Dy raste të kultivimit të kanabisit janë goditur nga policia, në fshatrat Stojan dhe Lundre në Mat. Tre persona janë arrestuar, mes tyre dy vëllezër, ndërsa kryetari i fshatit Stojan dhe një inspektor pyjor janë vënë nën hetim.
Rreth 176 bimë kanabisi u gjetën të kultivuara në një zonë të pyllëzuar në fshatin Stojan, ku dy vëllezërit Vlash e Pashk Stojani u arrestuan si autorë të kësaj veprimtarie të paligjshme.
Ndërsa në fshatin Lundre, policia asgjësoi nëpërmjet djegies, 165 bimë të tjera kanabisi. Gjithashtu, u identifikua dhe u arrestua autori i dyshuar i kultivimit të këtyre bimëve, Jani Gjergji, banues në fshatin Kokërdhok. Në vijim të veprimeve procedurale për këto raste, u referuan materialet në Prokurori ku nisi hetimi në gjendje të lirë, për Gjevalin Brukaj, kryetar fshatit Stojan dhe Mehill Dekagjini, inspektor i sherbimit pyjor, pasi dyshohen se kanë shpërdoruar detyrën dhe kanë favorizuar kultivuesit e lëndës narkotike.
Materialet procedurale i kaluan Prokurorisë Dibër, për veprime të mëtejshme. Policia e Dibrës ju bën thirrje kryetarëve të fshatrave, inspektorëve të shërbimit pyjor dhe të gjithë atyre që ligji i ngarkon me përgjegjësi, që të bashkëpunojnë me Policinë e Shtetit në kontrollin e territorit për goditjen e paligjshmërisë. Ndërkohë Policia fton qytetarët që të denoncojnë çdo rast të paligjshmerisë, duke ju siguruar anonimatin dhe reagim të mënjehershëm e profesional.
