Belind Këlliçi është paraqitur ditën e sotme në SPAK.
Mësohet se ish deputeti i PD, është paraqitur në SPAK i thirrur nga Prokurori i Posaçëm, Elvin Gogaj. Këlliçi dyshohet se ka mashtruar me diplomën e shkollës së mesme, për të cilën ka dyshime se nuk e ka përfunduar. Gjithashtu, Këlliçi dyshohet se ka falsifikuar formularin e vetdeklarimit kur ishte deputet i PD.
Në dosje thuhet se Këlliçi në datën 24 mars 2023 ka plotësuar një “Formular Vetdeklarimi” para Komisionit Qendror të Zgjedhjeve në të cilin ka theksuar se për periudhën e viteve 2005-2009 ka qenë me studime universitare në Baltimore, Maryland të SHBA.
Sipas kallëzimit penal, në fakt deputeti Belind Këlliçi nuk kishte mbaruar arsimin e mesëm, për rrjedhojë nuk mund të ndiqte dot studimet e larta në SHBA.
Ish-kandidati i Berishës për Bashkinë e Tiranës ka parkuar një Audi luksoz para dyerve të Prokurorisë së Posaçme, siç shihet në foto.
Nuk dihet nëse kjo makinë, që kushton mijëra euro, është e tij apo e ndonjë të afërmi të tij.
Ai ka deklaruar më herët në një intervistë kur ishte ende deputet, se ndihmohet ekonomikisht nga vëllai i tij, Reshardi, sepse paga e deputetit nuk i mjafton për të mbyllur muajin.
Këlliçi është pyetur sot në SPAK edhe për disa pasuri të dyshuara në emër të së fejuarës së tij Ana Shkreli si dhe për një foto me Trump nga ato që paguhen nga zyra lobimi.
n.s. / dita
