Një histori e pazakontë vjen nga Granada e Spanjës. Një grua ra viktimë e një mashtrimi, duke përdorur fytyrën e vetë Brad Pitt.
Duke përfituar nga fakti se gruaja kishte marrë një trashëgimi, avokati i saj shpjegon se përgjegjësit e mashtrimit po i zbraznin llogaritë e saj pak nga pak, gjatë 4 apo 5 muajve të vitit 2022.
Gjithçka nisi kur gruaja mori një e-mail për t’u bashkuar me klubin e fansave të Brad Pitt. Të jetuarit me nënën e saj, pa fëmijë, pa partner dhe me moshë mesatare, ndihmoi mashtrimin.
“Erdhi një moment që i thanë se tani mund të bëhej mike personale me Brad Pitt dhe t’i shkruante. Imagjinoni habinë dhe gëzimin e saj!”, shpjegon për “Ideal” avokati i ankueses.
Natyrisht, e gjitha ishte pjesë e një mashtrimi, por hapat filluan të pasonin njëri tjetrin. Derisa i thanë se Brad Pitt vjen në Spanjë për të filmuar. Por më parë duheshin derdhur ca para… Vijuan disa transferta prej mijëra eurosh; një prej tyre arriti deri në 35.000 euro.
Avokati vijon: “Ajo u bind se po krijonte një lidhje speciale me Brad Pitt dhe se po komunikonte me të, madje në një rast e qortoi, sepse e kishte parë në një festival, në shoqërinë e një gruaje tjetër”.
Kulmi i mashtrimit arriti kur ‘Brad Pitt’ i tha se do ta vizitonte në Granada për t’i kërkuar që të martohej me të.
Sigurisht që kjo nuk ndodhi kurrë, por deri në atë moment, 170,000 euro kishin fluturuar nga llogaria!
Edhe pasi gruaja kuptoi mashtrimin, kriminelët kibernetikë nuk u ndalën. Ata u paraqitën më pas si detektivë që po hetonin mashtrime si ky, duke thënë se po flisnin në emër të vetë FBI-së. Kërkuan para të tjera.
Më në fund, gruaja shkoi në zyrën e avokatit dhe i tregon historinë e saj. Pas kësaj ai bëri denoncimin, duke përfshirë edhe akuzën për neglizhencë të supozuar nga ana e bankës.
“Ka disa rregulla për të ndjekur transfertat e parave që mund të mos jenë respektuar në këtë rast”, thotë ai, teksa aktualisht policia spanjolle po kryen një hetim të gjerë, për të zbuluar edhe raste të tjerë të këtij lloji.
a.q. / dita
