Biznesmeni 44-vjeçar shqiptar, Ermal Beqiraj, do të vijojë të qëndrojë në paraburgim në burgun e Beauvais në Francë, pasi Gjykata e Apelit në Amiens rrëzoi kërkesën e tij për lirim.
Arrestimi i tij erdhi pasi fluturoi me avionin e tij privat mbi hapësirën e mbrojtur të centralit bërthamor të Penly, ndërsa tashmë përballet edhe me kërkesën zyrtare të Ministrisë së Drejtësisë në Shqipëri për ekstradimin e tij.
Media franceze, raporton se, prapa kësaj kërkese qëndron SPAK-u, i cili e heton Beqirajn për mashtrim të organizuar dhe ka identifikuar asete milionëshe me origjinë të dyshimtë kriminale në territorin francez.
Mësohet se, ndër pronat e bllokuara përfshihen llogari bankare prej mbi 2 milionë eurosh, dy apartamente, automjete, një avion privat, si dhe kështjella historike Château d’Auteuil, e blerë për rreth 2.6 milionë euro.
Pavarësisht pretendimeve të mbrojtjes se ndalimi ishte i paligjshëm dhe deklaratës së vetë biznesmenit se nuk po arratisej por kishte zgjedhur të jetonte në Francë, gjykata vendosi ta mbajë atë në qeli. Me këtë vendim, Beqiraj do të presë në paraburgim përfundimin e procedurave ligjore që pritet të çojnë në ekstradimin e tij drejt drejtësisë shqiptare.
j.l./ dita
