Këta janë babë e bir nga fshati Bruçaj i njësisë Pult të Dukagjinit që janë vrarë me armë zjarri pasditen e sotme, nën një pritë të organizuar dhe planifikuar mirë, që lë të kuptohet se personat që qëndrojnë pas sulmit janë grup kriminal i rrezikshëm.
57-vjeçari Gjokë Gurra dhe djali i tij Eduart Gurra, rreth 30 vjeç, u ekzekutuan në pritë, teksa kishin shkuar për të parë banesën e tyre të djegur në fshatin Bruçaj, pasi jetonin në Shkodër.
Banesa ishte djegur vetëm një natë më parë nga persona të paidentifikuar, me sa duket në një krim të planifikuar më herët me detaje. Autorët besohet se e kanë djegur qëllimisht banesën, për të tërhequr shënjestrat në kurth.
Ata janë qëlluar me armë zjarri dhe kanë vdekur në vend gjatë pritës. Autorët kanë pasur dijeni për ardhjen e tyre në fshat. I riu ishte baba i dy vajzave.
Pista e parë mbetet ajo e hakmarrjes, teksa po verifikohen edhe rrethana të tjera, si larja e mundshme e hesapeve ër aktivitete të paligjshme dhe motivet e dobëta dhe të pronësisë, duke u nisur nga djegia e shtëpisë.
Operacionet e bujshme antikanabis të policisë në këtë qark kanë çuar në asgjesimin dhe zbulimin e mbi 100 mijë rrënjëve të kanabisit, me dëm ekonomik të konsiderueshëm për narkotrafikantët. Ndaj nuk përjashtohet edhe kjo hipotezë, deri në eliminimin e saj mbi bazën e hetimeve aktive dhe provave fizike apo teknologjike.
