Një minator ka mbetur i plagosur teksa po punonte në një minierë në Bulqizë. Sipas policisë 60-vjeçari Shyqyri Çela është dërguar fillimisht në spitalin e Bulqizës e më pas është transportuar për ndihmë më të specializuar, në Spitalin e Traumës, Tiranë.
Burime për Report Tv bëjnë me dije se minatori është dërguar i plagosur rëndë mbrëmjen e djeshme rreth orësh 19:30 (21 gusht) nga një person me makinë private, i cili më pas është larguar. Policia ka marrë në pyetje personin që e transportoi. Nuk dihen rrethanat sesi ka ndodhur ngjarja, ndërsa po kryhen hetime.
Shyqyr Çela punonte në galerinë D të minierës së Bulqizës.
“Rreth orës 19:30, të mbrëmjes së djeshme, është paraqitur për të marrë ndihmë mjekësore, në spitalin e Peshkopisë, shtetasi Sh. C., 60 vjeç, me profesion minator, i punësuar në një subjekt minerar, në Bulqizë. 60-vjeçari është transportuar për ndihmë më të specializuar, në Spitalin e Traumës, Tiranë. Grupi hetimor, në drejtimin e Prokurorisë, po vijon hetimet e thelluara, për zbardhjen dhe dokumentimin e plotë të rrethanave të këtij rasti”, njofton policia.
