Policia ka gjetur një makinë të djegur në zonën e Mallakastrës, e cila dyshohet se u përket autorëve të masakrës së Memaliajt, në orët e vona të mbrëmjes së djeshme.
Në këtë zonë po bëhen edhe kërkime për gjetjen e autorëve, të cilët ekzekutuan me armë tre persona dhe lanë të plagosur një tjetër.
Objektivi i sulmit me armë zjarri në një lokal në Memaliaj rreth orës 11.20 të mbrëmjes së djeshme ishte 74 vjeçari Shyqo Kalemi por viktima të të shtënave me automatik ngelën edhe dy persona të tjerë Gledio Muka dhe Marsel Çela, kamarieri dhe një klient i lokalit 36 vjeç dhe 47 vjeç.
Vëllai i Shyqyriut, Artur Kalemi 57 vjeç, që gjendej gjithashtu në vendngjarje ka marrë plagë të rënda dhe gjendet në spitalin e Gjirokastrës në reanimacion.
Atentatorët qëlluan me breshëri automatiku në drejtim të objektivit, Shyqo Kalemi brenda një lokali pranë bashkisë së Memaliajt, pavarësisht se përreth tij ka pasur disa persona të tjerë.
Dyshohet se të paktën 3 autorë kanë marrë pjesë në atentat. Ata kanë lëvizur me një makinë të zezë nga qendra e Memaliajt, drejt lokalit pranë bashkisë. Sipas raportimeve njëri nga autorët ka zbitur nga makina dhe ka qëlluar me breshëri kallashi.
Pas ngjarjes autorët në fshatin Bejaj kanë djegur edhe mjetin e përdorur në krim, mjet i cili u gjet nga policia disa orë pas ngjarjes.
“Forcat Kombëtare të Sigurisë dhe Renea kanë shkuar në vendin ku po digjet automjeti, kanë rrethuar zonën dhe vijojnë kontrollin për kapjen e autorëve” – thuhet në njoftimin e policisë së Gjirokastrës.
Policia gjithashtu ka ngritur postbllokë kontrollesh në bashkëpunim edhe me drejtoritë e policisë së qarqeve, Fier, Vlorë dhe Berat.
j.l./ dita
