“Një horror i vërtetë që nuk mbahet mend të ketë ndodhur kurrë në Pragë”. Kështu e përshkruan pedagogia shqiptare në universitetin “Charles”, masakrën e një dite më parë, ku u vranë 14 persona dhe u plagosën 25 të tjerë.
Në një lidhje direkt me “Dita Jonë” Orkida Borshi sjell dëshminë rrëqethëse të koleges shqiptare, e cila ndodhej në fakultet në momentin e ngjarjes.
“Lektorja e gjuhës, ishte e mbyllur në një dhomë së bashku me një student, që ishte duke dhënë provim. Ajo më merr në telefon, mendova se më mori për orarin, ose mësimin dhe dëgjoj që është shumë e shqetësuar.
I thashë ‘qetësohu’ dhe pastaj dëgjoj që merrte frymë në mënyrë të tmerrshme, sikur po iu shkonte dikush mbrapa dhe më thotë që ‘këtu ka të shtëna, nuk e di çfarë po ndodh’.
Nuk arrija të kuptoja çfarë po ndodhte, kur dëgjoj në telefon që dikush po shtinte vazhdimisht. Një horror i vërtetë, nuk e imagjinoja dot që në fakultetin e universitetit ‘Charles’ në Pragë të ndodhte diçka e tillë”.
Sipas saj, studenti 24-vjeçar nuk shkoi në orën e tij të leksionit, por shkoi në godinën kryesore dhe qëllonte nga kati i katërt i universitetit, ndërsa studentët e tjerë për të shpëtuar u varën në fasadë ose hidheshin nga kati i tretë.
“Ky djalë student i historisë duhet të kishte leksion në një godinë tjetër të fakultetit, nga ora 2 pasdite dhe nuk shkoi në atë leksion, por shkoi te godina kryesore e fakultetit ku ndodhemi edhe ne.
Nuk dihet nëse e ka sjellë armën apo e ka patur aty, por ka qenë një tmerr i vërtetë. Lektorja më thoshte që dikush ecën te dritarja. Askush nuk kuptonte ç’po ndodhte ishte një kaos i vërtetë. Udhëzimet ishin që të shtriheshin në dysheme dhe të fiknin dritat”.
Pedagogia thekson se studenti 24-vjeçar e ka planifikuar ngjarjen.
“Nuk ka qenë në rregull. Ka patur një armë që këtu lejohet, është një armë e gjatë e tipit ‘winchester’. Kishte dhe stativ për armën, e kishte planifikuar”.
E vendosur prej 30 vjetësh në Pragë, pedagogia Orkida Borshi thotë se kjo ngjarje është një trishtim i madh para festave. Ndërkohë, fakulteti është mbyllur deri më 2 janar me urdhër të dekanes.
Masakra ndodhi një ditë më parë në Fakultetin e Arteve të Universitetit ‘Charles’, në zemër të pjesës historike të Pragës, në zonën hebreje, e cila është edhe shumë e frekuentuar nga turistë.
j.l./ dita
