe përse u bë kjo?
Para së gjithash, është rasti të theksoj se avokati i zgjedhur nga vëllai im është një profesionist shumë i zoti, me personalitet dhe integritet të fortë, i cili padyshim është ndër më të mirët e kësaj fushe. Ashtu siç e ka deklaruar, ai ka pasur njohje të drejtpërdrejta me tim vëlla dhe padyshim ka pasur mendimin e tij personal për të.
Ai e ka pasur edhe vetë bindjen se Agroni ka një mënyrë krejt tjetër të foluri nga ajo e subjektit të pretenduar në audio-regjistrim. Përtej kësaj dhe për interesa të përfaqësimit ligjor të tij në këtë proces (megjithëse interesat e mbrojtjes nuk ja kërkonin), si një profesionist model ai vendosi ta bëjë edhe vetë provën e zërit.
Ka shkuar personalisht tek një nga ekspertët më të mirë italian në këtë fushë, ku ka bërë provën në një nga laboratorët më të njohur në Europë për këtë gjë. Madje, është një laborator aq i vlerësuar sa që përdoret si i tillë edhe nga vetë drejtësia italiane.
Ka kërkuar betimin e ekspertit para gjykatës italiane për vërtetësinë e dokumentit të lëshuar dhe legalizimin e përfundimeve të ekspertizës duke marrë garancinë e provës nga gjykata italiane. Edhe unë e kam një kopje të këtij akti, në të cilin konfirmohet se zëri në audio-regjistrim nuk është zëri i vëllait tim.
Si u përfshi Prokuroria e Krimeve të Rënda në këtë proces dhe cili konkretisht? A janë legjitime dhe të rregullta veprimet e tyre?
Përtej çfarë përdoret si alibi, është fakti i provuar se në 24 tetor nuk ka pasur një takim të Babales me tim vëlla. Për rrjedhojë as audio-regjistrim bisede. Në këto rrethana i motivuar në egon e tij dhe në kushtet e një premtimi të bërë tek shefat e tij, Salianji i ka kërkuar Babales të bashkëpunojë me Prokurorinë e Krimeve të Rënda dhe SHISH. Sigurisht pasi ka marrë premtimin e mbështetjes prej tyre.
Çfarë ndodh? Babalja një pasdite nëntori (23 nëntor 2017) është paraqitur “vullnetarisht” në Prokurorinë e Krimeve të Rënda, është mirëpritur krahëhapur te zyra e Drejtuesit të këtij insitucioni, prokurorit Hajdarmataj dhe siç ka pohuar edhe vetë në seancë, pa i marrë as edhe kartën e identitetit!! Në raste të tilla kur prokurori është para një të penduari për kryerjen e veprës dhe dëshiron të bashkëpunojë, ka rregulla tërësisht strikte se si veprohet dhe për më tepër kur çështja merr ngarkesë politike e publike.
…të cilat janë?
Verifikohet besueshmëria e denoncuesit, dokumentohet kallëzimi prej tij, nënshkruhet marrëveshja me prokurorinë përmes së cilës personi bëhet i infiltruari i prokurorisë në një aksion të karakterit hetimor dhe autorizohet me shkrim kryerja e veprimeve përkatëse konform ligjit. Asgjë e tillë nuk është bërë.
Është thirrur nga SHISH (drejtori Robert Tuci) dhe i është kërkuar të veprojë me një grup përgjimi në Vlorë mbi bazën e “denoncimit” gojor të Babales. Asnjë praktikë ligjore, asnjë shkresë dhe si një tufë të marrësh pas një të marri, shkuan drejt e në Vlorë.
Sigurisht edhe për të mos lënë gjurmë nëse nuk dilte gjë siç edhe ndodhi. Thjesht ata po zbatonin urdhrin e partisë si militantë besnikë në zyrat e shtetit. Siç kishin vepruar jo pak herë më parë. Tërësisht në shkelje të ligjit. Ekipi i përgjimit të SHISH ka qëndruar disa ditë në Vlorë.
Babalen e kanë pajisur me një përgjues dhe kanë pritur rezultat prej tij që pastaj ta formalizonin këtë si veprim të tyre. Gjithçka ka dështuar me sukses dhe e vetmja gjë që kanë marrë ka qenë një kërkesë e Babales për 1 mijë lekë të reja për të ngrënë një drekë, gjë që nuk kanë pranuar ta bëjnë, pasi siç deklaruan vetë në seancë gjyqësore, kanë kuptuar se kishin të bënin me një mashtrues ordiner.
Oficerët e thjeshtë nuk dinin se për cilin person bëhej fjalë se do të përgjohej dhe vetëm aty kanë marrë vesh rastësisht se bëhej fjalë për vëllain e ministrit të Brendshëm. Kjo ka detyruar eprorët e tyre të bënin më pas disa letra formale për ta justifikuar shërbimin e tyre duke e regjistruar si pjesë të një procedure për një dosje hetimore në një proces tjetër ku gjendej një person me emrin Agron nën hetim. Pra në çdo rast alibia ishte gati: Një ngatërresë emri, Agron për Agron!!
A ka të tjera detaje rreth kësaj?
Me insistim të SHISH, prokurori Hajdarmataj është detyruar të përpilojë një shkresë ku e ka justifikuar këtë veprim me një dosje të vitit 2016, ndërkohë që ishte nëntori i vitit 2017 dhe me subjekte pa asnjë lidhje me atë dosje. Pra një falsifikim i hapur përmes një praktike abuzive dhe me qëllime korruptive e ndjekur shpesh nga ky prokuror në atë periudhë.
Nëse Prokurori e kishte bërë veprimin në mirëbesim e në interes të luftës kundër krimit (!) siç tentoi të mbrohet në seancë gjyqësore dhe në fund rezultoi kështu siç ndodhi, ai kishte detyrimin të vepronte ndaj kallëzuesit mashtrues duke e vënë përpara përgjegjësisë për denoncim të paligjshëm. Kjo nuk ka ndodhur dhe nuk kishte si të ndodhte.
Hajdarmataj e grupi i tij në SHISH, kanë vepruar si shërbëtorë politikë të Partisë Demokratike dhe për rrjedhojë tërësisht në shkelje të ligjit dhe normave që rregullojnë veprimtarinë e organeve të tilla. A thua se nuk ishin në zyrat e shtetit dhe funksionarë që veprojnë sipas ligjit e rregullave, por një bandë e ulur në karriget e shtetit! A mund të imagjinoni se çfarë mund të kenë bërë individë të tillë në çështje të tjera kur këtë guxonin dhe e bënin me një familjar të ministrit të Brendshëm?!
Nëse është kështu siç ka pretenduar avokati i vëllait tuaj z.Visha, përse nuk ka një hetim nga ana e prokurorisë për këtë aspekt të procesit?
Ky është momenti më i pasqaruar dhe më i pistë i gjithë këtij procesi. Padyshim është një veprim i gabuar nga ana e prokurorëve të çështjes që nuk patën forcë ta bënin një gjë të tillë për shkak të lidhjeve të tyre shoqërore. Fryma e “korporatës” në sistem e bëri efektin e saj dhe kjo tregon se sipas tyre ligji, nuk është i njëjtë si për kolegun e tyre në shkelje ligji edhe për shtetasit e tjerë.
Gjithësesi, duhet thënë se kanë bërë një hap konkret në prokurorinë e Tiranës. Me insistimin e njërit prej prokurorëve, nga kjo çështje kanë ndarë për hetim të veçantë çështjen e shpërdorimit të detyrës që lidhet me prokurorin Hajdarmataj dhe drejtorin Robert Tuci të SHISH. Le të shpresojmë se do t’i shkohet deri në fund kësaj çështjeje. Ka vlerë për çështjen konkrete, por më shumë si një mësim për t’i dhënë fund praktikave të tilla negative në organet tona ligjzbatuese.
Ju personalisht z.Xhafaj, a jeni në dijeni të faktit që drejtor Tuci është një i afërm i një zyrtari të lartë të qeverisë Rama, në atë periudhë pjesë e stafit të afërt të tij?
Nuk e kam ditur më parë këtë gjë, por e kam mësuar gjatë procesit. Nuk jam interesuar të mësoj më shumë për një lidhje të tillë dhe as më intereson kur bëj analizën ligjore të asaj çfarë ka ndodhur. Natyrisht kam shpresuar se drejtori aktual i SHISH, me të cilin kam pasur një bashkëpunim shumë të mirë në ato pak muaj, do ta respektonte detyrimin e tij ligjor dhe institucional për ta bërë këtë analizë dhe të nxirrte përgjegjësitë përkatëse.
Një gjë të tillë do duhej ta monitoronte edhe zyra e kryeministrit për të verifikuar ligjshmërinë e procesit dhe për të bërë transparencën e duhur konform ligjit. Më së paku e kishte dhe e ka detyrim ligjor këtë gjë dhe për më tepër kur bëhej fjalë për ministrin e Brendshëm të asaj qeverie!!
Pra sipas jush Prokuroria e Krimeve të Rënda dhe SHISH janë përfshirë me përgjime të paligjshme në këtë histori. Cili ka qenë përfundimi i tyre dhe përse ka kaq rëndësi për çështjen?
Një përgjim krejt i paligjshëm dhe në kundërshtim me Kodin e Procedurës Penale dhe me rregullat përkatëse të SHISH. Pra shkurt, falsifikim i dokumenteve zyrtare dhe një shpërdorim i pastër i detyrës në funksion të një operacioni politik që rezultoi një vrimë në ujë.
