Komisioneri Shtetëror i Zgjedhjeve, Ilirjan Celibashi, ka vendosur të mos i heqë mandatin kryetarit të Bashkisë së Kuçovës, Kreshnik Hajdari, duke vlerësuar se në këtë rast nuk plotësohen kushtet e parashikuara nga ligji i dekriminalizimit.
Vendimi u mor pas shqyrtimit të një ankimi të paraqitur nga ish-kandidati i opozitës për Bashkinë e Kuçovës, Lefter Maliqi, i cili kërkonte heqjen e mandatit të Hajdarit. Sipas ankimit, kryebashkiaku akuzohej për falsifikim të formularit të dekriminalizimit, duke mos deklaruar një dënim të mëparshëm në Greqi.
Në arsyetimin e tij, Celibashi u shpreh se, sipas interpretimit që i bën ligjit si Komisioner Shtetëror i Zgjedhjeve, Hajdari nuk ndodhet në kushtet e ndalimit për të ushtruar funksionin.
“Nuk jemi në kushtet e ndalimit për shkak të ligjit të dekriminalizimit. Subjekti nuk është në kushtet e ndalimit të ligjit, sipas leximit që i bëj unë si Komisioner”, deklaroi Celibashi.
Me këtë vendim, Kreshnik Hajdari vijon të mbajë mandatin si kryetar i Bashkisë së Kuçovës.
j.l./ dita
