Janë luajtur sot dy takimet e para gjysmëfinale të Kupës së Shqipërisë. Tirana fitoi 3-0 përballë Teutës, ndërkohë që Vllaznia-Egnatia përfundoi në barazim 1-1. Bardheblutë e Orges Shehit vijojnë formën e mirë edhe në Kupë. Tirana triumfoi 3-0 falë golave të Florent Hasanit në pjesën e parë dhe Bruno Lulajt e Regi Lushkjes në të dytën. Sukses i rëndësishëm për kryeqytetasit, të cilët kanë hedhur një hap të sigurt drejt kalimit në finalen e madhe. Nuk ka festë në “Loro Boriçi”. Skuadra e Edlir Tetovës kaloi në avantazh falë golit të Raphael Dwamena në minutën e 69’. Sulmuesi ganez finalizoi një zbritje të shpejtë, dribloi portierin dhe dërgoi topin në rrjetë. Shkodranët reaguan dhe ia dolën të realizonin golin e barazimit me Ardit Hoxhajn në minutat shtesë.
Gjysmëfinalet e Kupës/ Shkodranët bëjnë ‘shtrëk’ në shtëpi, Tirana shumë e fortë për Teutën
