Muaji gusht ka sjellë me vete një rekord të ri sa i përket flukseve valutore në tregun financiar vendas, vecanërisht ato në monedhën e përbashkët evropiane. Flukset pasqyrohen qartë në sasinë e pazakontë të valutës që është depozituar nëpër bankat shqiptare gjatë gushtit.
Ndërsa përgjatë gjithë vitit, volumi i depozitave bankare në euro është rritur me vlerë dyshifrore, rreth 15%, rekordi i vërtetë është shënuar në gusht.
Banka e Shqipërisë raporton se totali i depozitave në valutë arriti plot 7.1 miliardë euro!
Norma vjetore e rritjes së depozitave në valutë rezulton 16.5% në fund të gushtit.
Depozitat në valutë të huaj kanë balancuar edhe rënien e atyre në lekë, duke qenë përgjegjëse për rritjen e depozitave në total në sistemin tonë bankar. Totali i depozitave të përfshira në paranë e gjerë rezultoi 1,28 trilionë lekë në muajin gusht.
Sipas Bankës së Shqipërisë, është vërejtur edhe një fenomen tjetër! Vecanërisht gjatë fundit të vitit të shkuar, një pjesë e mirë e individëve preferuan të tërheqin paratë nga bankat për t’i investuar në bono thesari.
“Për t’u shënuar është që këtë vit, vecanërisht gjatë tremujorit të dytë, është shënuar një përmirësim i fortë i depozitave të bizneseve krahasuar me ato të individëve, duke reflektuar gjendjen e mirë të likuiditetit dhe në përgjithësi përmirësimin e gjendjes financiare të tyre” – citon SCAN TV.
p.c. /dita