Ky implikim kaq i rëndë i disa individëve dhe segmenteve të strukturave të shtetit, dëshmon ndër të tjera qasjen e opozitës së sotme në përdorimin e institucioneve shtetërore për t’i përdorur kundër kundërshtarëve politike. Një tjetër arsye e fortë për domosdoshmërinë e çlirimit të këtyre institucioneve nga individë të tillë të papërgjegjshëm, jo profesionistë dhe të motivuar politikisht në institucione që Kushtetuta i detyron për paanshmëri dhe objektivitet.
Gjithësesi ky fakt dëshmon natyrën e këtij skenari, ndërthurjen e grupeve dhe individëve të ndryshëm por në funksion të të njëjtit qëllim: Shantazhin ndaj meje si ministër dhe cënimin e imazhit dhe autoritetit të qeverisë, një aleancë e kundërshtarëve të reformës në drejtësi dhe përpjekjeve për rezultate konkrete në luftën kundër krimit të organizuar.
Natyrisht ka edhe një vlerë tjetër. Një tjetër dëshmi se megjithë këto përpjekje, asnjë fakt apo provë nuk arritën të krijonin për implikimin e tim vëllai në aktivitet të paligjshëm dhe për rrjedhojë të mund të ngrinin një akuzë ndaj meje qoftë edhe indirekt.
Z.Xhafaj, a ka diçka të vërtetë në akuzat e PD-së në adresë të vëllait tuaj?
Në gjithë çfarë është thënë në këto vite, në lidhje me raportet e vëllait tim me ligjin ka vetëm një fakt të vërtetë. Vëllai im ka qenë në shkelje të ligjit vetëm një herë. Në vitin 2002, kur ai ishte në një moshë fare të re u ndalua nga autoritetet e drejtësisë italiane për një vepër penale që lidhej me posedimin e narkotikëve.
Autoritetet e drejtësisë italiane e mbajtën atë të ndaluar për jo më shumë se një muaj dhe urdhëruan lirimin e tij. Gjithësesi procesi penal atje vazhdoi dhe në përfundim të këtij procesi në vitin 2012 vëllait tim i mbeti dënimi prej 4 vitesh e 1 muaj për veprën penale të kryer në vitin 2002.
Nga viti 2002 e deri në maj të 2018, im vëlla ka jetuar, është shkolluar dhe ka punuar në qytetin e Vlorës. Ka lëvizur lirisht në territorin e vendit dhe jashtë tij, pavarësisht se cilat qeveri kanë drejtuar vendin këto vite. Veçanërisht gjatë periudhës së qeverisjes së PD-së, jeta dhe aktiviteti i familjarëve të mi ka qenë në një vëzhgim të plotë nga strukturat partiake e shtetërore të kohës.
Pavarësisht se kanë pasur infrastukturën e duhur dhe e kanë mbajtur familjen time nën lupë, kundërshtarët e mi politikë nuk kanë gjetur asnjë provë që mund të implikojë vëllanë tim në shkelje të ligjit. Dhe jo vetëm të atij penal.
Por Partia Demokratike në deklarimet e shumta të saj, ka ngritur akuzën publike se Agron Xhafaj drejtonte trafikun e drogës në qytetin e Vlorës edhe me mbështetjen tuaj…
Është komplet një mashtrim dhe shpifje e ulët ajo që thuhet në lidhje me një përfshirje të mundshme të vëllait tim në këtë veprimtari. Prej vitit 2002 vëllai im ka jetuar në Shqipëri dhe është një ndër qytetarët e shumtë të këtij vendi që nuk ka asnjë problem me ligjin gjatë gjithë kësaj periudhe prej 16 vjetësh. ASNJË!
Sot e kësaj dite, PD-ja nuk ka demostruar asnjë provë qoftë edhe të tërthortë e cila të provonte sadopak këto akuza. PD-ja gjithë këtë akuzë shumë të rëndë e mbështet as më shumë dhe as më pak vetëm në audio-regjistrimin e rremë, të bërë publik në datën 14 maj 2018.
…po atëherë?
PD-ja pas vitit 2002, ka qenë 8 vite në pushtet (2005 – 2013). Unë kam qenë një kundërshtar politik konseguent i asaj qeverisjeje. Si rrjedhojë e kësaj kundërshtie, PD-ja dhe lidershipi i komanduar i saj, kanë adresuar kundrejt meje sulme personale nga më të egrat, përfshi edhe sulme kundrejt familjarëve të mi. Çështja e vëllait tim të penalizuar në Itali është bërë publike prej meje që në vitin 2002.
PD-ja e ka marrë dhe e ka risjellë këtë çështje si pjesë të akuzave kundrejt meje në shumë raste të tjera edhe gjatë kohës kur ajo ishte vetë në pushtet dhe ministra të Brendshëm e të Drejtësisë kanë qenë përfaqësues të lartë politik të PD-së përfshi edhe këta që vazhdojnë e llomotosin lart e poshtë si: Basha, Nishani, Noka, Alibeaj, Bardhi, etj.
Gjithashtu edhe drejtues policie në Vlorë ishin pikërisht disa nga këta që sillen sot si “ekspertë” politik të luftës kundër krimit dhe një pjesë shërbyen edhe si mitingashë protestash poshtë Ministrisë së Brendshme.
Pyetja logjike është si ka mundësi që këtë Agronin, të akuzuar prej tyre se qenka një nga “kokat” e aktivitetit të trafikut në Vlorë, i cili ishte vëllai i një kundërshtari të ashpër politik të PD-së, kjo e fundit në zotërim të të gjitha pushteteve kur ishte në qeveri, nuk e identifikoi dot me një provë apo fakt konkret sado periferik jo më si trafikant, se kjo është e qartë që është absurditet bosh i retorikës së një force politike të degraduar, por edhe me një shkelje ligji të çfarëdoshme?!
Si ka mundësi që gjatë qeverisjes së saj PD-ja nuk mundi të gjente qoftë edhe indirekt një provë të implikimit të tim vëllai jo vetëm në veprimtarinë kriminale të trafikut të drogës, por qoftë edhe në një paligjshmëri tjetër çfarëdo?!
E nga ana tjetër është e çuditshme se si “provën” e cila tregon se im vëlla na qenka i përfshirë në aktivitet trafiku që prej 2002 e këtej siç këta përpiqen të akuzojnë, provë të cilën PD-ja nuk pati mundësinë ta gjente kur kishte pushtetin (2005 – 2013), na e “zbuloi” ky deliranti Salianji pikërisht në 2018 dhe me dëshminë e një personazhi si Babale (!)
…si ta kuptojmë këtë?
Po ju jap thjesht një tjetër arsyetim dhe argumentat përkatës për ta bërë më të qartë atë çka thashë. Në vitet e “kanabizimit” për kë nuk u raportua dhe për çfarë nuk u raportua në lidhje me kultivimin dhe trafikimin e narkotikëve dhe sidomos për zonën e Vlorës. Si ka mundësi që u kursyen publikimet mbi veprimtarinë kriminale të prezumuar të vëllait të Kryetarit të Komisionit të Ligjeve dhe Kryetarit të Komisionit të Posaçëm parlamentar të reformës në drejtësi në atë periudhë?!
– Po si ka mundësi në ato mijëra faqe që tregtoheshin mediatikisht nga PD-ja dhe qarkullonin nëpër zyra lokale e ndërkombëtarë nga drejtuesit e SHISH-it të asaj kohe dhe prokurorë politik si Hajdarmataj (të emëruar të drejtpërdrejtë të familjes Berisha), lidhur me kanabisin në zonën e Vlorës në ato vite, nuk gjendet qoftë edhe një aludim periferik për tim vëlla apo qoftë edhe një familjar tjetër të rrethit tim familjar shumë të gjerë?!
– Si është e mundur që veç gazetarit “investigativ” Olldashi, mikut të ngushtë të Salianjit, asnjë tjetër, sidomos nga ata që janë të dalluar për gazetarinë investigative dhe që në jo pak raste pretendojnë se dinë më shumë se agjencitë ligjzbatuese çfarë ndodh në botën e krimit e trafiqeve, nuk ju doli në investigimet e tyre në asnjë rast të vetëm emri i tim vëllai për çfarëdolloj aktiviteti të paligjshëm?!
– Si ka mundësi që në qytetin e Vlorës për këtë veprimtari të prezumuar kriminale të Agronit nuk ka dijeni askush, por këtë e di vetëm shoku i Bashës, Babalja?! Apo mundet të jetë që edhe disa të tjerë e dinë këtë fakt, por kanë frikë ta denoncojnë, apo të denonconin?! Kështu i bie që në gjithë Vlorën sot ka vetëm një “trim” që denoncon krimin dhe lidhjet e tij me pushtetin. Ai është “Babale”, agjenti i Salianjit dhe njeriu i drejtësisë së Lulit.
Ju lutem, a ka absurditet më të madh se kaq apo duhet të besojmë çdo çmenduri politike të logjikës babaliste?!
PD-ja dhe specifikisht Salianji, por dhe ndonjë gazetar i medias kanë folur shpesh që akuzat e tyre ndaj vëllait tuaj për trafik nuk u hetuan kurrë?
Edhe kjo është gënjeshtër. Me këtë djaloshin nuk çuditem aq shumë se kjo është gënjeshtra më e vogël e tij. Ata që më çudisin dhe më zhgënjejnë janë disa opinionistë apo disa gazetarë të kësaj fushe, të cilët nuk kanë marrë mundimin të pyesin në organin e prokurorisë në lidhje me sa deklarojnë publikisht për këtë çështje. E vërteta është se nga prokuroria është hetuar edhe për akuzat për trafik droge të bëra nga PD-ja ndaj vëllait tim.
