Ish-ministri i jashtëm i Kosovës Enver Hoxhaj komentoi mbi ngjarjet e fundit në Ukrainë.
Hoxhaj analizoi situatën dhe u shpreh se ajo që po ndodh në Ukrainë e komplikon edhe më shumë situatën e dialogut Kosovë-Serbi.
Për Hoxhajn, njohja e ndërsjellë mes Kosovës dhe Serbisë është jetike. Sipas Hoxhajt, rusët mund të përdorin edhe Serbinë si platformë për të ushtruar ndikim.
“Për Kosovën, ajo çfarë po ndodh në Ukrainë e komplikon edhe më shumë situatën e dialogut Kosovë-Serbi, nëse rusët, deri më tani kanë pretenduar se Serbia dhe Kosova, merren vesh, kanë një marrëveshje për njohje të ndërsjellë, ata nuk do të bllokonin anëtarësimin e Kosovës në Kombet e Bashkuara, përmes vetes së tyre në këshillin e sigurimit.
Tani mund të ketë një situatE që ata mund të pretendojnë diçka tjetër në raport me situatat në Ballkan. Situatat e Evropës lindore mund t’i përdorin si pretekst për ta bllokuar edhe më shumë Kosovën. Prandaj edhe unë kohët e fundit kam qenë ithtar i madh në këto vitet e fundit, në mënyrë që qytetarët në Kosovë, ta kuptojnë se dialogu Kosovë-Serbi është në interes të shtetit të Kosovës, nuk është në interes të Serbisë, por tregimi i cili ka marrë më shumë mbështetje ka qenë, tregimi të cilin e ka treguar zoti Kurti, si kryeministër.
Përmes frikës ai i ka bindur qytetarët e Kosovës, se çfarë po bëjmë në raport me Serbinë, më shumë po mbështesim Serbinë sesa po mbështesim Kosovën. Edhe sot e kësaj dite e shoh arritjen e një marrëveshje të njohjes së ndërsjellë mes Kosovës dhe Serbisë, si diçka jetike. Unë e di që shumë të tjerë që janë jashtë vendimmarrjes politike, mund të grisin lart e poshtë flamujt kuq e zi dhe mund të pretendojnë që kjo është rruga më e duhur, që ne të qëndrojmë në llogoret tona. Por është jetike për një vend të ri që ta përmbyllë shtetësinë. Prej Sllovenisë e deri në Maqedoninë e Veriut ka një temë e cila është e pambyllur dhe ajo është mos anëtarësimi i Kosovës në Organizatën e Kombeve të Bashkuara dhe kjo është jetike. Njerëzit, për shembull në Maqedoninë e Veriut, mund të kenë pikëpamje të ndryshme, se çfarë ka bërë një kryeministër që ishte në detyrë si Zoran Zaev. Por Zaevi i bëri një shërbim të madh Maqedonisë, e bëri shtet anëtar të NATO-s. Dhe nëse Maqedonia nuk do të ishte shtet anëtar i NATO-s, Shqipëria shtet anëtar i NATO-s, Mali i Zi, ne në Kosovë do ta përjetonim ndryshe situatën e Ukrainës.
Kjo do të thotë arkitektura e sigurisë në Ballkan ka shtylla të forta. Natyrisht që rusët mund të përdorin edhe Serbinë si platformë për të ushtruar ndikim, mund të ketë situata të tensionuara në veri të vendit, mund të ketë përpjekje të elementeve ruse për ta destabilizuar Kosovën. Por për shkak të orientimit tonë perëndimor dhe për shkak të faktit se ne nuk jemi në NATO, por NATO është në Kosovë përmes KFOR-it është më pak e mundur. Ajo ku unë mendoj se rusët do të bëjnë përpjekje të kenë ndikim, dhe Serbia të jetë platformë është më shumë Bosnja, sesa Kosova vendet e tjera. Për shkak të faktit se atje kanë një lidership politik i cili është emocionalisht ose politikisht i lidhur me Rusinë siç është Millorad Dodik. Është një vend ku nuk po funksionon, nuk ka kohezion të brendshëm. Ne në Kosovë kemi shumë sfida por kemi kohezion të brendshëm, kemi vullnet politik, kemi mirëkuptim dhe përplasje ose polarizim politike. Kur është çështja për tema të mëdha, ne jemi të gjithë bashkë. Ndërsa Bosnja nuk është e ndërtuar në mënyrë që të gjithë të jenë bashkë sepse ka tri etnitete të ndryshme. Kroate, boshnjake dhe serbe dhe republika Serbe është një lloj kali i Trojës, brenda Bosnjës në këtë rast.”, u shpreh Enver Hoxhaj. m.b/dita
