Zhvillime të reja nga lufta civile në Sudan.
Organizata Botërore e Shëndetësisë ka ngritur alarmin për situatën e jashtëzakonshme nga luftimet në Sudan, pasi një laborator publik qendror që përmban mostra të viruseve vdekjeprurëse si poliomieliti, kolera, fruthi dhe materiale të tjera të rrezikshme mund të shkatërrohet dhe të rrezikojë jetën e shumë banorëve.
OBSH paralajmëron se kjo është një gjendje jashtëzakonisht e rrezikshme dhe kërcënim biologjik pasi ekziston rreziku i përhapjes së sëmundjeve infektive, shkruajnë mediat e huaja.
Në një deklaratë për CNN, OBSH tha se teknikët e trajnuar të laboratorit nuk kanë më akses në laborator” dhe se objekti kishte pësuar ndërprerje të energjisë. Kjo do të thotë se laboratori nuk ka më kushtet e duhura për t’i mbajtur siç duhet materialet biologjike.
“Duhet një ndërhyrje urgjente ndërkombëtare për të rikthyer elektricitetin dhe për ta siguruar laboratorin nga çdo formë përplasjeje, pasi po përballemi me një kërcënim të vërtetë biologjik,” citoi më tej CNN burimin e sa saj.
Ukraina kreu një operacion të suksesshëm shpëtimi për 138 njerëz nga Sudani, mes të cilëve 87 ishin ukrainas kryesisht specialistë të aviacionit, pilotë, teknikë dhe anëtarë të familjes së tyre.
Lajmi është bërë i ditur nga Drejtoria kryesore e Inteligjencës (MDI) më 25 prill.
Që nga 15 prilli, dy gjeneralët, në pushtet pas grushtit të shtetit të vitit 2021, kanë nisur një luftë të pamëshirshme në Sudan.
Dhuna, kryesisht në Khartoum dhe Darfur (perëndim), ka marrë jetën e më shumë se 420 personave, ndërsa më shumë se 4000 janë plagosur.
Ata kanë shkaktuar gjithashtu zhvendosjen e dhjetëra mijëra njerëzve në shtete të tjera të Sudanit ose jashtë kufijve të vendit, në Çad dhe Egjipt. Gjeneralët kanë sjellë edhe mobilizimin e vendeve për të larguar shtetasit e tyre.
j.l./ dita