Më datë 17.05.2018, Prokuroria e Krimeve të Rënda ka regjistruar procedimin penal Nr. 95/v.2018 për veprën penale të “Trafikimit të narkotikëve” parashikuar nga neni 283/a i Kodit Penal. Hetimet kanë vazhduar me muaj përmes një hetimi të thelluar dhe asgjë nuk është arritur të provohet si e vërtetë nga thëniet e “agjentit” Babale dhe gazetarit ‘investigativ” Olldashi dhe të ngritur në akuza publike nga ekipi babalist i SHQUPI-it.
Çështja është pushuar për mungesë provash dhe vendimi i pushimit është marrë më datë 12.04.2019, nga Gjykata për Krime të Rënda, sot Gjykata e Posaçme Kundër Korrupsionit dhe Krimit të Organizuar.
Përse drejtësia italiane nuk e mbajti në burg vëllanë tuaj në vitin 2002 kur edhe ndodhi ngjarja për të cilën u dënua më pas, por thuajse menjëherë e liroi atë duke e lejuar edhe që të kthehej në Shqipëri? Si e konsideroni faktin që po kjo drejtësi pasi e liroi në 2002 pas 10 viteve në vitin 2012 e dënon atë?
Sikurse thashë edhe pak më lart, vëllai është ndaluar nga autoritetet italiane dhe është mbajtur prej tyre vetëm 1 muaj i ndaluar. Më pas ai është lënë i lirë. Lirimi i tij vetëm pas një muaji lidhej me arsyen e thjeshtë se shkalla e pjesëmarrjes së tij në atë veprimtari jo vetëm nuk ishte themelore, por edhe se ai si person me dijenitë e veta për këtë veprimtari nuk përbënte rëndësi të madhe për ato autoritete. Ishte e verifikuar qartë se pjesëmarrja e tij në atë veprimtari kriminale ishte tërësisht rastësore. Ai nuk ishte pjesë aktive e një grupi kriminal të organizuar, por ishte thjesht kontakti shoqëror i njërit prej tyre.
PD-ja në vijimësi, por edhe këto ditë ka pretenduar se ndaj vëllait tuaj, duhet të fillonin hetimet sipas ligjit antimafia përfshi dhe hetimet ndaj jush për këtë gjë. Eksponentë të PD-së apo edhe analistë e gazetarë të ndryshëm kanë deklaruar se nuk është bërë një gjë e tillë nën ndikimin tuaj. A është e vërtetë kjo gjë?
I kam ndjekur edhe këto akuza, por nuk më çudisin më disa nga këta që as pyesin dhe as lexojnë, por veç flasin si kompetentë të fushës dhe të së vërtetës!! Në fakt është gënjeshtra e madhe e radhës. Kjo është një tjetër çështje e filluar kryesisht nga Prokuroria e Krimeve të Rënda, ndaj Agronit dhe gjithë familjarëve të lidhur me të, në zbatim të ligjit përkatës.
Janë bërë hetime të shumta nga prokuroria për këtë gjë duke kërkuar e marrë të dhëna rreth Agronit dhe gjithë familjarëve të tij, përfshi edhe mua si vëllain e tij, për një periudhë kohore qysh nga viti 1994 e deri më 2019, në hipoteka, banka, tatime, sigurime shoqërore dhe një sërë agjencish të tjera që disponojnë të dhëna në këtë fushë.
Në përfundim, në vlerësim të të dhënave të shumta të grumbulluara, si dhe duke hetuar për muaj të tërë pa asnjë lloj kufizimi në kohë dhe në subjekte, rezultoi qartësisht se nuk ka asgjë të vërtetë në akuzat e PD-së kundrejt Agron Xhafës dhe/ose familjarëve të tij. Asgjë të paligjshme lidhur me pasurinë e tyre.
Në disa media këto ditë janë botuar lajme lidhur me një fakt të supozuar se në listën e OFL është edhe emri i vëllait tuaj. Keni dijeni ju për një gjë të tillë?
Siç e shpjegova më sipër hetimi pasuror është një gjë e bërë fakt dhe pikërisht nga Prokuroria e Krimeve të Rënda e cila në bazë të ligjit antimafia ka bërë hetimin e plotë të pasurisë së tij dhe të gjithë familjarëve të tij të lidhur me të, konform ligjit. E nuk bëhet fjalë për një formular policor, por për një hetim të kryer nga kjo Prokurori. Ky është një fakt ligjor i ndodhur tashmë.
Në rastin e Agronit dhe familjarëve të tij, hetimi është bërë 360 gradë. Shqipëria është një vend i vogël dhe ti nuk ke mundësi të fshihesh apo të fshehësh çfarë ke dhe ku i ke. E për më tepër në Vlorë nuk të pyesin shumë se kush je, por ta vënë kapelen tamam sipas kokës. Kjo do të thotë se edhe nëse për një moment organi i hetimit nuk do të kishte vullnet për të hetuar, do dilte një gazetar, apo edhe një qytetar (jo nga ata digital të bërë gazi i botës) i cili lehtësisht mundet të denonconte se situata është ndryshe.
Por ajo nuk është ndryshe nga sa është publike dhe konform ligjit, ndaj edhe askush, përfshi edhe prokurorinë që pati gjithë vullnetin për të kryer një hetim pasuror të thelluar, nuk vërtetoi asnjë paligjshmëri në lidhje me Agronin dhe familjarët e tij lidhur edhe me pasurinë.
Me spekulimet mediatike dhe porositësit e tyre, nuk ja vlen të merresh, pasi jo vetëm që janë skandalozë në ato që thonë, por edhe amatorë në sulmet dhe shpifjet që adresojnë. Nga të njëjtët subjekte, me të njëjtat “pasione profesionale” në një ditë “konfirmojnë” mbështetjen dhe ndihmën që Edi Rama i bënë “klanit “Xhafaj”” të drogës. Pastaj vetëm një ditë më pas “tregojnë” se si Edi Rama, po i bën presione me OFL këtij “klani”, apo Xhafaj i bën “presione” Edi Ramës!!!!
Një ditë thonë që Fatmir Xhafaj kontrollon policinë se e ka kapur atë, pastaj po këta një ditë më pas thonë që po bëhen plane që policia “ti kërkoj hesap” klanit “Xhafaj”.
Lexojini dy ditë rresh çfarë shkruajnë në raste të tilla dhe qartësisht do të kuptoni se sa qesharakë janë me “faktet” që prezantojnë dhe më shumë me “analizat” që bëjnë.
A mund ta dimë nëse është i pasur vëllai juaj? Cila është pasuria e tij?
Edhe pse nuk është shumë korrekte që ta jap unë këtë përgjigje, besoj se kam mirëkuptimin e plotë të familjes së tij në këtë rast. Im vëlla, ka mbi 20 vjet që jeton dhe punon në Vlorë, në biznes privat të cilin e ka administruar së bashku me familjarët. Një aktivitet ky tërësisht i provuar me dokumenta zyrtare sipas ligjeve në fuqi, përfshi dhe shlyerjen e rregullt të çdo lloj detyrimi ndaj shtetit.
Përveç makinës së tij, siç ka rezultuar edhe nga hetimi i kryer tashmë, ka në pronësi një apartament në Vlorë të blerë prej tij në vitin 2012 dhe një tjetër apartament ku banojnë familjarisht në Vlorë, blerë në vitin 2015, e gjitha me kredi bankare së bashku me bashkëshorten. Kaq është e gjithë pasuria e jetës e këtij personi dhe bashkëshortes së tij, në adresë të të cilit çfarë nuk ka thënë goja e ligë e opozitës dhe çfarë nuk kanë vjellë edhe këto ditë disa pseudo gazetarë portalesh dhe si përherë “qytetari digital” nga vila miliona euro nga Gjiri i Lalzit.
Nëse e mbledh bashkë gjithë pasurinë e tim vëllai, nuk është as sa gjysma e sipërfaqes dhe vlerës së shtesës së bërë pa leje nga Luli i PD-së, që i është shtuar apartamentit superluksoz të deklaruar nga zyrtari Basha, në pallatin me leje të firmosur po nga kryetari i bashkisë Lulëzim Basha!!
Për të mos vazhduar më tej pasi nuk ka krahasim që mund të bëhet me vilën e re në zonën më të shtrenjtë të kryeqytetit dhe sidomos me atë super pasuri me shumë zero nga pas të deklaruar po prej vet L.Bashës. Krahasuar me këtë person që ka qenë me rrogë shteti, pasuria e jetës së vëllait tim me biznes privat është si të krahasosh elefantin me milingonën apo Amsterdamin e Bashës me një rrugicë lagjeje të Vlorës.
Ironia e madhe këtu është se moralin mbi gënjeshtra e bën po ky njeri, akuzat mbi të cilin janë aq të faktuara sa tashmë nuk është më e nevojshme të hetohen, por thjesht të ndëshkohen.
Ditët e fundit ju kanë akuzuar ju personalisht për mbështetje të një kompanie lojrash fati drejtuar nga një person me aktivitet kriminal, i lidhur me vëllain tuaj dhe që juve ju ka bërë dhuratë një makinë qindra mijëra euro! A keni një koment për këtë akuzë të fundit ndaj jush?
