Një i dënuar me burgim të përjetshëm mbeti i vrarë dhe një tjetër u plagos mesditën e së premtes në burgun e sigurisë së lartë të Peqinit, ndërsa si autor dyshohet të jetë Sokol Mjacaj, i dënuar gjithashtu me burgim të përjetshëm për vrasjen e dy turistëve çekë në vitin 2015.
BIRN mësoi se viktima është Arben Lleshi, i dënuar për vrasje në Britaninë e Madhe.
Në një njoftim për shtyp, Drejtoria e Përgjithshme e Burgjeve bëri me dije se kishte pasur një konflikt mes tre të burgosurve dhe se fillimisht dy prej tyre ishin plagosur, ndërsa Mjacaj ishte vënë nën kontroll.
Më vonë një bisedë telefonike, Femi Sufaj, zv.drejtor i Përgjithshëm i Burgjeve, konfirmoi se një prej të plagosurve kishte humbur jetën.
Pas konfliktit në vendngjarje kanë shkuar Prokurori i Elbasanit, Drejtori i Përgjithshëm i Burgjeve, Drejtori i Përgjithshëm i Policisë se Shtetit, Forcat Operacionale të Drejtorisë se Përgjithshme të Burgjeve dhe Forcat RENEA.
Drejtoria e Përgjithshme e Burgjeve njoftoi se Mjacaj, që dyshohet si autor i ngjarjes ishte izoluar dhe po merrej në pyetje nga prokuroria dhe se situata ishte normalizuar.
“Situata është tërësisht nën kontroll, autori është izoluar dhe po hetohet ngjarja. Hetimin e ka marrë në dorë Prokuroria e Elbasanit,” thuhet në njoftimin paraprak të drejtorisë së burgjeve.
Ngjarja përbën një ndër rastet më të rënda të cenimit të sigurisë në sistemin e burgjeve në Shqipëri dhe mbetet ende e paqartë se si një i dënuar ka siguruar armën e krimit.
n.s. / dita
