Një vajzë 8-vjeçare nga Venezuela ka humbur jetën, ndërkohë që njëzet persona të tjerë u shpëtuan pasi një varkë që transportonte emigrantë u mbyt në brigjet e Panamasë, njoftoi të shtunën agjencia e rojeve kufitare panameze.
Në varkë ndodheshin gjithsej 19 emigrantë nga Venezuela dhe Kolumbia, duke përfshirë 8-vjeçaren, si dhe dy kontrabandistë, sipas një deklarate të publikuar nga shërbimi i rojes kufitare të Panamasë (SENAFRONT).
Sipas SENAFRONT, fundosja e varkës ndodhi në brigjet e provincës bregdetare të Gouna Yala, e cila banohet kryesisht nga banorë indigjenë, në pjesën verilindore të vendit, “për shkak të dallgëve të forta të shkaktuara nga moti i keq”.
Fondi i Kombeve të Bashkuara për Fëmijët (UNICEF) konfirmoi vdekjen e të miturës dhe u bëri thirrje autoriteteve panameze që të garantojnë riatdhesimin e sigurt të emigrantëve.
Që kur presidenti amerikan Trump mori detyrën më 20 janar, qindra emigrantëve nga vendet e Amerikës Latine që ëndërronin për një jetë më të mirë u është mohuar hyrja në SHBA.
Për pasojë ata kanë marrë rrugën e vështirë të kthimit, duke lëvizur me etapa në këmbë, me autobus, me varkë, ndonjëherë duke kaluar natën në qendrat e pritjes.
j.l./ dita