Kam dëgjuar shumë të tilla këto ditë. Edhe më të rënda se kaq. I di arsyet e këtij sulmi si edhe personat pas tyre. Po gjithçka në kohën e vet. Nuk meritojnë asnjë koment, por meqënëse më pyetët nuk po e refuzoj përgjigjen për pyetjen tuaj.
Më vjen neveri me marrëzi të tilla të shpërndara nga ca palo njerëz e ca palo portale mediatike që ju japin ende zë dhe figurë shpifjeve të tilla. PD-ja nuk ka prodhuar vetëm “Dëshmimtarin X” por edhe të famshmin “I çmenduri B”. E lexova edhe unë gënjeshtrën digitale të radhës prej tij.
Me personin për të cilin pretendohet ky fakt i sajuar kam vetëm dy gjëra “të përbashkëta”. Që kemi të njëjtën kombësi dhe që jemi ngrohur në një diell. ASGJË tjetër. Asnjë njohje, asnjë komunikim qoftë edhe indirekt dhe të çfarëdolloji. Sa di unë edhe im vëlla dhe asnjë pjesëtar nga familja ime nuk ka pasur kurrë një marrëdhënie personale me këtë person e ca më tepër ortakëri biznesi me të.
E për dijeninë tuaj personin në fjalë dhe kompaninë e tij gjatë periudhës që kam qenë ministër i Brendshëm, policia e shtetit e ka kallëzuar në prokurori me sa më kujtohet të paktën në dy raste për aktivitet të paligjshëm të lojrave të fatit dhe për pastrim parash duke kërkuar në Prokurorinë e Krimeve të Rënda procedimin pasuror për ta bazuar në ligjin “Antimafia”.
Tani unë i denoncoj ligjërisht aktivitet e paligjshme të këtyre personave e këta vuajnë ligjërisht pasojat e shkeljes së ligjit, dhe po këta persona “për këtë “nder”” që unë ju bëja, më dhurojnë mua “makinë”!!??
Për informacion: Në vitin 2008 kam blerë një makinë të përdorur, prodhim i vitit 2006. Është bërë deklarimi i kësaj makine si pasuri në deklaratën time të pasurisë. Aktualisht ka 14 vjet makinë, por që ende mbetet hobi im si model makine. Po ndoshta plaku digital e ngatërron me makinat e familjes dhe miqve të tyre. Po se mos e ka për herë të parë!
Kush është në fakt vëllai juaj? Cila është e vërteta rreth tij sipas jush?
Im vëlla është i datëlindjes së vitit 1975. Ka lindur në Vlorë, është i martuar dhe ka dy fëmijë. Ka kryer studimet në universitetin e Vlorës (me shkëputje nga puna) dhe ka diplomën e masterit në Administrim Biznesi. E për këdo që në mënyrë cinike mundet ta ironizojë këtë fakt, dua t’i them se ai asnjëherë nuk ka dashur dhe nuk ka synuar që të punësohej në shtet. Asnjëherë.
Ndaj arsimin e lartë nuk e kreu në mënyrë formale dhe thjesht për të marrë një diplomë që do t’i hapte rrugën e punësimit në shtet. Ai vendosi ta kryente arsimin e lartë pikërisht se kishte nevojë për ato dije për interes të biznesit të tij dhe për ta ndërtuar ndryshe familjen e tij. Në vazhdim të kësaj ai ka bërë edhe një specializim për ekspert për vlerësim të pasurive të paluajtshme. Im vëlla është person që gëzon pa rezerva respektin e të gjithë atyre që e njohin. Është një person që ka një jetë shumë të rregullt familjare dhe pa vese shoqërore.
Ai bëri vetëm një faj në rininë e tij të hershme dhe për këtë është penalizuar. Por veç atij rasti jeta dhe veprimtaria e tij është jeta dhe puna e një qytetari normal të këtij vendi. Ai në fakt, ashtu si edhe pjesa tjetër e familjes sime ka paguar rregullisht në këtë periudhë kostot e angazhimit tim politik në tërësi dhe në veçanti të angazhimit tim me reformën në drejtësi dhe si ministër i Brendshëm.
Nëse do të qëndronte në Tiranë, çfarë do ndodhte me të për efekt të përgjegjësisë penale? Kundërshtarët tuaj politik akuzojnë se vëllai juaj nuk vuajti asnjë ditë burg për shkak të mbrojtjes që mund t’i keni ofruar ju…
Sipas ligjit shqiptar në fuqi, një vendimi të Gjykatës Kushtetuese dhe sikurse ka edhe precedentë të shumtë të krijuar në praktikën gjyqësore shqiptare, vendimi penal për Agronin nuk mundej të ekzekutohej për asnjë shkak dhe për asnjë motiv. Afati për ekzekutimin e këtij vendimi ishte parashkruar.
Bëhej fjalë për ekezekutimin e një dënimi prej 4 vjetësh dhe në vitin 2017 kur ishin mbushur 5 vjet nga vendimi i Gjykatës së Lartë Italiane, ishte parashkruar që do të thotë se ishte i pamundur ekzekutimi. Pra në çdo gjykatë shqiptare që do paraqitej kjo çështje, nuk mund të urdhërohej ekzekutimi i dënimit.
E thënë më shkurt për ata që nuk e njohin të vërtetën ligjore, nëse vëllai im do të shkonte vullnetarisht të bënte njohjen e vendimit të tij këtu dhe do të priste ekzekutimin e tij për dënimin në ngarkim të tij sipas ligjit shqiptar ai nuk do ta vuante fare atë, pasi periudha prej 4 vjetësh për ekzekutim është nën afatin 5 vjeçar të parashikuar nga ligji shqiptar. Një precedent ky i zbatuar normalisht në praktikën gjyqësore në Shqipëri në gjithë këto vite.
…po drejtësia italiane?
Sikurse e kam thënë edhe në këtë intervistë, nuk pati asnjëherë një kërkesë nga drejtësia italiane për ekzekutimin e këtij vendimi. Dhe në një shtet normal ku vepron ligji pa një kërkesë të drejtësisë italiane vendimi penal nuk mundej të ekzekutohej. Në rastin e shtetit fqinj qartësisht dukej që nuk kishte asnjë interes që Agron Xhafaj të vuante dënimin e marrë në Itali. Ky qëndrim i shtetit italian, nuk ishte një privilegj, apo një përjashtim për tim vëlla.
Për kategori të caktuara veprash penale, për masa dënimi të caktuara dhe për rrethana të tjera ligjore (si mungesa e rrezikshmërisë së personit, etj), shteti italian edhe në shumë raste të tjera nuk ka kërkuar ekzekutimin e dënimeve penale të dhëna për shtetas shqiptar.
Pa bazë është edhe akuza për moslejimin/pengimin e ekzekutimit të vendimit të dënimit të vëllait në Itali. Ju e shikoni që PD-ja përpos akuzave nuk tregon asnjë provë se si, se kur dhe me çfarë mjetesh e mënyrash unë pengova ekzekutimin e vendimit të dënimit të vëllait.
Asnjë veprim imi jo vetëm kur ushtroja funksionin e ministrit, por edhe më parë nuk ka krijuar imunitet, apo favor kundrejt ekzekutimit të vendimit. Është tërësisht qesharake sepse në të paktën 4 raste, në vitin 2002, në 2010, në 2016 dhe në vitin 2017, kjo çështja e dënimit të vëllait tim nga opozita është bërë edhe objekt i diskutimit parlamentar.
Prej vitit 2005 deri në vitin 2013 dhe për gati 6 muaj në vitin 2017 (në kulmin e debatit rreth meje), PD-ja ka qenë në pushtet, ministrat e Brendshëm dhe të Drejtësisë kanë qenë përfaqësues të kësaj force politike dhe kanë pasur mundësinë të kenë gjithë informacionin e duhur për këtë çështje dhe të vepronin pa hezitim sipas ligjit në fuqi. Ndaj është komplet pa sens kjo akuza e fshehjes së vuajtjes së dënimit. Madje i bën edhe qesharakë për më tepër.
Atëherë përse iku ai në Itali dhe sa ndikuat ju në këtë vendim?
Pyetje shumë e drejtë e cila ka veç një përgjigje. Siç më tha mua, por edhe familjes së tij, tekstualisht dhe e thënë popullorçe “i erdhi shpirti në majë të hundës”. Ai e pa se kjo histori nuk do të mbaronte kurrë dhe këtë histori atij do t’ia tundnin përpara syve gjithmonë si një “borxh” i palarë.
Nëse qëndronte këtu do kërkonin çdo ditë se pse nuk ndalohet nga policia e vëllait ministër, nëse shkonte në gjykatë dhe gjykata siç e shpjegova më lart nuk urdhëronte dot ekzekutimin e dënimit, po këta do dilnin të bërtisnin rrugëve e të thoshin sërish se e mbron i vëllai me reformën në drejtësi, frikën e vetingut, se mbrapa tij fshihet Edi Rama e plot idiotësi të tilla!!
Atëherë mori këtë vendim për t’i dhënë një zgjidhje të dhimbshme, por përfundimtare kësaj sage rraskapitëse për të dhe familjen e tij. Vuajtja shpirtërisht peshon më shumë për faktin se dënimin shkoi ta vuajë një person që nuk kishte asnjë lloj lidhje me atë të 16 viteve të shkuara.
E sigurtë që kishte disa zgjidhje në ato momente që të mos e ndërmerrte këtë hap dhe të vijonte jetën normale këtu apo diku jashtë vendit. Unë si vëllai i tij nuk e nxita as atëherë si vëlla dhe as në maj 2018 që ai ta kryente këtë akt. Ishte zgjidhja e tij, e konsultuar me disa miq të përbashkët. E respektoj dhe e vlerësoj shumë gjestin e tij.
