Përfaqësuesja e Kosovës i ka ndërprerë kontratën trajnerit Primozh Gliha, pas rezultateve të dobëta në fazën kualifikuese të Kampionatit Europian.
Lajmin e ka bërë me dije Federata e Futbollit të Kosovës përmes një komunikate për media.
“Federata e Futbollit e Kosovës ka njoftuar se me përfundimin e ciklit kualifikues për Kampionatin Evropian 2024, ka përfunduar edhe marrëveshja me trajnerin e deritanishëm Primozh Gliha”, thuhet në komunikatë.
FFK-ja e ka falënderuar përzgjedhësin Gliha për punën e tij në krye të ekipit kombëtar në gjashtë ndeshjet kualifikuese të zhvilluara pas shkarkimit të ish-përzgjedhësit, Alain Giresse.
“Federata e Futbollit e Kosovës tashmë ka filluar analizimin e thellë të situatës aktuale në ekipin kombëtar A dhe pas kësaj analize do të merren masat adekuate dhe veprimet e ardhshme, përfshirë edhe angazhimin e përzgjedhësit të ri që do t’i prijë ekipit kombëtar”, thuhet më tej në komunikatë.
Sakaq, në mediat dhe midis sportdashësve të Kosovës, është hedhur në qarkullim emri i Gianni De Biasit, trajneri që çoi kombëtaren shqiptare për herë të parë në Europian.
a.c./dita
