Reali i Madridit ka reaguar me një deklaratë zyrtare për ngjarjet kundër Vinicius Jr., në “Mestalla”. Sulmuesi brazilian u përplas me një mbështetës në tribunë, i cili dyshohet se e ofendoi atë me një koment racist, duke ndërprerë lojën. Më pas braziliani ishte protagonist në sherrin masiv që ndodhi mes lojtarëve të të dyja skuadrave, duke u ndëshkuar me karton të kuq.
Deklarata e Realit për racizmin ndaj Vinicius Jr.
“Real i Madridit dënon me forcë ngjarjet që ndodhën dje kundër lojtarit tone, Vinícius Junior. Këto fakte përbëjnë një sulm të drejtpërdrejtë ndaj modelit të bashkëjetesës së shtetit tonë të së drejtës, social dhe demokratik. Reali i Madridit konsideron se sulme të tilla përbëjnë edhe krim urrejtjeje, për këtë arsye ka bërë ankesën përkatëse në Prokurorinë e Përgjithshme të Shtetit, konkretisht në Prokurori kundër krimeve të urrejtjes dhe diskriminimit, në mënyrë që të hetohen faktet dhe të qartësohen përgjegjësitë. Neni 124 i Kushtetutës spanjolle përcakton funksionet e Prokurorisë Publike për të nxitur veprimin e drejtësisë në mbrojtje të ligjshmërisë dhe të drejtave të qytetarëve dhe interesit publik. Për këtë arsye dhe nisur nga serioziteti i ngjarjeve të ndodhura, Reali i Madridit i është drejtuar Prokurorisë së Përgjithshme të Shtetit, pa paragjykuar paraqitjen e tij si procedim privat në procedimet që po nisin”.
Reagon klubi i Valencias:
Përjashtim përjetë autorëve!
Valencia do të përjashtojë përgjithmonë nga “Mestalla” ata tifozë që lëshuan thirrje raciste dhe ofendime ndaj Vinicius Junior gjatë ndeshjes kundër Realit të Madridit. Klubi ka analizuar pamjet e regjistruara nga kamerat e sigurisë gjatë mëngjesit deri në gjetjen e momentit në të cilin shihet se të paktën dy tifozë kanë bërë gjeste raciste (duke imituar gjestet e majmunit). Pasi u përzgjodhën pamjet nga Njësia Qendrore Operative e Mestallas, klubi i vuri në dispozicion të policisë për të vazhduar me identifikimin e personave të përfshirë në këto ofendime raciste. Klubi konfirmon se njëri nga dy personat tashmë është identifikuar dhe se po punohet për të zbuluar identitetin e tjetrit.
Deklaratë zyrtare nga Valencia
“Valencia, në angazhimin e saj të përhershëm kundër racizmit dhe dhunës në të gjitha format e saj, njofton se policia ka identifikuar një tifoz që bëri gjeste raciste ndaj Vinícius Jr në ndeshjen e e javës së 35-të kundër Realit të Madridit, të luajtur në “Camp de Mestalla” dhe po punohet në mënyrë të koordinuar për të konfirmuar identitetin e të implikuarve të tjerë të mundshëm. Nga momenti i ngjarjes po analizohen të gjitha regjistrimet e disponueshme, duke punuar sa më shpejt për zbardhjen e asaj që ka ndodhur për të vepruar shpejt dhe me forcë. Valencia ka hapur dosjen disiplinore, për të përjashtuar përjetë nga stadiumi tifozët që fyen Vinicius Jr. dhe po bashkëpunon me Policinë dhe organet kompetente për zbardhjen e asaj që ka ndodhur. Klubi dënon ashpër këtë lloj sjelljeje, e cila nuk ka vend në futboll dhe në shoqëri dhe që nuk korrespondon me vlerat e Valencia CF dhe tifozët e saj. Në këtë mënyrë, ne rikonfirmojmë qëndrimin tonë kundër racizmit duke vepruar me të njëjtën forcë si në vitin 2019, kur një tifoz që bëri gjeste dhe përshëndetje fashiste ndaj tifozëve të Arsenalit gjatë ndeshjes së UEFA Europa League, u përjashtua përjetë.”
