Personat e dënuar për vepra penale ndaj të miturve apo ndaj institucioneve arsimore nuk do të lejohen të punësohen asnjëherë më në shkollat e arsimit parauniversitar, pavarësisht rehabilitimit të tyre. Kjo gjë tashmë është sanksionuar në ligjin për arsimin parauniversitar, ndryshimet e të cilit janë miratuar ditën e sotme në mbledhjen e Këshillit të Ministrave.
“Ligji do të ofrojë më shumë siguri për nxënësit, duke mos lejuar që në shkolla të punësohen persona që kanë precedentë penalë, pra që janë persona të dënuar për vepra penale ndaj të miturve, apo ndaj vetë institucionit arsimor. Edhe kjo çështje ka pasur një ndjeshmëri të lartë publike për shkak të rasteve të ndryshme që kanë ndodhur gjithë këto vite, dhe na u desh patjetër që të ndërhyjmë në ligj, sepse, edhe personat që janë rehabilituar pas dënimit për vepra të tilla, nuk do të kenë asnjëherë të drejtë që të punësohen në institucionet tona arsimore”, ka bërë me dije ministrja e Arsimit dhe Sportit Evis Kushi, pas përfundimit të mbledhjes së Këshillit të Ministrave.
p.k
