Protestat masive të organizuara nga të rinjtë në qytetet kryesore të Gjermanisë mbi krizën e kostos së jetesës, shkollat, shpenzimet publike dhe shërbimin ushtarak kanë kaluar në përleshje të dhunshme dhe sulme mbi biznese.
Policia në Frankfurt ka konfirmuar se në qendër të qytetit kanë ndodhur “trazira të dhunshme”, ndërsa pasiguri dhe tensione janë raportuar gjithashtu në qytete të tjera të mëdha si Berlin, Hamburg dhe Këln.
Dhjetëra mijëra demonstrues dolën në rrugë për të protestuar, në kuadër të lëvizjeve të ngjashme rinore edhe në vende të tjera evropiane.
Sipas zyrtarëve policorë, në protesta u infiltruan elementë, të cilët shfrytëzuan situatën për të sulmuar forcat e rendit me mjete shpërthyese, përfshirë kokteje molotovi, dhe për të plaçkitur dyqane në qendër të Frankfurtit.
Policia gjermane ka përdorur gaz lotsjellës dhe mjete të tjera për shpërndarjen e turmës, duke shoqëruar dhe arrestuar dhjetëra persona.
Organizatorët dhe zëdhënësit e lëvizjeve protestuese kanë theksuar se pakënaqësitë e të rinjve lidhen me kërkesat për mbështetje më të madhe në sistemin e shëndetësisë dhe arsimit, kundërshtimin e rikthimit të shërbimit të detyrueshëm ushtarak, si dhe shqetësimet e thella mbi pabarazinë ekonomike dhe rritjen e kostos së jetesës.
d.xhima / dita
