Republika Çeke ka shpallur të shtunën ditë zie kombëtare pasi një person i armatosur vrau 14 persona dhe plagosi 25 në një universitet në Pragë.
Presidenti Petr Pavel shprehu “trishtimin e tij të madh” dhe “zemërimin për humbjen e jetëve të pafajshme’.
Personi i armatosur, për të cilin policia tha se ishte “eliminuar”, besohet të ketë vrarë edhe babanë e tij dhe mund të jetë i lidhur me vdekjen e dy personave javën e kaluar.
Kjo eshtë një nga të shtënat masive më të rënda që ka ndodhur së fundmi në Evropë.
Të shtënat filluan rreth orës 15:00 me orën lokale (14:00 GMT) të enjten në ndërtesën e Fakultetit të Arteve të Universitetit Charles në qendër të kryeqytetit çek.
Personi i armatosur hapi zjarr në korridoret dhe klasat e ndërtesës, duke vrarë në mënyrë të rastësishme, ndërsa stafi dhe studentët përdorën mobilje për të mbrojtur veten në dhoma.
Policia tha se i armatosuri ishte një student 24-vjeçar në universitet dhe nuk kishte precedentë të mëparshëm penalë, megjithëse shton se u gjet një “arsenal i madh armësh dhe municionesh”.
Para të shtënave, policia kishte marrë një raport se i dyshuari besohej se po shkonte në Pragë nga një qytet aty pranë me qëllimin për të vrarë veten.
Babai i sulmuesit është gjetur i vdekur më herët gjatë ditës së masakrës.
Gjendja e të plagosurve në masakër është e qëndrueshme pas të shtënave, njoftoi televizioni çek, duke cituar një spital në Pragë. Pacientët u qëlluan në kokë, gjoks ose gjymtyrë, disa iu nënshtruan operacionit.
Mediat çeke raportojnë se njerëzit kanë dhuruar miliona korona për të ndihmuar të prekurit nga tragjedia në Fakultetin Filozofik në Pragë.
Sipas të dhënave, mbi 2.5 milionë korona u grumbulluan në fondin e donacionit të Universitetit Charles.
Policia tha se ka marrë masa paraprake në të gjithë vendin ndaj objektivave të buta dhe shkollave.
“Nuk kemi asnjë informacion për ndonjë kërcënim specifik dhe bëhet fjalë realisht për parandalim – një sinjal se ne jemi këtu dhe se jemi gati. Mund të shihni edhe oficerë policie me armë të gjata, aktualisht jemi duke kontaktuar operatorët e pajisjeve të përzgjedhura. dmth objektivat e buta) dhe vënia në dijeni e kësaj mase”, shkruan policia në rrjetin X.
Kryeministri çek Petr Fijala njoftoi se qeveria e vendit shpalli të shtunën, 23 dhjetor, ditë zie kombëtare për shkak të të shtënave në Universitetin e Charles në Pragë, ku u vranë të paktën 15 persona, përfshirë sulmuesin.
“Qeveria miratoi një konkluzion në të cilin shpreh ngushëllimet e thella për familjet e viktimave dhe me një minutë heshtje në fillim të seancës së qeverisë, ne u shprehëm respekt për viktimat e të shtënave”, tha Fijala të enjten, raporton Novinki. .
Ai u bëri thirrje qytetarëve të Republikës Çeke të mbajnë një minutë heshtje më 23 dhjetor në orën 12:00 për të nderuar viktimat, duke shtuar se në atë kohë do të bien edhe kambanat e kishave në të gjithë vendin.
j.l./ dita