Duan forcë dhe karakter akte të tilla. Është çështje dinjiteti dhe burrërie të vërtetë. E ironia është se për ligjin dhe moralin të flasin e gjykojnë më shumë ata që vetëm për fjalë i njohin këto koncepte. E më shumë akoma ju sulën vëllait im, natyrisht me objektiv mua, kundështarin e tyre politik, duke kërkuar llogari pse nuk i paguante drejtësisë “një borxh” të shumë e shumë viteve më parë, e të cilin vetë drejtësia italiane nuk ja kërkonte.
Këtë e bënin ata të cilët personalisht dhe familjarisht, kanë llogari akoma të hapura dhe borxhe pa larë me drejtësinë për krime të rënda dhe jetë njerëzish të humbura prej korrupsionit të tyre material e politik. Lulëzim Basha e Sali Berisha e kanë të njollosur “kostumin” e tyre me gjakun e njerëzve të pafajshëm. Ndaj duhet të mbyllin gojën kur flasin për hesapet e kujtdo tjetër me drejtësinë.
Gjithësesi besoj se një gjë është e sigurt. Koha vjen për këdo, për të mbyllur borxhet me ligjin dhe të marrë mbrapsht të keqen e mbjellë në jetët e të tjerëve.
Z.Xhafaj, cili është roli juaj në gjithë këtë histori?
Në asnjë rast dhe për asgjë nuk mund të gjendet qoftë edhe një fakt indirekt që unë të kem favorizuar një të afërm timin, për afera kriminale jo e jo (se sinqerisht më bëjnë të qesh me këto akuza), por edhe për një përfitim sado të vogël, material apo financiar qoftë.
Përkundrazi, janë familjarët e mi që janë privuar jo pak nga mundësitë konkrete për një pozicion më të mirë në jetë përfshi edhe motra, vëllezër e kunetër megjithëse i kanë merituar ato si profesionistë, si juristë, mjekë, ekonomistë etj.
Sa më përket mua, përfshirjes apo lidhjes sime si zyrtar, si politikan dhe si qytetar, as ka pasur dhe as do ketë shans kurrkush të më përfshijë në ndonjë lloj shkelje ligji jo mua personalisht drejtpërdrejt, por as edhe në formën e lehtësimit apo mbështetjes së dikujt, cilido qoftë ai, familjar imi apo kushdo tjetër.
Kam 20 vjet jetë aktive politike dhe si zyrtar i lartë i shtetit si: Sekretar i Përgjithshëm i qeverisë (1997 – 1999), tre herë Ministër (2002, 2003-2005, 2017-2018) dhe si deputet disa herë drejtues komisionesh parlamentare.
Sfidoj cilindo që të më provojë të kundërtën me fakte konkrete. Këtë sfidë ja kam bërë publikisht opozitës së sotme mes viteve 2002 – 2005 kur isha ministër, në 2010 kur ndërmorën një tjetër fushate të egër sulmesh ndaj meje si opozitar, në 2015 – 2016 kur isha drejtuesi i reformës në drejtësi, dhe në vitin 2017-2018 kur dolën nëpër mitingje. Përgjigja e tyre ka qenë veç balta, shpifja, akuza dhe kallëzimi i rremë ndaj meje.
Unë jam një qytetar dhe njeri normal si shumica në këtë vend, një politikan aktiv me të mirat e të metat e mia, por për një gjë jam shumë i sigurt dhe krenar. Kam qenë dhe do mbetem një politikan që respekton rregullat e demokracisë, zyrtar që njeh dhe mbron fort autoritetin e instucioneve të shtetit, ligjvënës që respekton ligjin dhe funksionar i papërfshirë në asnjë lloj afere korruptive.
Jam këtu, kam historinë time modeste dhe kush dëshiron le të më provojë të kundërtën. Në të gjithë karrierën time kam kërkuar të më vlerësojnë për atë çfarë unë jam dhe çfarë unë personalisht kam bërë dhe bëj si zyrtar i shtetit. Lidhur me veprimet apo mosveprimet e mia, unë mbaj përgjegjësi dhe do të mbaj deri ditën e fundit sa të kem frymë edhe kur të mos jem më në politikë.
I them këto në respekt të raportit që kam me të vërtetën në politikë, me opinionin publik, njerëzit e thjeshtë, me partinë ku bëj pjesë dhe sidomos me socialistët e mirë që më kanë mbështetur, inkurajuar e motivuar gjithë këto vite në karrierën time e veçanërisht në ato momente të vështira.
A keni tentuar ta ndihmoni vëllain tuaj? Nëse po, për çfarë konkretisht?
Nuk bëj pjesë tek ata që përdorin fëmijët dhe familjarët për të mbajtur pushtet apo pasuruar gjatë pushtetit, dhe as te ata që ua diktojnë politikën interesat materiale të fëmijëve, të vëllezërve e të kunetërve. Ashtu siç nuk bëj pjesë as te ata që mohojnë gjakun e tyre kur ua do interesi dhe pushteti.
Unë nuk bëj pjesë te ajo racë që fshihem pas kunatit apo nga ata që mohojnë familjarët për t’i shpëtuar përgjegjësisë. Jam krenar që nuk kam pasur gjë të përbashkët me këta palo politikanë të cilët i kam refuzuar dhe përbuzur.
Kam bërë detyrën time si vëlla, duke e ndihmuar të reflektojë në jetë dhe të ndërtojë një jetë të re. Jam i lumtur që pjesa tjetër e jetës së tij siç rezultoi edhe pas gjithë kësaj furtune publike, ka qenë ajo e një njeriu të rregullt në jetë, shumë familjar, shoqëror dhe korrekt me ligjet e shtetit. Ai as nuk ka kërkuar dhe asnjëherë vëllai i tij, politikani Fatmir Xhafaj nuk i krijoi favore apo privilegje në shkelje të ligjit. Asnjë!
Z.Xhafaj, ndaj jush ka pasur edhe një akuzë sa i përket ndryshimit të nenit për ekstradimet?
Një idiotësi politike, por edhe profesionale. Jo vetëm se nuk ka asnjë të vërtetë në atë çfarë ka ndodhur procedurialisht me atë dispozitë (gjë që është pohuar edhe publikisht nga misionet e asistencës ndërkombëtare që janë angazhuar me reformën), por edhe sepse nuk ka lidhje fare ai nen me rastin e tim vëllai. Ka argumente ligjorë të kuptueshëm për këdo.
Dispozita për të cilën unë akuzohem se e futa për miratim në Kuvend (opozita që e votoi qenka treguar “syleshe” me këtë rast!), favorizon nëse mundet të përdorim këtë term vetëm ato persona të cilët nuk kanë qenë të mbrojtur apo të përfaqësuar në procesin penal të zhvilluar në një vend tjetër.
Vëllai im ka pasur mbrojtës dhe përfaqësues në të gjitha hallkat e procesit të tij. Kështu që rasti i tij nuk ka aspak lidhje me këtë dispozitë. Thjesht nuk përfitonte fare nga zbatimi i saj. Kaq e thjeshtë është. Sigurisht për njerëz normalë, se për logjikën babaliste nuk funksionon arsyeja e shëndoshë.
E nga ana tjetër fakti është se unë nuk jam autor i asaj dispozite, por e kam mbështetur dhe mbrojtur fort atë si një nen në përputhje me konventat, me kushtetutën dhe të dobishëm për qytetarët shqiptarë. Është mot a mot përcaktimi i nenit 3 të Protokollit të Dytë Shtesë të Konventës Evropiane për Ekstradimin.
Për të gjithë ata që duan të kuptojnë, Shqipëria e ka ratifikuar këtë konventë që në vitin 1999, pra ky lloj kushti ishte gjithësesi i zbatueshëm në sajë të përparësisë që marrëveshjet ndërkombëtare kanë mbi legjislacionin vendas sipas Kushtetutës së Republikës së Shqipërisë. Pra, edhe amendimi i Kodit që reflekton protokollin e dytë është thjesht një rregullim, nuk është risi pasi kjo normë është në fuqi që nga viti 1999.
Për më tepër, të njëjtën normë e kanë adoptuar dhe e zbatojnë të gjitha vendet evropiane. Pra është në interes të qindra shqiptarëve të dënuar në vende të ndryshme të botës pa qenë të pranishëm në gjykimin e tyre dhe pa dijeni fare për një gjë të tillë. Këta njerëz dhe vetëm këta e meritonin një mbrojtje të tillë nga shteti i tyre siç bën çdo vend tjetër i botës.
Në media, por jo vetëm, është bërë shpesh një lidhje midis postit tuaj si ministër i Brendshëm dhe vetingut në polici dhe drejtësi. A ka një konflikt në këtë rast në këndvështrimin tuaj?
Ligji për vetingun, si për gjyqtarët, prokurorët ashtu edhe për policinë, parashikon si një prej tre komponentëve kyç për vlerësimin edhe atë që lidhet me figurën e subjektit që i nënshtrohet vetingut. Kjo nënkupton lidhjet për shkak të detyrës apo ndikimin në ushtrimin e këtij funksioni dhe në vendimmarrjet përkatëse. Askush nuk është penalizuar dhe ndëshkuar për shkak të një lidhjeje biologjike, por për shkak të lidhjeve shoqërore dhe të interesit me një person me rekorde kriminale.
