Më shumë se 9,000 civilë, përfshirë 453 fëmijë, janë vrarë në Ukrainë që nga fillimi i pushtimit të plotë të Rusisë shkurtin e kaluar.
Shifra u rrit pasi numri i të vdekurve nga një sulm me raketa ruse në një bllok apartamentesh në Dnipro të shtunën u rrit në 45 ndërsa ekipet e kërkimit po analizojnë rrënojat.
Shtëpia e Bardhë ka deklaruar se një paketë shtesë ndihme për Ukrainën mund të shpallet “në fund të kësaj jave”.
Holanda planifikon t’i bashkohet SHBA-së dhe Gjermanisë në dërgimin e një sistemi të mbrojtjes raketore Patriot në Ukrainë, tha kryeministri holandez Mark Rutte.
“Ne kemi qëllim që t’i bashkohemi asaj që ju po bëni me Gjermaninë sa i përket projektit për Patriotët, sistemit të mbrojtjes ajrore. Mendoj se është e rëndësishme që ne t’i bashkohemi këtij projekti”, i tha Rutte Bidenit gjatë takimit në Shtëpinë e Bardhë, duke shtuar se “për këtë në mëngjes bisedova” edhe me kancelarin gjerman, Olaf Scholz.
Gjermania njoftoi më 5 janar se do të ndjekë SHBA-në dhe do të dërgojë një sistem të avancuar të mbrojtjes ajrore në Ukrainë.
Rutte përmendi “pamjet e tmerrshme” të një ndërtese banimi të shkatërruar nga raketat e fuqishme ruse në qytetin e Dnipros gjatë fundjavës së shkuar, duke shtuar se “këto janë pamje të tmerrshme dhe mendoj se forcojnë qëndrimin tonë që t’i ndihmojmë Ukrainës”.
Biden çmoi kontributin e Holandën në aleancën perëndimore të udhëhequr nga SHBA-ja sa i përket mbështetjes së Ukrainës kundër pushtimit rus, që nisi më 24 shkurt 2022. Ai tha se “Rusia po vazhdon të veprojë në mënyra që pothuajse janë të pabesueshme”.
j.l./ dita
