Kina ka deklaruar se anija e saj kozmike është ngritur me sukses nga ana e largët e Hënës për të filluar udhëtimin drejt kthimit në Tokë duke mbajtur mostrat e para të mbledhura.
Media shtetërore raportoi se një modul i anijes Chang’e-6, i quajtur sipas perëndeshës së hënës në mitologjinë kineze, u ngrit me sukses rreth orës 07:38 të së martës për të filluar udhëtimin e kthimit.
Anija ishte ulur të dielën pranë polit jugor të Hënës në një arritje të parë botërore të festuar nga komuniteti ndërkombëtar i shkencës.
Kina është i vetmi vend që ka zbritur në anën e largët të Hënës, duke e bërë këtë edhe më parë në vitin 2019.
Administrata Kombëtare Kineze e Hapësirës e ka quajtur misionin “një arritje të paprecedentë në eksplorimin njerëzor hënor”.
Ajo anë e Hënës, e cila gjithmonë shikon larg nga Toka, është teknikisht sfiduese për t’u arritur për shkak të terrenit të saj të thyer dhe kratereve të thella.
Misioni i Kinës synon të jetë i pari që do të sjellë përsëri mostrat e shkëmbinjve nga ky krater, të cilat shkencëtarët thonë se mund të jenë shumë të ndryshme nga formacionet shkëmbore në anën e afërt të Hënës.
Media shtetërore publikoi video nga agjencia hapësinore e Kinës që tregon robotin pa pilot duke nxjerrë një krah të vogël dhe duke valëvitur flamurin kinez pasi mblodhi mostrat e çmuara.
“Misioni i ka rezistuar provës së temperaturës së lartë në anën e largët të Hënës”, tha agjencia hapësinore.
Pas ngritjes, moduli hyri në një “orbitë të paracaktuar rreth Hënës” dhe do të kthehet pas rreth tre javësh në një vend uljeje në Mongolinë e Brendshme.
j.l./ dita