Mund të ketë penalizim vetëm nëse këtë fakt të ditur për atë, zyrtari e ka fshehur në deklarimet zyrtare dhe/ose e ka mbështetur të afërmin e vet në veprimin e paligjshëm. Ka jo pak raste kur familjarë apo të afërm të gjyqtarëve prokurorëve apo edhe oficerëve të policisë, janë përfshirë individualisht në veprimtari kriminale dhe janë dënuar për këtë gjë, ndërkohë që vetë gjyqtari, prokurori a oficeri nuk është penalizuar prej këtij fakti nëse në ushtrimin e funksionit të tij nuk e ka ndihmuar apo lehtësuar këtë veprimtari të paligjshme.
Ka mjaft shembuj të tillë edhe në rrafshin ndërkombëtar, në demokraci të zhvilluara, dhe në nivele shumë të larta politike. Gjithkush përgjigjet ligjërisht dhe etikisht për veprimet dhe mosveprimet e veta në raport me ligjin dhe përgjegjësinë e funksionit shtetëror. Çdo interpretim tjetër është spekulim.
Sipas ish-deputetit Salianji, Edi Rama dhe Fatmir Xhafaj kanë përdorur policinë, shërbimin sekret dhe prokurorinë për të mbuluar të vërtetën. Sa kanë qenë MB-ja dhe Policia e Shtetit të përfshira në këtë proces?
Ky është një absurditet ose më saktë një tjetër alibi e ndërtuar për të justifikuar dështimin e tyre publik, por edhe si dhe një mënyrë për t’u mbrojtur përballë ligjit. Deklaroj me përgjegjësinë më të madhe se askush nga strukturat e Ministrisë së Brendshme dhe Policisë së Shtetit nuk është përfshirë në këtë histori për çfarëdo motivi përveç detyrimeve/urdhërimeve të ligjit, sipas përcaktimeve të bëra nga prokuroria apo gjykata.
Çdo veprim që ka kryer policia në lidhje me këtë çështje është në përmbushje të urdhrave proceduralë të prokurorisë. Veprimet e Policisë së Shtetit janë në përmbushje të detyrimeve që ligji i ngarkon asaj, në të kundërt do të bënin shkelje ligjore. Megjithatë edhe në këto rrethana përfshirja e strukturave të policisë ka qenë minimale dhe kryesisht për veprime që nuk mund t’i ndërmarrë askush tjetër sikurse është vëzhgimi i personave të urdhëruar nga prokuroria.
Z.Xhafaj, a ka lidhje largimi juaj nga posti i ministrit të Brendshëm me ngjarjen? Sa ndikoi te ju kjo ngjarje në aktin e dorëheqjes?
Siç ju thashë më lart, për çështjen e tim vëllai, unë e kisha dhënë njëherë dorëheqjen si ministër në vitin 2002. Asnjë gjë të re nuk kishte ndryshe në vitin 2018 për këtë çështje, përveç telenovelës Babale të SHQUP-it!!
Nëse akuza e PD-së do të ishte sadopak e vërtetë, unë jo vetëm që do të kisha dhënë dorëheqjen, por do të kisha marrë të gjitha përgjegjësitë e tjera me këtë rast, por në kushtet kur ishte shumë e qartë që gjendeshim përpara një intrige shumë të ulët, dorëheqja ime do të ishte kapitullim i shtetit kundrejt shantazhit politik dhe kriminal.
Nga ana tjetër ky sulm kundrejt meje vinte pikërisht në kohën kur Policia e Shtetit sapo kishte hyrë në një fazë të progresit cilësor në luftën kundër krimit, veçanërisht atij të organizuar. Ndoshta si asnjëherë tjetër më parë partnerët tanë i kishin ofruar Policisë së Shtetit gjithë besimin në bashkëpunimin institucional ndërkombëtar.
Suksesi i punës së Policisë së Shtetit në atë kohë ishte perceptuar si i tillë edhe nga opinioni publik. Sondazhe serioze të agjencive joqeveritare vendase apo ndërkombëtare, edhe në muajt pas publikimit të audio-regjistrimit fals, tregonin për një mbështetje në rritje nga publiku ndaj punës së policisë, por edhe ndaj meje si ministër i Brendshëm. Kush dëshiron një kopje të tyre është i mirëpritur.
Edhe personalisht kisha një mbështetje të plotë nga këta partnerë për punën time si ministër i Brendshëm. Këtë mbështetje pa asnjë rezervë e pata edhe pas publikimit të audio- regjistrimit. Konfirmimi i tyre për të vazhduar bashkëpunimin ishte i plotë. Ky konfirmin shprehej edhe nëpërmjet shkëmbimit të vizitave të nivelit më të lartë.
E bëra këtë narrativë thjesht e vetëm për të treguar se nuk kisha asnjë arsye të lidhur me këtë çështje me punën time si ministër për shkak të së cilës duhej të jepja dorëheqjen, e aq më pak akoma ta bëja këtë akt për shkak të “Babales”, një deliranti politik dhe regjisorit dështak të telenovelës së tij.
Ka zëra që thonë se segmentalisht edhe individë të caktuar nga mazhoranca janë përfshirë në këtë komplot politik…
Nuk dua ta besoj që gjërat kanë arritur deri këtu, por për hir të së vërtetës edhe e mendoj. Kam dëgjuar shumë në këtë aspekt nga shqiptarë dhe ndërkombëtarë. Ndoshta ka edhe të vërteta në këtë histori, por preferoj që helmin brenda familjes sime politike ta tres dhe jo ta shes.
…kaq e thjeshtë është apo ka diçka më tepër?
Po sigurisht që jo. Si në çdo bashkësi politike, edhe kjo ku unë bëj pjesë nuk është imune nga disa “vese” apo nga individë që nuk ndajnë qëllime e vlera të përbashkëta me këtë forcë politike dhe që solidaritetin apo mirënjohjen i kanë thjesht slogane fjalimesh.
Nuk më vjen mirë për këtë, sigurisht, por ky është realiteti ku jetojmë dhe këtij realiteti unë jam përpjekur t’i qëndroj ashtu si meritohet. Me integritet dhe ndershmëri. Kush është aty brenda, e njeh shumë mirë këtë pozicion timin.
Jam i lumtur që kam pasur mbështetjen e miqve të mi të shumtë brenda dhe jashtë PS-së, pa mbështetjen e të cilëve nuk do ta kisha të lehtë ta kaloja këtë situatë të vështirë personale dhe familjare. Situata të tilla të bëjnë të testosh veten, forcën dhe karakterin që ke, familjarët por edhe miqtë e tu. Test ky që siç e shoh dhe siç thonë, u kalua me sukses.
Cili ka qenë roli i kryeministrit Edi Rama në këtë proces, duke qenë se edhe është akuzuar shpesh se ju ka mbrojtur ju dhe vëllain tuaj?
Po flasim për çështjen konkrete dhe deri në momentin që unë u largova nga detyra. Në këtë kontekst në vlerësimin tim Kryeministri Edi Rama në këtë çështje ka mbajtur një qëndrim realist si nga pikëpamja institucionale, ashtu edhe ajo njerëzore e personale. Ne i kemi vlerësuar disa qëndrime realiste të bëra publike prej tij në lidhje me çështjen e dënimit të tim vëllai, përdorimit të tij politik dhe sulmeve të pabaza nga opozita.
Është plotësisht në të drejtën dhe detyrimin ligjor e institucional të një kryeministri që në mënyrë të pavarur, me kanalet e tij, të marrë informacionet e nevojshme në raste të tilla.
Në dijeninë time ai ka kërkuar informacion edhe më parë në vitet 2015 – 2016 kur opozita ka formuluar akuza ndaj meje lidhur me vëllain tim dhe atij si kryeministër i është dashur të shprehet publikisht për këtë gjë. Kam gjithë mirëkuptimin mbi atë që ai bëri si kryeministër edhe në këtë rast në lidhje me marrjen e informacionit të nevojshëm mbi vërtetësinë e materialit të audio-regjistrimit.
E vërteta që rezultoi nga këto verifikime të bëra nga struktura ndërkombëtare, por edhe nga ai vetë në institucionet ligjzbatuese të vendit nuk mundet të konsiderohet kurrsesi si mbështetje (e pajustifikuar) kundrejt meje. Në këtë çështje Edi Rama ka qenë avokat i së vërtetës.
Nëse e vërteta do të ishte ndryshe, nuk do kishte nevojë për asnjë lloj akti prej tij si kryeministër në raport me mua, pasi do të isha unë vetë ai që do të merrte vendimet e duhura e të përgjegjshme.
Sa ju kanë mbështetur ndërkombëtarët në këtë histori dhe cili ka qenë raporti juaj me ta?
Është naive të thuash se ata kanë mbështetur Fatmir Xhafaj si individ. Ata përfaqësojnë qeveritë e vendeve të tyre dhe interesat përkatëse, të cilat për hir të së vërtetës këto vite u pikëtakuan ndjeshëm me ato çfarë unë bëja.
Askush më mirë se ata nuk ka mundur ta njohë aq mirë se çfarë unë isha duke bërë si për reformën në drejtësi, ashtu edhe si ministër i Brendshëm. Ata e dinin mjaft mirë se cili ishte vizioni dhe qëllimet që më udhëhiqnin në këtë proces, po ashtu edhe presionin apo riskun e lartë të asaj çfarë ishim duke bërë bashkërisht.
