Ministrja e Jashtme gjermane pranoi se disa nga armët që Berlini i ka dhënë Kievit për të ndihmuar në luftën e tij kundër Rusisë kanë qenë ose në gjendje të keqe ose të vjetruara.
Në një intervistë me CNN, Analena Baerbock pranoi probleme të mëdha teknike me dërgimin e armëve në Ukrainë.
“Disa nga sistemet tona janë vërtet të vjetra… dhe ne thamë në fillim se disa nuk funksionojnë” – tha ajo, duke shtuar se kjo vjen për shkak të faktit se Gjermania nuk ka marrë pjesë në një luftë të madhe prej dekadash.
“Kur ne dorëzojmë diçka, ajo duhet të funksionojë në terren”, theksoi ajo, duke shtuar se kjo ishte arsyeja pse Gjermania nuk i ka ofruar Ukrainës raketa Taurus me rreze të gjatë veprimi, të cilat ajo i përshkroi si jashtëzakonisht të sofistikuara.
Kjo është gjëja më e re, kështu që duhet të jemi të qartë në çdo detaj, si funksionon, kush mund ta operojë në të vërtetë. Po, kërkon pak kohë… por kur e dorëzojmë, duhet të funksionojë.
Prej disa muajsh, Ukraina ka kërkuar raketa Taurus, të cilat kanë një rreze veprimi prej rreth 500 kilometrash dhe mund të mbajnë një kokë 500 kilogramëshe.
Megjithatë, pavarësisht raportimeve në media se Berlini po krijonte bazat për dërgesat, Baerbock paralajmëroi në fillim të këtij muaji se dorëzimi nuk do të ndodhë në të ardhmen e afërt, sepse “çdo detaj duhet të përpunohet paraprakisht”.
Javën e kaluar, Der Spiegel raportoi, duke cituar burime, se Ukraina kishte refuzuar të pranonte dhjetë tanke të vjetëruara Leopard 1 për shkak të gjendjes së tyre të keqe mekanike.
p.c/dita
