Një ngjarje e rëndë njoftohet se ka ndodhur pak orë më parë në Skrapar. Një çift bashkëshortësh të moshuar, turistë holandezë, mësohet se janë futur për të notuar në kanionet e lumit Osum, por njërin prej tyre e ka marrë rrjedha.
Po kryhen kërkime intensive nga policia, palombarët e RENEA-s dhe banorët. Ndihmë po japin në vendngjarje edhe profesionistët e Rafting.
Njoftimin për ngjarjen e bëri gruaja e të humburit, që kërkloi ndihmë, teksa vetë arriti të dilte nga rreziku.
“Më datë 08.05.2023, në spitalin e Çorovodës, është paraqitur për ndihmë mjekësore shtetasja holandeze H. (V. A.) C. S., 64 vjeçe, e cila paraprakisht ka deklaruar se së bashku me bashkëshortin e saj, shtetasin J. A. S., 68 vjeç, ishin futur për të notuar në kanionet e lumit Osum.
64-vjeçarja ka mundur të dalë nga lumi, ndërsa bashkëshortin e saj e ka marrë rrjedha e ujit. Shërbimet e Komisariatit të Policisë Skrapar, ato të DVP Berat, si dhe shërbimet zjarrfikëse kanë shkuar menjëherë në kanion dhe po vijojnë kërkimet në lumin Osum.
Në ndihmë të shërbimeve të Policisë Vendore, janë nisur polumbarët e Repartit Special “RENEA”, me qëllim gjetjen e shtetasit J. A. S. Grupi hetimor vijon punën për sqarimin e rrethanave të rrethanave të kësaj ngjarjeje”.