Ishte kjo gjë që i bënte ata të demonstronin besueshmëri të lartë ndaj meje, të shkëmbenin informacion pa asnjë lloj rezerve, ndoshta edhe si rrallë më parë, dhe më kryesorja të më mbështesnin hapur. Sikurse ma kanë pohuar edhe vetë, edhe në këtë rast ata e dinin shumë mirë të vërtetën e sulmit të koordinuar ndaj meje pasi ndërmorën vetë investigime për këtë gjë.
Rezultatet e hetimeve të tyre të brendshme i shtynë që të jepnin një tjetër mbështetje të fortë publike, gjë për të cilën edhe ju vetë keni qenë dëshmitar. E gjithë historia e vëllait tim nuk ishte një gjë e panjohur për ta, sidomos që nga viti 2003 ku unë u bëra ministër Drejtësie, kur isha në opozitë, por edhe më pas kur isha në krye të reformës në drejtësi apo ministër i Brendshëm.
Është naive të mendohet se partnerët i jepnin mbështetje pa rezerva një politikani pa ditur se çfarë përfaqësonte personalisht ai vetë e familjarë të afërt të tij.
Ku e mbështesni këtë?
Le të mos harrojmë që si në periudhën 2003 – 2005 kur isha ministër Drejtësie, si gjatë periudhës në krye të reformës në drejtësi (2014-2017), ashtu edhe kur isha ministër i Brendshëm (2017-2018), unë, si shumë pak ndër paraardhësit e mi në këto funksione, kam takuar homologët e mi në nivelet më të larta të mundshme në Uashington (2005/2018), në Bruksel, Berlin, Romë e pothuajse në shumicën e vendeve kryesore evropiane. Të gjitha këto janë bërë realitet pa asnjë lloj lobisti ose e thënë ndryshe, pa paguar asnjë cent.
Gjithashtu gjatë periudhës së ushtrimit të funksioneve të mia kam vizituar e bashkëpunuar me Agjencitë më të njohura ndërkombëtare në luftën kundër krimit të organizuar në SHBA dhe BE. Kjo edhe në kulmin e sulmeve dhe akuzave të ngritura ndaj meje dhe pavarësisht çfarë artikulohej prej kundërshtarëve politik.
Jam i keqardhur, në fakt, që në një lloj mënyre këta bashkëpunëtorë të mirë dhe mbështetës të hapur të mitë “i zhgënjeva” me dorëheqjen time të papritur për ta. Ju jam mirënjohës disave prej ambasadorëve dhe shefave të misioneve këtu në Tiranë, por edhe disa miqve jashtë vendit me të cilët kisha bashkëpunuar gjatë këtyre viteve për faktin se edhe gjatë kësaj periudhe që jam larguar si ministër kemi vazhduar shumë miqësisht të shkëmbejmë mendime dhe bashkëpunojmë për çështje të sigurisë publike dhe veçanërisht për procesin e zbatimit të reformës në drejtësi.
Sipas jush, sa ka qenë i përfshirë Lulëzim Basha në këtë histori dhe a ka qenë ai në dijeni të këtij fakti?
Nuk mjafton të jesh shumë i ditur për të kuptuar që Lulëzim Basha përfaqëson drejtuesin e komanduar opozitar më të paaftë që ka njohur historia e pluralizmit politik në Shqipëri. Duke qenë i tillë, nga një i paaftë mund të presësh gjithçka. Nuk ka asnjë dyshim që Lulëzim Basha ka qenë tërësisht i përfshirë në këtë inskenim, pavarësisht se shumëkujt mund t’i duket një person që s’ka kapacitete për të bërë të tilla skenarë.
Kjo gjë nuk më çudit aspak sepse ka të bëjë me karakterin e tij njerëzor, se sikurse thotë një njohës i mirë i tij “Basha të gënjen edhe kur e pyet për orën e dorës”. Stani që mblodhi ai në PD këtë bulmet do të prodhonte. Lulëzimi përmendet disa herë, me emër dhe mbiemër, në përgjimet e zbardhura, nga komunikimet e Babales me familjarët e tij, me Alizotin dhe të tjerët aty në PD.
Në 25 maj, një ditë para protestës së organizuar nga opozita e kohës kundër meje ku u kërkua edhe dorëheqja ime si ministër i Brendshëm, kam bërë një deklaratë për mediat në të cilën ndër të tjera kam thënë se: “Në këtë rast nuk ka dhe nuk mundet të ketë një rrugë të mesme, dy të vërteta, apo gjysmë të vërteta.
E vërteta ime dhe e vërteta e Lulëzim Bashës e përjashtojnë qartësisht dhe plotësisht njëra-tjetrën, ndaj kush gënjen, duhet të mbajë përgjegjësitë e duhura politike dhe ligjore. E sfidoj kryetarin aktual të PD-së, Lulëzim Basha që edhe ai të deklarojë se merr përsipër të gjithë përgjegjësinë politike, duke u dorëhequr nga drejtimi i kësaj partie nëse provohet se personi në audio-përgjim nuk është vëllai im, si personi i akuzuar prej tij”.
E në fakt, protesta u mbajt dhe për nga pjesëmarrja është një ndër protestat më të turpshme të zhvilluara në bulevard, që u katandis në disa mitingashë rrethesh poshtë Ministrisë dhe që ai vetë për arsye që i di mirë (sikundër i di edhe unë) erdhi dhe i tërhoqi vetë me bisht ndër shalë.
E dimë edhe se si përfundoi procesi gjyqësor dhe se cilat janë përfundimet e gjykatës, por Lulëzimi vazhdon avazin dhe as zverdhet, as skuqet e as nxihet. Për të ka rëndësi fort karrigia e kryeministrit, por e vërtetuar shkencërisht askush nuk mund të shohë ëndrrën që sheh dikush tjetër në gjumë.
Presidenti Ilir Meta priti pas vendimit gjyqësor në një takim ish-deputetin Salianji. Keni ju një koment për këtë?
Veprimi i tij si president nuk më çuditi dhe as si Ilir nuk më zhgënjeu. Ish-deputeti i Bashës ka të drejtë të trokasë në çdo derë opozitare, pasi ata e nxitën drejt këtij inskenimi dhe duhet t’i dalin për zot dështimit të veprës së tyre.
Sa ka qenë i përfshirë Sali Berisha në këtë histori sipas jush?
Për efekt të kësaj interviste kjo gjë ka pak rëndësi, por një fakt dihet mirë. Berisha është absolutisht babai i intrigës, shpifjes dhe fyerjes në politikë. Nuk arrij dot ta mendoj se si një person në moshën e tij, me gjithë atë formim kulturor e eksperiencë qeverisëse edhe sot vazhdon të ofrojë në publik të njëjtën gjuhë përçarëse, baltën, fyerjen e shpifjen për cilindo që nuk i përshtatet interesave të tij!! Ndaj është një person që nuk besoj se meriton më shumë komente.
Ka edhe zëra për përfshirje të disa prokurorëve e gjyqtarëve në këtë sulm ndaj jush, disa prej tyre edhe të shkarkuar tashmë nga vetingu. Në ndonjë rast kanë arritur ta shprehin këtë edhe publikisht në media. Keni një koment për këtë?
Jam fort mirë në dijeni për këtë gjë, si gjatë kohës që isha i angazhuar me reformën, por edhe kur shërbeva si ministër i Brendshëm. Këta janë disa individë që kanë pasur dhe kanë lidhje të afërta me nivele të larta politike, u kanë shërbyer në kohë të ndryshme të gjitha palëve dhe kjo u ka shërbyer pastaj si imunitet për t’u sjellë si gjobëvënës me biznesin dhe qytetarët. Nuk po ja përmend emrin askujt dhe këtë gjë ua kërkoj edhe juve sepse i përkasin grupit të kandidatëve për kërkim azili politik.
Po përgatiten për fundin e tyre, i cili shpresoj të jetë si fundi i çdo të korruptuari. Besoj se kjo do të ndodhë kur të përballen me ligjin. Njerëz si këta tipa më bëjnë nder më shumë kur më sulmojnë. Është turpi i atyre që ju japin mbështetje dhe ca më tepër zë e figurë individëve të tillë super të korruptuar. Në fakt në këtë rast këta të dytët janë të keqpërdorur për interesa të ulta politike, ekonomike e personale të të parëve.
Media i ka kushtuar një pasqyrim të gjerë historisë së audio-përgjimit dhe gjithë rrethit të personave të lidhur me të. Keni ndonjë koment për këtë fakt dhe cila ka qenë marrëdhënia juaj me to për këtë çështje?
E respektoj median në përgjithësi. Kam edhe raporte shumë të mira e miqësore me disa përfaqësues të saj. Kam një respekt të veçantë sidomos për analistët dhe gazetarët që kanë mbuluar reformën në drejtësi. Por në çdo rast pavarësisht afërsisë shoqërore, i kam qëndruar korrekt dhe profesionalisht marrëdhënies me ta.
Edhe pse sot media po kalon një periudhë të vështirë, përsëri në një mënyrë apo në një tjetër e vërteta e gjen veten të prezantuar nga një pjesë e mirë e saj.
Në këtë kuadër kam mirënjohje dhe respekt për mbulimin korrekt dhe të paanshëm që pjesa serioze e medias i ka bërë çështjes së audio-regjistrimit dhe çdo historie të rrjedhur prej kësaj çështjeje.
Nuk e fsheh që kam keqardhje që në disa raste media apo reporterë të veçantë qartësisht dhe mbi një disponim politik apo për interesa të caktuara haptazi kanë komentuar jo bazuar në fakte e prova, por në hamendësime dhe trillime siç ka ndodhur edhe këto ditë me disa prej tyre.
