Papa Françesku ndodhet i shtruar në spital, në gjendje jo të mirë shëndetësore, pasi ka marrë një infeksion në mushkëri. Vatikani bën me dije se Papa, 86 vjeç, ka përjetuar vështirësi në frymëmarrje ditët e fundit, ndaj është detyruar t’u nënshtrohet kontrolleve mjekësore.
Papa Françesku u pa dje që mori pjesë në audiencën e përgjithshme javore dhe dukej se ishte në gjendje të mirë shëndetësore.
Por, pasdite u raportua se kishte shkuar në spitalin Gemelli të Romës për një kontroll rutinë.
- Publicitet -
Papa Françesku vuan nga divertikuliti, që mund t’i sjellë infeksion në zorrën e trashë dhe iu nënshtrua një operacioni në vitin 2021 për të hequr një pjesë të organit.
Këtë vit, ai tha se situata po i përsëritej dhe se po e bënte atë të shtonte peshë, por se nuk ishte shumë i shqetësuar. Ai gjithashtu ka një problem me gjurin dhe se në daljet e tij publike përdor një bastun apo dhe një karrige me rrota.
Papa Françesku tha vitin e kaluar se ai nuk preferonte të bënte një operacion në gju, sepse nuk donte që të përsëriteshin efektet anësore afatgjata nga anestezia që pësoi pas operacionit të vitit 2021.
Papa Françesku është shprehur se pavarësisht situatës shëndetësore, ai nuk ka në plan të japë dorëheqjen dhe se kjo gjë mund të ndodhë vetëm nëse ai do të mbetej plotësisht i paaftë.
“Një lodhje që nuk të lë t’i shohësh gjërat qartë. Mungesa e qartësisë, e dijes se si të vlerësohen situatat. Vetëm kjo mund të më bëjë të tërhiqem”, tha ai.
j.l./ dita
