Vrasja me thikë e një 14-vjeçari nga një bashkëmoshatar pranë shkollë ku ai studionte ka sjellë shqetësim dhe frikë te prindërit fëmijët e të cilëve studiojnë në këtë shkollë dhe jo vetëm.
Për mediat e pranishme një ditë pas ngjarjes së rëndë para shkollës ‘Fan Noli’, aty ku humbi jetën i mitur ata u shprehën se fëmijët e tyre që studiojnë në të njëjtën shkollë janë të shokuar dhe nuk kanë dashur të vijnë në shkollë sot.
“Jemi më të trishtuar sa s’ka më. Kam fëmijët në këtë shkollë, kam goca. Vajza ka qenë tepër e tronditur, ka ardhur duke qarë në shtëpi. E njohim familjen e viktimës dhe është familje jashtëzakonisht e mirë, shumë djalë i rregullt, që do të thotë se nuk ka të bëjë familja në këtë rast, viktima ka qenë e pafajshme”, tha një prind.
“Çfarë i sigurt, ku ka siguri. Po s’pati polici që t’u hyjë në dru, nuk ka siguri. Mësueset e kanë nga lart, që mos e prek fëmijën, kam qenë në takim me prindër, vajza më ka thënë që ishte shumë çun i mirë”, u shpreh një tjetër.
“Patjetër që jemi të shqetësuar, nuk donin të vinin në shkollë sot fëmijët. Ka pasur edhe sherre më parë mes fëmijëve edhe në klasa më të vogla. Djali është në klasë të 6, ka rastisur aty kur i ndjeri është rrëzuar në tokë, nuk flet se është në shok. Një apel për mësuesit që t’i ndjekin edhe jashtë orarit të shkollës edhe për 1 minutë apo 10 metra më andej, apel për nxënësit që të vijnë në shkollë për të mësuar dhe apel edhe për prindërit që t’i ndjekin fëmijët jo t’i plasin te shkolla”, tha një tjetër prind.
j.l./ dita
