Gjeorgjia ka dëbuar nga vendi familjen e ministrit të Jashtëm rus, Sergei Lavrov, pas linjës së sanksioneve të vendosura ndaj Kremlinit nga Bashkimi Europian dhe Shtetet e Bashkuara, ka njoftuar presidentja gjeorgjiane Salome Zurabishvili. Një pjesë e familjes së Lavrov kishte udhëtuar në vendin euroaziatik të premten për të festuar një martesë dhe një banket, pikërisht në të njëjtën ditë që rifilluan fluturimet midis Moskës dhe kryeqytetit të Gjeorgjisë, Tbilisi.
Konkretisht, dhëndri i Lavrov, Mika Vinokurov, kishte mbërritur të premten në Gjeorgji me qëllim që të martohej dhe të bënte banket në hotelin Lago Kvareli në rajonin e Kakhetit, sipas portalit të lajmeve “Civil.ge”. Në Gjeorgji ka qenë edhe vajza e Lavrov, Ekaterina Lavrova, ndonëse hoteli i lartpërmendur e ka mohuar këtë informacion duke siguruar se “vizita e vajzës së Lavrov në Kvareli nuk është e vërtetë”.
Pas raportimeve, Gjeorgjia dëboi të afërmit e Lavrov nga vendi dhe arriti të anulojë dasmën e planifikuar. “Ministrja e Punëve të Brendshme më njoftoi se kjo familje dhe personat që kanë planifikuar një dasmë sot janë larguar dhe dasma nuk do të bëhet sot”, tha Zurabishvili, duke shtuar se ngjarja “është një lloj fitoreje për shoqërinë”. Presidenti më pas kërkoi nga autoritetet që të përdorin listat e personave të sanksionuar për të mbrojtur kufirin gjeorgjian.
Një pjesë e vendit kundërshton fluturimet direkte midis Rusisë dhe Tbilisit. Të premten, kur avioni i parë u ul në Gjeorgji, një grup protestuesish u mblodhën në aeroportin e kryeqytetit, ku shpalosën pankarta. Vetë presidentja shkroi një postim në Twitter në të cilin deklaroi se “megjithë kundërshtimin e popullit gjeorgjian, Rusia ka zbarkuar fluturimin e saj të padëshiruar në Tbilisi”.
