Gjykata e Beratit ka dhënë sot masat e sigurisë për tre të arrestuarit që dyshohet se hodhën në treg 21 ton mandarina të ndaluara për shitje, pasi ishin kthyer nga Kroacia për shkak të pesticideve.
Për grumbulluesin Arben Dyli, fermerin Elton Tafa dhe për inspektorin e shtetit Elson Tahiraj është dhënë masa e “arrestit me burg”.
Seanca gjyqësore filloi në orën 13:00 dhe mbaroj në orën 16:00 me gjyqtar të çështjes Ilirjan Hysa dhe prokurore Malvina Pëllumbi.
Gjatë seancës avokatët mbrojtës i quajtën të arrestuarit viktima të luftës tregtare të konkurrencës me qëllim dëmtimin e tregtarëve vendas.
Madje avokati mbrojtës i Arben Dylit hodhi dyshime mbi vërtetësinë e analizave të shtetit kroat.
Ndërsa në fjalën e tij eksportuesi Arben Dyli u shpreh se nuk ishte në dijeni se duhej njoftuar AKU pasi iu kthye produkti, por njoftoi fermerët një nga Goriçani dhe një nga Saranda për të marrë mbrapsht produktin e mandarinës.
Fermerin Elton Tafa u shpreh para trupit gjykues se i është bërë padrejtësi nga AKU pasi sipas tij i ka njoftuar se mandarinat ishin kalbur dhe i hodhi në landfillin e Dimalit.
“Mu thye zemra kur i hodha sepse ishte djersa ime”, mësohet të ketë thënë Elton Tafa.
Tafa kishte debatuar me Dylin pasi dyshonte që mandarinat e kthyera nuk ishin të tijat, por megjithatë e mori të mirëqenë dhe i hodhi në plehra.
Pavarësisht mbrojtjes dhe deklaratave të të arrestuarve, gjykata vendosi masën e arrestit me burg për të tre të dyshuarit.
