Një ngjarje tejet e rëndë u regjistrua në futbollin turk mbrëmjen e së hënës. Presidenti i klubit të Superligës turke Ankaragucu, Fati Koca, goditi pas përfundimit të ndeshjes me Rizespor, arbitrin kryesor Halil Umut Meler. Gjithçka ndodhi pas një goli të skuadrës së Rizespor që barazoi rezultatin në 1-1 në minutën e 97.
Nervat e presidentit të Ankaragucu nuk mbajtën dhe Fati Koca u fut menjëherë në fushë duke goditur me grusht në fytyrë arbitrin, i cili u shemb në tokë.
Gjyqtari u dërgua në spital për të marrë trajtimin e nevojshëm, ndërsa nga ana tjetër, presidenti u ndalua nga forcat e rendit.
Ndërkohë, pak orë më pas, presidenti i Federatës së Futbollit në Turqi deklaroi se sporti nuk ka lidhje me dhunën ndërsa konfirmoi se për momentin futbolli në Superligën turke është i pezulluar pa afat.
E gjithë skena e rëndë u përcoll live, duke mos lënë asnjë vend për koment, ndërsa ministri i brendshëm turk njoftoi se për këtë ngjarje janë arrestuar tre persona, mes tyre edhe presidenti i Ankaragucu, Faruk Koca.
Në lidhje me këtë ngjarje të rëndë ka reaguar edhe vetë presidenti i Turqisë, Recep Tayyip Erdogan: “E dënoj sulmin ndaj arbitrit Halil Umut Meler. Nuk do të lejojmë kurrë që dhuna të përfshihet në sport”, u shpreh Erdogan.
p.k\dita
