Nëse elementët dhe fashikujt e dosjes hetimore do ishin në vendin e tyre, rezultatet e hetimit të dosjes së bujshme të tre dekadave më parë në Peshkëpi, ku u vranë dy ushtarakë shqiptarë kufiri nga trupa rezerviste dhe ekstremiste greke, do të ishin të tjera.
Ish-prokurori Eugen Beci, që hetoi masakrën e Peshkëpisë, deklaroi në emisionin “Të Paekspozuarit”, se hetimi për këtë çështje u mbyll për dy arsye thelbësore. Së pari, shteti grek nuk ktheu përgjigje për kërkesat e Prokurorisë shqiptare. Ish prokurori zbuloi gjithashtu se u zhdukën fashikuj nga dosja, ngjarje kjo e paprecedent.
Eugen Beci: “Në pikëpamje të korrespodencës me shtetin grek, nuk ishin të plota. Është detyrim që rrjedh nga Konventat. U gjetën disa shpjegime proceduriale, që kanë të bëjnë me parashkrimin e veprës penale. Pati dy probleme, zhdukja e një fashikulli të hetimit, që u bë nga autoritetet shqiptare. Dhe mos ardhja e letërporosisë (nga Greqia). Ishte rasti i parë që hasa një dosje, që mungonte materiali. Në vend të vendimit, thuhej janë fletë formati bosh. Veprat janë kryer që nga 94. Një akt terrorist mbeti pa u ndëshkuar”.
