Kryeministri i Kosovës Albin Kurti ka udhëtuar drejt Greqisë për të marrë pjesë në Tryezën e Rrumbullakët me Qeverinë e Greqisë. Gjatë qëndrimit të tij atje, ai do të zhvillojë takime zyrtare me përfaqësues të ndryshëm.
Mediat e Kosovës shkruajnë se kjo tryezë, e 26-ta me radhë, organizohet nga Qeveria e Greqisë dhe prestigjiozja britanike “The Economist” me mbështetjen e Parlamentit Europian dhe Komisionit Europian.
Me temën “Antiteza, transformime, arritje në një botë në ndryshim”, në këtë tryezë do të marrin pjesë liderë shtetesh, ministra kabineti, drejtues të organizatave ndërkombëtare, drejtues nga biznesi, financat, profesionistë nga akademia dhe mediet.
Krahas kryeministrit Kurti, të ftuar në panel janë edhe Dritan Abazoviç, kryeministri i Malit të Zi; Zoran Zaev, ish-kryeministër i Maqedonisë së Veriut; Sir Stuart Peach, i dërguari special i Mbretërisë së Bashkuar për Ballkanin Perëndimor dhe George Katrougkalos, ish-ministër i Punëve të Jashtme të Greqisë. Paneli do të drejtohet nga Joan Hoey, drejtor për Europë, The Economist Intelligence Unit, redaktor, The Democracy Index.
j.l./ dita
