E jashtëzakonshme pjesëmarrja në Ditën 21 të protestës: “Do rrethojmë Ministritë dhe Parlamentin, fuqinë nga sot e ka populli”

Për 21 ditë me radhë, qytetarët janë mbledhur në protestë kundër qeverisë aktuale dhe gjithë klasës politike që ka dominuar jetën e vendit për gati 40 vjet pas 1990-s.

Kjo e sotmja u cilësua si protestë mbarëkombëtare pasi shqiptarë nga diaspora iu bashkuan tubimit qytetar.

“T’i respektojmë se kanë bërë mijëra km për të ardh këtu”, tha një qytetar.

“Rinasi, për ne është muzeu i dhimbjes. Mirëserdhët në shtëpi mërgatë, qëndrofshi gjatë! Në fytyrat tuaja unë shoh fytyrën e tim vëllai, njerëzve të mi që janë larguar”, tha një tjetër protestuese.

“Ne kemi mbështetjen e eurodeputetëve të PE. Ata po na ndjekin hap pas hapi dhe kanë shprehur gatishmëri për të qenë pranë nesh”, tha një qytetare nga diaspora.

Makina të shumta me flamuj kombëtarë parakaluan nëpër rrugët e Tiranës para protestës.

“Sot Taulant Balla ka thënë se po vijmë me makina luksoze. Po ti o hajdut ku e gjete? Ne ikëm me gomone dhe vijmë me makina se i kemi me duart me kallo.” – tha një tjetër emigrant protestues.

Kërkesat e qytetarëve ishin po të njëjtat, dorëheqje kryeministrit Edi Rama deri nesër. Po ashtu ishin dhe thirrjet, ku përveç Ramës, kërkohet dhe largimi i Sali Berishës nga skena politike. Pas përfundimit të fjalimeve, protestuesit kanë nisur marshimin rreth Kryeministrisë dhe Piramidës.

Një i ri që kishe ardhur nga Anglia për protestën tha se populli duhet të qëndrojë bashkë. “O ju familje e madhe, më në fund e kam ndjerë vetën në shtëpi. Çfarë po ndodh këtu është një mrekulli. Dua t ju bëj një lutje; mos lejoni njeri t’ju përçajë. Duhet të qëndrojmë të bashkuar, fuqinë sot e ka populli. Do ia dalim ta hedhim poshtë këtë klasë politike”.

“Kjo nuk është një protestë, por një kryengritje! Diaspora e do Shqipërinë pa interes” – tha një protestues tjetër në podium.

“Edhe pse unë e kam rregulluar jetën, pse fëmijët e mi duhet të kërkojnë një gjë në gjuhë të huaj. Diaspora e do Shqipërinë pa interes. Pse është e rëndësishme Diaspora?

Ishte Jeronim de Rada dhe At Preng Doçi që nisën në Diasporë Rilindjen shqiptare. Ishte Nënë Tereza që jetoi në Diasporë dhe u tregoi botës dashurinë e shqiptarit për njerëzimit. Ishte Skënderbeu që pas shumë vitesh u kthye nga Diaspora dhe bashkoi shqiptarët”, tha emigranti që quhej Renis.

Aktivisti Arben Kola që njihet si një nga organizatorët e protestës theksoi se Kryeministria është rrethuar tashmë nga mijëra qytetarë shqiptarë, duke shtuar se do rrethojnë edhe parlamentin e ministritë.

“Kanë bllokuar autostradën për të mos lejuar njerëzit për të ardhur në Tiranë. Por Kryeministria është rrethuar. Parlamenti dhe të gjithë ministrisë po rrethohen. Do qëndrojmë këtu deri sa të shporren”, u shpreh Kola.

j.l./ dita