Gjykata e Tiranës ka lënë në burg, Ermes Hoxhallin i akuzuar për mashtrim kompjuterik, pasi përmes një identiteti të rremë ai premtonte bursa falas për në Shtetet e Bashkuara të Amerikës.
Hetimet zbuluan se 20 vjeçari nga Devolli përdorte skemën e mashtrimit përmes projekteve “Let’s talk together about US 24” dhe fuste në “grackën” e tij gjimnazistët, studentët dhe zyrtarët arsimorë të Shqipërisë.
Në seancën e sotme, të pranishëm ishin edhe përfaqësues të Ambasadës Amerikane, si organi diplomatik i prekur drejtpërsëdrejti nga kjo skemë e mashtrimit, duke i përdorur emrin e saj.
Ermes Hoxhalli u premtonte nxënësve e mësuesve udhëtime falas në SHBA e shërbime të tjera. Qindra studentë, mësues dhe zyrtarë arsimorë në të gjithë Shqipërinë morën pjesë në këto programe mashtruese.
Alarmi u ngrit nga Ambasada Amerikane, e cila doli në një deklaratë publike duke thënë se projekti i njohur “Let’s Talk Together About US24”, që kishte si qëllim informimin e qytetarëve sa i përket shkollimit, udhëtimeve apo dhe marrjes së vizave amerikane nuk kishte të bënte aspak me Departamentin e Shtetit të SHBA-së, departamentin e Arimit të SHBA-së, apo programet e tjera arsimore si dhe personelin e ambasadës.
Për këtë arsye ambasada, u bëri thirrje qytetarëve shqiptarë që të jenë të kujdesshëm dhe mos bien pre e mashtrimeve.
Gjithashtu, policia Kriminale në Tiranë u vendos në ndjekje të autorëve përgjegjës të ndërtimit të kësaj skeme mashtrimi, ndërsa u arrestuan disa persona, përfshirë edhe 20 vjeçarin, Ermes Hoxholli që hiqej në internet si Klea Rama, mbesa e kryeministrit Edi Rama.
i.b./dita
