Për shkak të nevojave të përditshme, ne përdorim në shtëpi një gamë të gjerë barnash, solucione larëse, lloje të ndryshme sendesh kozmetike, pesticide, etj. Sipas ekspertëve të Institutit të Shëndetit Publik, veç funksionit për të cilat ne i përdorim, ato mbartin mbi vete edhe rrezikshmëri të lartë ndaj shëndetit të njeriut.
Është kjo arsyeja që na bën të jemi të kujdesshëm dhe të njohim mirë funksionin e tyre.
Për të shmangur kontaktet e fëmijëve me lëndët e mësipërme, duhet që ato të mbahen në vende të sigurta, në mënyrë që të mos arrihen prej tyre. Edhe një grusht tabletash në pamje të padëmshme, mund të sjellin probleme serioze në shëndetin e fëmijëve, si helmime dhe humbje jete. Vendosini ato në vende të sigurta.
Për të evituar në maksimum dëmtimet duhet të keni parasysh disa rregulla bazë:
- Mbani në shtëpi sasitë më të nevojshme dhe asnjëherë më shumë se sa ju duhen.
- Respektoni udhëzimet e shkruara në çdo produkt, pasi aty keni të gjitha informacionet e kërkuara, përfshirë edhe rreziqet që ato mbartin në raste kur përdoren gabim.
- Kujdes, lëndët djegëse vendosini në rafte metalike dhe të siguruara me çelës.
- Raftet të vendosen në vende të freskëta, të ajrosura.
- Çdo lëndë vendoseni në mbajtësen origjinale, pasi po e hodhët në mbajtëse të tjera, mund ta ngatërroni e për pasojë mund të dëmtoheni.
- Kur këto produkte mbarohen, kutitë, ambalazhet apo shishet, hidhini në vende të sigurta që të mos bien në dorë të fëmijëve.
Edhe në rastin e barnave mjekësore, tabletave, shurupeve, shiringave, alkoolit, jodit e lëndëve të tjera dezinfektuese, këshillat janë të njëjta si në udhëzimet e mësipërme. Tregohuni korrekt me përdorimin e tyre, në datat e skadencave që janë shënuar në çdo kuti apo tabletë.
Barnat e skaduara duhen eleminuar, ato nuk duhen përdorur në asnjë rast. Mund të keni pasoja të padëshiruara prej tyre.
p.k/dita