Diçka më specifike?
Natyrisht nuk mund ta fsheh që jam i zhgënjyer dhe i keqardhur më shumë me disa njerëz të medias, analistë e opinionistë të njohur si të tillë apo të vetëquajtur kështu, të cilët më parë i kam vlerësuar për profesionalizmin dhe paanësinë që ata kanë prezantuar, por që edhe në gjykimin e kësaj çështjeje nuk arritën të ndajnë pozicionimin e tyre kundër qeverisë nga e vërteta e fakteve të njohura publikisht dhe të vlerësuara edhe prej tyre vetë si të tilla.
Në disa raste konstatova që edhe pse nga njëra anë prezantonin provat dhe faktet reale mbi këtë çështje, nga ana tjetër disa gazetarë, apo opinionistë në komentet e tyre shfaqnin një lloj “delikatese” profesionale në trajtimin dhe demaskimin e këtij shantazhi të pastër politik të provuar si të tillë nga ato prova e fakte të prezantuara po prej tyre.
Natyrisht nuk po fus fare në këtë arsyetim ndonjë rast të veçantë perversiteti mediatik të krijuar nga mendje diabolike, nga ata që tërë jetën u janë paguar prurësit më të parë dhe që e kthyen sulmin ndaj meje, sidomos pasi unë u largova nga funksioni i Ministrit, në një sulm personal duke mos më kursyer asnjë anëtar të familjes. Kjo është tjetër llogari për të cilën nuk mendoj se ja vlen të shpenzojmë këtu kohë dhe energji.
Gjithësesi një gjë e them me siguri. Nuk jam nënshtruar përpara kurrkujt dhe nuk jam investuar në asnjë rast që ta blej apo ta këmbej me heshtjen e tyre. Kam pasur bindje të plotë në të vërtetën time, ndaj kam qenë edhe i hapur të kontribuoj në respekt të besimit te roli i medias vërtet të lirë dhe të pavarur për rritjen e transparencës publike dhe mirëqeverisjen e vendit.
Sot kemi një vendim gjyqësor penal për një politikan dhe për një kallëzim të rremë prej tij, ndërkohë që kemi dhjetëra të tilla për qytetarin e thjeshtë. Sipas jush, cili është efekti në politikë i këtij vendimi?
Janë të shumta historitë në këtë vend ku “shpifja e legjitimuar” ka pasur jo pak kosto njerëzore, psikologjike dhe politike, duke qenë se ka përdorur kostumin e ligjvënësit si mburojë. Jo, nuk mund të ketë asnjë gënjeshtër e asnjë shpifje që mund të amnistohet nga shoqëria. Koha kur politika bëhej duke përdorur akuzat false si kamxhik ndaj kundërshtarit politik dhe për vetë qytetarin, duhet të marrë fund njëherë e mirë.
Pavarësisht se ne jemi në rivalitet si alternativa politike, sërish ndjehem i keqardhur kur konstatoj se ku përfundoi Partia Demokratike që dikur valëviste flamurin e shpresës, ndërsa sot valëvit flamurin e “Babales”. Nga grupi parlamentar me Jozefinën, Selamin, Imamin, Gazin, Astritin, Majlindën, Ilirin, Eduartin, Viktorin e shumë të tjerë, te trioja e Bardhit, Alibeajt dhe Salianjit me shokë! Më keq se kaq nuk mund të përfundonte një parti politike që lindi bashkë me pluralizmin dhe që qeverisi vendin prej gati 16 vitesh.
Gjithësesi duket një ngjarje e rëndë për ju por edhe më shumë se kaq, për shoqërinë shqiptare dhe sidomos për politikën aktuale…
Për të qenë realistë dhe të sinqertë, duhet të pranojmë se në këto kohë, shpifja dhe denigrimi (jo vetëm politik) për kundërshtarin politik po kthehet në një normalitet. Për fat të keq. Ti ndonjëherë çuditesh se me sa papërgjeshmëri absolute dhe me sa lehtësi përfaqësues të ndryshëm politik, apo mediatik, prezantojnë publikisht akuza nga më të ulëtat për kundërshtarët politik.
Dhe me sa duket kjo histori kështu do të vazhdojë derisa “kokës” së ndonjërit apo ndonjërës prej këtij soji, me grushtin e ligjit ti bihet “bap”, kur goja e tyre bën “llap”.
E kështu të tjerët të kuptojnë se duhet të mendojnë përpara se të nxjerrin fjalët shpifëse nga goja për tjetrin, se përndryshe ka kosto që i paguan. Këtë kuadër ligjor duhet ta forcojmë, ndryshe kjo kulturë e sjellje perverse dhe regresive do vazhdojë pafundësisht.
Cilat janë pasojat që ky proces ka lënë te ju sot? Si ndjeheni tashmë?
Nuk kam asnjë iluzion që të besoj se ky ka qenë rasti i parë apo do të jetë i fundit kur sjellja politike e një përfaqësuesi të tillë apo dhe e një partie politike është në formë dhe në përmbajtje, sikurse sulmi/shantazh “Babale”, ndaj si një njeri me eksperiencë të gjatë politike tashmë, jam përpjekur ta përcjell gjithë këtë histori me racionalitetin më të madh të mundshëm.
Jashtë çdo interesi e konsideroj vendimin e gjykatës si përgjigjen më të drejtë kundrejt atyre që u përfshinë në këtë sulm të ulët ndaj meje dhe familjes sime, të paktën atyre që u përfshinë dukshëm në përbaltje. Megjithatë, duhet të kuptoni dhe besoj kushdo e kupton se ka disa gjëra që asnjë vendim gjyqësor nuk mundet të t’i rikthejë.
Ka qenë një periudhë mjaft e vështirë për familjarët e mi në radhë të parë, por natyrisht edhe për mua. Në fund të fundit dua apo s’dua, unë jam pjesë e mjedisit ku vepron ky lloj llumi politik dhe nuk shpëtoj dot prej efektit të tij, ndërkohë nuk kishte arsye që familjarët e mi ta vuanin këtë fushatë baltosjeje. Më është dashur të jem shumë më i fokusuar me ta këto kohë dhe të kompensoj diçka me vëmendjen apo kujdesin tim të shtuar.
Pra vendimi ju ka lehtësuar peshën?
Ky vendim nuk më bën të harroj atë ç’ka kam përjetuar këtë periudhë dhe as të harroj lehtë padrejtësitë e bëra, veçanërisht atë çfarë sytë më kanë lexuar dhe veshët më kanë dëgjuar në adresë time dhe të familjes sime. Edhe kur është e hidhur, e vërteta ka ngushëllim brenda, por shpifja dhe sidomos përbaltja e qëllimshme, janë të vështira për t’u kapërdirë.
Nga ana tjetër ajo është edhe një dëshmi se si mund të degradojë një forcë e madhe politike si PD-ja kur kauzën e parimeve dhe vlerave, e konverton me instrumentin e shpifjes. Është thuajse antinjerëzore që për qëllime të ulëta e për karrierë politike të luash me dinjitetin dhe personalitetin e tjetrit. Është madje akoma më keq kur nga një mëkat i tillë kalon në një tjetër dhe ti nuk arrin të kuptosh që ke kaluar disa limite ligjore dhe morale, për të cilat duhet të paguash shtrenjtë më pas.
Në një vështrim, kjo mund të konsiderohet edhe si një tjetër dëshmi e betejës së gjatë që kemi me moralin në politikë dhe pritjen e momentit kur betejat do të ndërtohen mbi çfarë bëjmë dhe përfaqësojmë, për parimet dhe vlerat që mbrojmë e mishërojmë si zyrtarë e politikanë.
Një gjë është e sigurt. Kjo periudhë më ka bërë të kuptoj edhe më mirë se çfarë ndodh në realitetin politik, të njoh mirë njerëzit përballë dhe ata në krah. Padyshim, më ka bërë edhe më të fortë. Gjithësesi, pavarësisht asaj që ka ndodhur, vazhdoj të besoj pambarimisht tek e vërteta dhe drejtësia, madje, akoma më fort edhe te kauzat të cilave u jam përkushtuar për një drejtësi të paanshme dhe të barabartë për të gjithë. Shpresoj që koha të më japë të drejtë, sikurse po më jep deri më sot, e kryesorja të më japë forcë që të vazhdoj të besoj e luftoj edhe më shumë.
Për të gjithë ata që kanë qenë të përfshirë në këtë përbaltje, kush pak e kush shumë, rikthej edhe njëherë atë që kam shprehur lidhur me këtë çështje në vitin 2010, në fjalën time në seancë plenare: “Zoti i ndihmoftë, e të jenë të sigurt se ai nuk harron! Unë bëj pjesë tek ata që besojnë fort se një ditë gjithkush paguan e duhet të paguajë për ligësinë e tij! Ka një llogari që mbyllet gjithmonë në këtë jetë, ashtu sikurse ka edhe një shpërblesë me mirënjohje për cilindo, për të mirat që bën dhe gëzimet që fal”!
Z.Xhafaj, ju faleminderit shumë për intervistën!
Ju faleminderit juve për mundësimin e kësaj interviste të gjatë dhe sidomos për hapësirën dhe realizmin e dedikuar në trajtimin e kësaj çështjeje!
*****
©️Copyright Gazeta DITA
Kjo intervistë u botua në DITA nga 04 deri në 07 mars 2020. Është ekskluzive e gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016