Gjykata e Durrësit ka caktuar masën e sigurisë “arrest me burg” për 26-vjeçarin Leonardo Preza, pas arrestimit dhe akuzave për përdhunimin e një shtetaseje italiane 18-vjeçare.
Ngjarja e rëndë ka ndodhur në orët e para të mëngjesit të së premtes në një shezlong afër hotelit ku Preza punonte dhe 18-vjeçarja po qëndronte pasi kishte shkuar për pushime.
Para togave të zeza, 26-vjeçari ka deklaruar se nuk mban mend asgjë pasi ka qenë i droguar.
“Isha nën efektin e lëndëve narkotike dhe nuk mbaj mend se çfarë kam bërë”, citohet të ketë thënë 26-vjeçari.
Nga ana tjetër vajza 18-vjeçare nga Campagna Lupia ka treguar se ndodhej në një lokal bashkë me shoqet dhe kishte konsumuar alkool. Më pas ishte larguar për të marrë ajër në shezllonet e një biznesi buzë detit, ku u pikas nga Preza, i cili punonte si punonjës sezonal në të njëjtin subjekt.
Turistja ka deklaruar se 26-vjeçari fillimisht i ka folur për pak minuta, por më pas ka ushtruar dhunë fizike dhe ka kryer marrëdhënie seksuale pa pëlqimin e saj, pavarësisht tentativave të vajzës për ta larguar dhe thirrjeve për ndihmë. Ekspertiza mjeko-ligjore ka konfirmuar dëmtime fizike në trupin e saj dhe gjurmë dhune në trupin e të dyshuarit, të shkaktuara gjatë përleshjes.
Preza, i cili është i martuar dhe baba i tre fëmijëve, rezulton të ketë precedentë penalë në armëmbajtje pa leje dhe vjedhje.
j.l./ dita
